Гьайни йигъбышее ГТРК «Дагъыстанни» компаниее цlаlхни мизен радиойн редакцие ишлемишехьи гидгъылыйн 24 сен быкырхьа. Ед’ни мизелин цIеддыйн радиоверлиш инсанаршикIле Дагъыстанни радиойнче 2002-ъэсди сенни апрельни вузани 16-чил’ къайиххьы.
24-ни сеней редакциейн гееб хаIбна иш вукку. Манбыше йишди халкьын таарых, миз, адабият, маданият гьувааджесдимее хаIдда верлишбы гьаIзирау. Къийнад радиойни редакциейн ишчерше мана иш дурустба вуккеккана. Редакциейн мухбирар гьар йигъыс марахукван верлишбы эфирейхъа гьаIзираъас чалышмишооохьи.
Ед’ни мизен радиойн редакцие аахъый йишди халкьни таарыхее маlргьаматыквана иш вухьа. ИнсанаршикIле цIедда ед’ни мизел’ верлишбы, концертбы радиойнче къайиххьы. Манчика саджигее манбышикIле радиойни верлишбышейнче дюнйейл’, Россиейл’ ва Дагъыстанее ыхьайн тезе хабарбы ацIахьа.
Редакциейн цIеддыйн сенбы дагъамынбы ыхьа. Манке редакциейхъад фонотека (верлишбышин архив) ыхьа деш. Манбы саъасдимее хаIдда сенбы лазымхьа. ЦIаIхни халкьыква багълыданан маIънийбы, фольклор, таарыхыс къадсырыйн верлишбы эфирейхъа гьаIзираъасдиме редакциейн хаIбна заIгьмат гьавъу. Манбыше растына хъавайлени дагъамийвал’бышихъа ил’дяакы, сабара сенбышиле абырыкван фонд ва фонотека саъас аIхыйн. Лентбышейхъа цIаIхни халкьни доюквани ааIлимаршин, маъаIллимаршин, дохтураршин, хивни тасарруфатни ишчершин, маIънийбыйий макьамбы гьаъани дестебышин сесбы алятIас аIхыйнбы.
Ед’ни мизен радио ишлемишехьи гидгъылни сабара вахтаке редакциейни ишчерше «Алшан» донан телеверлишбы гьаIзираъа гибгъыл. Телеверлишбы оIгийл’ вуза са элесний эфирейхъа хъигъечIенбы. ГьаIшде инсанрашихъад вуза кьоIни элеес ед’ни мизени верлишбышихъа иляакасын имканбы водунбы. Студиейхъа абыйни мигьманарше, цIаIхни халкьни санихьыйни ва къыйнийни йигъыква багълыданан марахуквана гаф гьааъа. Ааlлимарше, сиясатчерше, ишкар инсанарше, шаирарше, къуллухчерше таарыхыке, мизеке, маданиятыке, адабиятыке, халкьни йиссени аlдатбышике гаф гьааъа. Гойне хьинне халкьыхъад водни ва растына хъадайлени дагъамийвал’бышике ихтелетаъа. Манбы аlрейнче алятlасди мисалабышис фагьам гьооли.
АIхырейни сенбышее редакциейн хаlбна иш цIаIхна миз аIрайле идякIнасдимее къооджи. Йишонааъани мизена кок утIумааъасдимее мактаббышее хъаIдаххъани ушахаршини аIрайл’ конкурсбы, олимпиадабы, тадбырбы алгъайгьи.
Редакциейхъаб са макьсад вобна. Манаб цIаIхни халкьна миз, таарых, маданият, манбышин до гьуваджый водун.
24 сен кIыл’на вахт дешобна. Мани сенбышее редакциейн миллетын къийхъыйн йигъ югун, болун ва ишыгъекван ихьесдимее хаIбна заIгьмат гьавъу. Гьинчиле хъийгъад радиойни редакциейн йишди миллетна, инсанаршина уфтанийвалла, садибийвалла, дирибашийвалла гьаагвасдимее чIакIын ишбы къаджес гьаIракатаъас. ЦIаIхни миллетын до гьалед ахтывалейхъа къалхмишаъас чалышмишувхьес.
