Гьар сен, августни I2-чил’ дюнйейл’ джегьилершис къассырийн йигъ алгъайгьи. Мани ыIмырни оIл’чеехъа I6-30 ешеебын инсанар гябакIа. Манбышди аIреейиб хаIббананбы телябабы вобунбы. Имкам гибхьыйхъа гора, «НУР» кIазетни редакциейн джегьилер джони Йигъыква табрикааъа! Югна ыIмыр ва джанана сагъвалла манбышис аIрзуламишааъа.
ОIлкайн экономика, адын ва къадын сиясат, маданият, хъаIдхъий, хивын тасарруфат гьаIракатеехъа абадчена гудж – джегьилер вобунбы. Агар гьоIкуматын къийхъийн йигъ шадын ва болун ихьес ыкканхьее, манке джегьилершикIле ачухна ва хъобкуна йаIхъ гьаагвас вуккан; манбишыквана миз тIабалааъас вуккан.
ОIлкайн экономика, адын ва къадын сиясат, маданият, хъаIдхъий, хивын тасарруфат гьаIракатеехъа абадчена гудж – джегьилер вобунбы. Агар гьоIкуматын къийхъийн йигъ шадын ва болун ихьес ыкканхьее, манке джегьилершикIле ачухна ва хъобкуна йаIхъ гьаагвас вуккан; манбишыквана миз тIабалааъас вуккан.
Йишди гьоIкуматыл’ Дагъыстан эн джегьилер хаIббанана республика вобна, гьамыб эн хаIбба джегьилер джони оIлумыке гьидябатIана ва джегьилершис иш дешда республика вобна. Мункум вобна, мани йизди фыкырыква хаIббананбы раздевхьес, анджах ман гьаIкIен ихтелет’ водун.
Йишонааъас ишбышди ва къуллухбышди гьаIкIее. Иш, ыIмыр гьаIракатеехъа абаччен лышан водун. СанаъаIт сечмишаъассе гьихъа, гьаарункъукIле джун гьаIракатбы ацIахьес ыккан.Къийна ишилхъа эчIесдиме, къуллухылхъа илгъечIесдимеега, не югун «калле», не югна дайий, нейид «кокун джиб» ыккан. ЦIеббыйна йаIхъ текасейракни джегьилис кьисматоохьи. Иш ваацIанкъус оIгеехъа ааIсда йаIхъ дешда. ОIгее чIакIын къаебы илёдзыр водунбы. Къийна ушах бахчейле гидгъыл, чIакIни ташкилатбышехъамее рушватын, коррупциейн манбы алищу водунбы. Мебна чараа гьиняа дешда. Инсанни фыкреехъа хъайли деш, яныл’ джуле гьаIракатыкванбы, баджарагъыкванбы, гуджнакванбы воохьива. Мисала вобна: «Къуллухыле бадалааъас дёохьенбы, воохьенбы дешки». ГьоIкуматна иш джуни «деккинчилхъа» сивийкIал. Агар вахтале вахталхъа, «джига къуIмаъабкIаъассе», къуллухчер бадалавъээ, бел’ки сыкIылда коррупциейн оIги даянмишаъас аIха.
Гьаар инсане джун яшайиш ыIмрени аIхреехъаме лайикьука ыккеес ыккан. Манкъухъад камын-кесирын ыхьес ыккан деш. КьаIсхъыхьа ишлемишхьес дяхаIни инсаныс гьоIкуматын гыргын шарааитбы яратмишаъас ыккан. Гыргына мани ешеехъа, Иншааллагь, гьихьарасда. КьаIсинбышда гьуIрмат гьид’вааджени джигее джегьилеершихъаб геледжагъыл’ барака вухьес деш. Анджах ешеени инсанни напсехъабыб кьараал’ вухьес вуккан. Пенсиеехъа хъигъечIуна инсан маIгьаIрна инсан ворна, манкъуке иш быкырба быкырааъас вааIха деш. ЙаIъни мана гьааъас джанан муфлат гьооли деш. Йишди увгьойка, пенсиеехъа гьирхьыл’на инсан къуллухыле, гьоIкуматни ишиле аIл’гьаас ыккан. Шавусджад акьва хатир гьаъас ыккан деш. Къийна гыргын акьвакIена водун. ХаIббанани пенсионераршихъад джон хав-уджагъ водун, ушахаршисын джигабыд къаджейнбы, гьоIкуматын гьелен пенсиебыд аляатIанбы, ишиле доннухбыд къат-къатна джегьилершиле гьеххан аляатIанбы, къуллыхыхъаб тиканхьинне идвийкьананбы, джегьилершиле къел’бы къадчу медын ишбыд гьаъанбы. Гойнеб шас вукканна сакитна ыIмыр. ГьоIкуматын, аIсас йишди республикайн мани сарданын сиясат бадалдехье, сайидкьылыйбы ахвасынбы. Джегьилер чIалагбышеехъа аIл’гьаана са сабабыб шакIле манчее къоджи. Гьайни дёлесийвале мана дагъамийвалла «къалибхьыйни джигеенче» озахъоохьива, инаммышехьи дешор.
Хиваршее, районее, республикее иш девхьайхъа гора йишин, цIаIхбышин джегьилер, Урсиятни шагьарбышеехъа ишлемишивхьес аIл’гьаа вобунбы. Хивар кьаIсинбышис аху, сувабыйий чIалагбыд ваIгьщи гьаIйванаршис. Хивар веранхьамее, миллетна мизиб, маданиятыд аIрайле ааIсынбы. Манбы адкIынмеега миллетыд итбатхьесын.
Анджах закIле къавджес вукканий къуллухбышил’ баджарагъукан, ацIааликван, кIаарни ишбышее къарышмишдевхьайн джегьилер. Джегьилер гьоIкумат гьаIракатеехъа адаччена гудж вобна. Къийна ши манбы хъобкуни йаIххъылхъа гявгьее, ишебашеехъа авъээ, инам гьаъан гьоIкумат къийхъа гьаIракатеехъа хъалесын. Зас ыкканан йишди цIаIхбышди джегьилершед джон зор, джон гьаIракатбы, джон гьунарбы чIакIни къуллухбышил’ гьагуй. Манчилхъа зы инам гьаъан.
АIхреени вахтал’ йишин джегьилера кIылба-кIылба «чичис уIвхийха» гибгъыл’. Манбыше джурабаджур фондбы ачмишаъы. Манчина макьсаб дагъамийвалеехъа гябкIуйни инсанаршис, етимба авхуйни ушахаршис, инвалидаршис кумаг гьувой вобна. Манчиле гъайре , гьар хивни джегьилерше джони хивни аIреедын ишбы гьаъасын фондбы ачмишаъы. ГьаIшде манбы гьаIракатыква ишлемишехьи водунбы. ШакIле къеджен ЦIаIхни хивни джегьилерше ахреени сенбышее хивни аIрайл’ гьаыйн ишбы. ГьамаIгьдын фондбы медни хиваршихъадыд водунбы. ГьаIракатыква Муслагъни, Калельни, Аттални хиваршин джегьилерыб мани ишбышее гьаIракатба вобунбы. Мебни хиваршини джегьилершеб манбышике месала алебтIее югба вухьес.
Йишди фыкрее водун гьайни дёлесийвалее мани хиваршини джегьилершини фондбышин чIакIынбы редакциеехъа хъобтIулый. Ши йишин «НУР» хъаIдаххъанбы манбыше гьаъани хайирыквани ишбышиква танышааъас. Шахъаб лидерар хьинне гьихъа вуIххъан джегьилерыб вобунбы. Мана София Меликова, Ил’гар Наврузов, Саид Маллеев, Севил’ Давудова ва мебынбы. Къийна Софие ООН-ни трибунеенче дюнйейлхъа йишди миллетын до, маданият, дагъамийвалла ашкараъву. Къийна маIнкъее медын-медын проектбы йишди кумагыква гьазираъа водунбы. МаIгьадни джегьилершис кумаг ЦНКА гьели. Манчини садрее Рафаэл’ АIлиеве манбышда иш къулайлхъа абадчи. Чалышмишехьена, миллетыква багълыданан ишбы гьаIракатеехъа адчес. Агар ши гьаIкIебаб гьаIмабни джегьилершис йаIхъ гьувее, манке бел’ки ши улепбы аахъа. ШакIле къеджен гьаIшде гьиджойий соцсетьбыше эхьи. Гивийгъаланбы югни мислягьаIтбышиква, илгъебачIенбы гьыIдчатбышилхъа. Гьаарункъвее джулхъа ёргъан цIыцIааъа. Ихтелет’бы хаIдда, ишбы кIыл’да. Ман карбы джегьилершикIле къаджемее, йикIдена хъоохьи. Миллетни сардан къеджени ишбышди къуллухбышилхъа гогьагьариваликва, тохумбышиква, джибни цIобаликва деш, амма аIкеликва, ацIааликва сечмишааъас вуккан. Шахъаб гьаIкIебаб маIгьбын джегьилер гьар хиваршеенче хъигъебчIуйнбы вобунбы.
