Дюнйе гьаIракатеехъа юххьан хъадымее эчIи. Вазни календарыква юххьан мартыни 21-22-чил’ гийгъал, табият кьыIдмийни никIеенче уянмышехьи. Гьам мани вузаке тезе сен гийгъал. Мартыни вуза кьоIдле байрам водун: са 8 март — Быкырдюнйейни едаршин йигъ, сайид «Наврузбы». Гунайл’ни дагъыстанлыбыше ман байрам йигъынджагъбышиква алгъайгьи. Мани йигъбышее хайир ишбы къаджесын мислягьаIтбы гьаъа. Лезгибыше мани байрамыкIле «Яран сувар, рутулбыше — «Эр», цIаIхбыше — «Наврузбы» эйгьи.
Сувал’ни маIгьалыл’ цIаIхбыше (йихъбыше) «Наврузбы» юххьанийн байрам хьинне алгъайгьи. Мани байрамыква багълыданан гьар хивыхъад чин аIдатбы водунбы. Анджах манчина маIъна са вобна- тезе сенеехъа тезе югни умыдбышиква хъигъебчIуй. Манчихъа гора, цаIаIхбыше тезе сенеехъа хъигъебчIессе гьихъа хав-уджагъ саъа-хъаъа, юххьанийн чолеедын ишбы: дирингбы эза, багъбы гетIа, некбышеехъа хьид ыккекка. МаIгьаллабы, кучебы, хъучбы гьаIшике темизяъа. ЦIаIхбышихъад гьаIшдед уджагъбы хъайгьен, сукбы, къаргъадалийбы хъецан аIдатбы мейид водунбы. Наврузбышди йигъыл’ йишди хиваршее инсанар юххьанийн байрам садибда кечирмишаъас майдамахъа сабайли. Гьайни сенид ман югун юххьанийка багълыданан байрам алгъагьас кIелиханау деш. Наврузбышди йигъыл’ гыргын ЦIаIхни хивын джамаъаIт майдамахъа хъигъечIу. Гьайни сенийна маджлис хивни йыIкьнеени майдама ЦIаIхийни маданиятни марказни хааIрункъее Вагиф ГьаIджиеве, ЦIаIхийни китабханайни хааIрынкъвее Джавгьарат Гераевае, цIаIхни йыIкьнекни мактабни маъаIллимее Сабир ГьуIсейнове къурмишавъу. Мани йигъыл’ хивни джамаъаIтын джони кьул’пеенче гехьан хораг, къеджийн кIетIулер, хъооцуна сук, хъодхьурийн кьукьар, къурун чуры хаанче ады. Майдама суфра къурмишау. Ман ярашугъеехъа симаварын адчу. Хивни агъсаххъаларше насигьаIт, тербие гьелен мислягьаIтбы джегьилершис гьуво, оIгилийни таарыхыке йишонувхьа. Едарше суфранылхъа йиссейн цIаIхбышин югун-югун хорагбы хъодхьур хъады. Ушахарше маджлисыс йиссейн ранг гьелесдиме уджагъбы хъавгьу. Манчиле къобкIул. Гьел’бедти, мани йигъыл’ маIънийбыд ыхьайнбы. Майдама хаIр-кIылинкъве мыкIар гьау. Ненаджар ненкъуниджар хатирес хъетIу деш. Садджу байрам гьаъани джигее аIхъанайн, зарафатбышин, маIънийбышин сесбыйи къийххьи. Мани йигъыл’ джегьилерше спортын оIюнбы гьагу. Йишди увгьойка, маIгьдын байрамбы ши гьуваджес ыккан, няъас увгье, манчин гьам инсанаршини аIреедын муIгьуббатбы гьеххаъа, гьамыд йишин аIдатбы гьуваджи. Ман йигъ цIаIхбышди маданиятни байрамылхъа садкIыл. Гибхьыйни имканыхъа гора, «Нур» кIазетни ишчерше гыргын цIаIхбы (йихъбы) Навруз байрамыква табрикааъа!
