Дюнйейлхъа коронавирусна чIырвалла еймишивхьайн са сений сура ыхьа. Манчин сив Китайле гидгъыл. Сабара вахтале дюнйейни гыргыни диярбышилхъа COVID-19 еймишивхьа. ГьаIшде маIгьдын оIлка дешин, мани чIырвалин баляа иттябыйн. Манчин оIги къацIакIванасдимее гыргын гьоIкуматбы пандемиейс эксина ишлемишхьес ыккан. Кьабыляъан кьарарбы, къеджен чIырвалис эксина ишбы сана-санбышиква мислягьаIт гьавъу къаджес ыккан.
ЦIеббыйна манчикена дарман темизийвалла гьувааджий, дохтурарше увгьойн кар гьаый вобна. АаIлимаршини увгьойка, манчин оIги садджу дюнйейл’ ешемишоохьени 60 фааиз инсанаршис вакцина гьавъуйле хъийгъа даянмишхьес. Манчихъа гора медицинайни ыIлимын марказбы вакцина гьааъа гибгъыл. Къийнийни йигъылхъассе Россияйл’ мани чIырваликена 3 джура вакцинайна гьазиравъу вобна. Мани хьебынчин сана ёхлама илгъечIуйн, натийджабы тасдикьауйнбы. Россиейл’ гьазирауйн вакцинабы, хаIдданани экспертбышди увгьойка, эн югунбы, джанас зиян гьиделенбы гьыIсабехьи. ХаIдданан оIлкабы йишда вакцина джони халкьыс уIвхасва мислягьаIтеехъа хъады. Россияйл’ инсанаршис вакцина гьааъа гибгъыл вобунбы. Иммунитет ихьесди меега , мана кьоIни элейс гьааъас вуккан. ЦIедда вейбар эскераршис, гьоIкуматни ишбышил’ ишлемишоохьени инсанаршис гьааъа гибгъыл вобунбы. Гьаарна инсан джуни джанана саIгьыб ворна. Федарал кьаануныква, вакцина инсанарше джони гьавасыква гьааъас вуккан, няъас увгье ман джанани сагъламийвалике аIслыданан кар водун. Йизди увгьойка, агар джанахъад эксинан гьагуйбы дешхьее, вейбар ыIхас ыккананбы. Манчин гъу джар деш чIырвалике къорамишаъас, ва гьихъийалланбыб къорамишааъас. Вакцина гьавъуйнбышди увгьойква, джони джанее чIакIын бадалхьайбы ыхьа деш. Веебар джанан раIгьатда ооIдху. Сабаранбыше эйгьен, кьоIдле –хьебыдле йигъна джан кефдена ыхьа, гойне гыргын джигайлхъа хьадыйн. Дохтураршини увгьойква, маIгьабна тав, гьаIл джанан мункум вобна бадалааъас. Анджах манчин джанас хата гьелес деш. Дагъыстанейид, медни Россиейни субъектбышил’ хьинне, мана вакцинациейна компание гуджнаква аIлгьаа вобна. Аллагье гыргынкъус джанана сагъвалла гьевлена!
