Йихъбышди аlрайл’ маъаlллимна дараджа, джига гьаммаше ахтыба вухьа. Манкъус гьуlрмат гивийхьен аlдат къийнад аху водун. Югна маъаlллим хивна барака вобна. Мана гьаммаше чалышмишхьесда мактабын, хивын до ахты хъаъас, шыгыртаршис югун ацlаалий тербие гьелес.
Гьинчиле сабара вахтна гьихъа райlгьматыххъа аркlына Мишлешни хивни йыlкьнекни мактабе ишлемишхьана Шаlъбанов Нажмудиныр республикее доюкана маъаlллимний. Манкъве физикайний математикайн дарсыбыний гьеленбы.
Наджмудин маъаlллиме джуна ыlмырена йаlхъ мактабыка багъламишавъуйн хаlдда сенбыний. Гьавъуйни сенбышда хаlддананбы мактабее ишлемишхьа.
Нажмудин Шаlъбанов 1945-ъэсди сен Мишлешни хивее едике ыхьа. Мана дюнйейлхъа Хаlбна Ватанна даlвъий таамхьайни сен ары. Манбы геед дагъамынбы сенбы ыхьа. Хиваршее мысвалла, мыкlаала, касибийвалла вухьа. Манке Хизанбышихъад ушахаршис ацlаал’ гьелесын имканбы ыхьа деш. Манке тека сейракункъусний аали мактаббышейхъа иккечlес кьисматехьен. Манбышда сайир Нажмудин маъаlллим ыхьа.
Мана дагъамийвал’бышихъа ил’дяккы, 1967-ъэсди сен маъаlллимын санаъаlт алятlасдимее санаъаlтбы Дагъыстанни Педагъожи иниститутейхъа хъуво. Манкъве физикайний математикайн факультет сечмишау. Институтей хъадаххъаl –хъадаххъаl, мана ватаныс хидмат гьааъас эскерейхъа аркlын. Хьебыдле сенна эскерийвалла гьавъу. 1979-ъэсди сен хылехъа диплом алябтlу сувалхъа ишлемишхьес саркlыл. Сабара сенбына Нажмудин маъаlлим Джинаlгъни хивни мактабее ишлемишхьа. Гойне хьинне Мишлешехъа ишлемишхьес хъары. Ыlмырени аlхырейхъамее едике ыхьайни хивни йыlкьнекни хивее чалышмишхьа.
Наджмудин маъаlллимна ыlмыр мактабыка багълыба вухьа. Манкъве хьодцlал’ сенна шигыртаршис физикайний математикайн дарсыбы гьуво. Джурабаджура сенбышее сыныфна регьбер ыхьа. Мани сенбышее манкъве хаlбба билигыкван ушахар гьаlзиравъу. Къийна манбышда гьаарна джурабаджур ишбышил’ ишлемишоохьи вобунбы. Гыргынбыше Наджмудин маъаlллимни ацlаалийс ахтына кьмймат гьуво, джус раlгьмат къихооли. Манбышда сайир, къийнийна мактабна директор Ислам маъаlллим ворна.
«Наджмудин маъаlллимее засыд дарсыбы гьувойнбы. Манкъуни дарсейхъа ушахар гьавасыканий хъабайли. Маъаlллимее джухъад водун билиг шыгыртаршис гьихьараъанний. Мактабни коллективын манкъуна гьуlрмат гьуваадженаний. Хаlдданани суалбышее манкъукаа мыслягьаlтний гьааъана. Нажмудин маъаlллимын йишди аlрейнче аркlыний шас хаlдын таlгьсир гьау, — И. Ибрагьимове увгьо.
Директорни кал’мабышихъаб хаlбна маlъна вобна. Югни маъаlллиме мактабна дараджа ахты хъаъана. Нажмудин маъаlллымыр магьаlрна ыхьа. Вудж къийна шаква дехьейир, манкъун до, гьаъуйн ишбы хаlдда сенбына инсанаршини йикlее ахвас.
