Ноябрьни йицIыдсанчил’ йишди гьIокуматыл’ экономистаршин Йигъ алгъайгьи. ОIлкайн геледжагъ, инсанаршин ешайиш, доланджагъ экономикайке аIслыда водун. Ман хъодкуда ыккыйид экономистаршике аIслыда водун. ЦIаIхбышихъаб гьаргьаммаше мани ишил’ ишлемишоохьен гьаIракатыкван, ацIааликван инсанар вухьа ва къийнаб вобунбы. Къийнийни йишди макьалейна сабабкар доюкана юрист, экономист, бухгалтер Темраз ГьаIджиев ворна. Гайни дёлесийвале ши манкъука вудж ишлемишехьени ташкилатее гаф гьавъу. «Нур» кIазет хъаIдаххъанбы манкъука танышааъа.
ГьаIджиев Темраз Закирна дих Рутул районни ЦIаIхни хивее 1971-ъэсди сенни сентябрьни 28-чил’ маъаIллимни хизанее едике ыхьа. Мана хаIбни нассылеенчена ворна. Манкъуна дидей СаIлигь ГьаIджиев ХаIбни Ватанни даIвъийна ветеран ыхьа, хъийгъа хивееъар хаIдда гагьна къуллухбышил’ ишлемишхьа. Темразна декир, Закир маъаIллимыр, районе, республике доюкана таарыхын дарсбы гьелена маъаIллим ворна. ХаIдда сенбына ЦIаIхни мактабна директор ыхьа, больнице фельдшерна ишлемишхьа. Мана ДР-на лайикьыквана маъаIллим ворна, РФ-ни Президентыни Грантна саIгьыб. Закир маъаллимее джун энки югын гьаIракатбы, хасиятбы , хъодкуйн тербие джуни ушахаршилхъа хъуво. Манкъвее джуни хьунащейква — Гул’дене халайква саджигее хьебыйре дих, хьебыйре йиш чIакIы хъавъу. Манбышди гыргынкъус ааIли хъаIдхъий гьувы, эвлемишавъу. ГьаIшде манбы хизанбышин ессибы вобунбы. Закир маъаIллимна хизан хивее, районее чечнайс къийнаб гыргынкъвее гивийххьи . Темраз хизанее эн хааIрна дих манбышда ворна. Манкъвеейид хизанын югун аIдатбы гьуваджи водунбы. Т. ГьаIджиеве йыIкьнекин мактаб 1988 сен ЦIаIхее таамау. Ман таамауйле хъийгъа, сабара гьагьна кIалхоз «Правде» пеше гьавъу. 1989-1991 сенбышее Ватаныс эскерын бордж хъувы. Манкъуна эскерийвалла цIебба МаскIавни вилаятыл’, гойне Беларусие илгъевчIу. Ватанни оIгеедын бордж хъувы хъарыйле хъийгъа , 1991-1993 сенбышее Темраз ГьаIджиев районни йаIхъбы гьаъани ташкилатее фегьлена ишлемишхьа. Манкъвее гьамбазаршиква саджигее ганз хъахы, поштина йаIхъ ЦIаIхеехъа аIккяаIна хылеква гьавъу. Манчин заIгьматна кьадир ваацIавхьавъу. 1993 сен мана МаIгьачкъалее Институт управления и права хъаIдхъаIс заочныра иккечIу. Ман аали мактаб 1997-ъэсди сен таамау, юрист-экономистын санаъаIт алеетIу. Мааъад зочныда хъаIдаххъани вахтал’ , Темраз ишдена гюъур деш. Мани сенбышее Т. ГьаIджиев ЦIаIхни йыIкьнекни мактабее пионервожатыйна ишлемишхьа. Эвлемишхьайле хъийгъа , мана кочмышхьана МаIгьачкъалеехъа. 1989 сенни мартни вуза АКБ «Агропромстройбанке» юристни къуллухыл’ ишлемишехьи гиргъыл’. Мааъад манкъвее ишин хаIдын къулай алеетIу. 2004 –ъэсди сен мана бадалхьана МКБ «Каздаг Интернешиналеехъа». Манчини допофисе кассирна ишлемишехьи гиргъыл’. Гьаманиджар сен мана илгъечIуна бухгалтер-операционистни къуллухылхъа вукIлел’ни банкIеехъа. Гьамани джар сен мани банкына кассирна къуллых гьааъа гиргъыл’. 2011-ъэсди сен мани банкын до бадалаыйн ОО КБ «Внешфинбанк». 2014 сен аIрза обкIун мани ишиле хъигъечIуна. Мани сенбышди аIрее Т. ГьаIджиеве банкбышди ишин къурлыш быкырда илгъечIуйн. Темраз ишлемишхьес медни банкбышеехъа хъойтIал гиргъыл’. Анджах манкъвее санаъаIт бадалауйн. 2014 сенни февральни вуза мана хъортIул’на ишлемишхьес Ассоциацие СРО « СК-АСПО». Мааъар мана хааIрни бухгалтерни къуллыхылхъа гиххьы. Манкъун гьаIракатбы , ацIаал’, инсанаршиква ишлемишхьес аIхий къадже, 2018 сен Темраз Закирна дих гиххьына мани хаIдни ташкилатни генеральный директорна маIъвынна. Гыргын пылбышикван гьаIхъысаббы манкъулхъа ыIгьтибарау. Къийна, гендиректор ишил’ дешданкъаI, манкъвее манкъуна иш гьааъа, магьаIд манкъулхъан хаIдын ыIгьтибар гьагва. Т. ГьаIджиеве эйгьен ; « Зы гьайни дераджайлхъа, къуллыхылхъа гьирхьылий УIмаров АIриф УIмарни дихыква багълыда водун. Манкъве зас хаIдын кумаг , ишин къулай, инсанаршиква хъоркура юшенаъас хаIрхъау. Манкъуна заIгьмат заке мысаджаб кIеливханас деш. Къийнаб зы сабара ишбышее манкъука мислягьаIт гьааъа. …»Йишди суалыс « Гъу ишлемишехьени ташкилатын гьиджо ишбыне гьаъа?», манкъвее джаваб хъувы: « Ши проектный институтбышин ишбы ёхламишаъа. Бинаабы аляъассе гьихъа, ваяхуд тиклийка багълыданан ишбы гьаъассе йишди ташкилатын манчин документбы ёхламишаъа. Манчиле хъийгъа ишбы гигъалас иджаза гьели. Хъобкуба иш гьидяаъани ташкилатбышида иш судеехъа хъооли. ДжитIада , вукIкл’ сугъооцаъасда вахт воохьи деш. 3 — 4 сен водун зы отпускеехъа хъигъдечIен…..»Манчихъа ил’дяакы, Темраз ГьаIджиев джуни хивыс, миллетис джан гийхьена инсан ворна. Югни- писди йигъбышыл’ мана джуни джамаъаIтыква эхьи. Джуке аIхан кумаг гьаъан. Ватан кIеливханааъа деш. Сенее са-кьоIни елейс Сувал’ни маIгьалылхъа гьайкIанна. Мана гьар сен йишин «Нур» кIазет ойкIананбышда ва хъаIдаххъанбышда са ворна. Т.ГьаIджиевыхъаб маIърафаты квана хизан вобна. Джуни хьунащейква, Бестийка, саджигее са гадейий са ичий тербиейква чIакIы хъааъа. Дих АIрзуманее эскерна къуллух гьааъа . Йиш Анжеле мактабее хъаIдаххъа.«Нур» кIазетни редакциейн Темраз ГьаIджиевыс джанана сагъвалла, хизаныс баракат аIрзуламишааъа. Джуни дойиле гыргын цIаIхбышин экономистар пешейни Йигъыква табрикааъа.
