Гьар миллетыкIле джон таарых ацIахьес ыккан. Таарых дяцIани миллетыхъад геледжагъыд дешин. Инсанаршин бордж водун архайле – архайлхъа таарых хъувой.
Ватаныс ыIмыр гьувойн инсанар йикIелхъалявъуй. ХаIбна Ватанна даIвъий таамувхьайн 76 сен быкырхьа, анджах манчин уцIырбы, ярабы гьаIшдед мейид водунбы. Манке къара хабар хъидябыйн хав йишди гьоIкуматыл’ аху деш. Ватан душманаршике къорамишааъас садджу ЦIаIхни дерайле йихьыдваIщеле агъаллана инсан аркIын. Манбышин хаIббананбы сабкIыл деш, гагьамбы батмишеебхьа абкIын, гьагьамбы яраламишивхьа хъабы. Къийна шахъар сагъра ахуна ветеран дешда. Манбышда игитийвалла йикIел’ гьувааджесдимее, гьар хивее ХаIбни Ватанни даIвъийни ветеранаршис къабсырна гьаIйкал гивхьы. Гьайни сен майни вуза Рутул районни марказее хаIбна абида ачмишавъу. Мааъад районеенче даIвъийехъа абкIынийни ветеранаршин, мрамор плитабышиххъа къизлени гьаIрфбышиква, добы, нении хивеенченайий одкIун. Гьел’бедти, мункум вобна кIеливханавъуйнбыб вухьес. Манчихъа ил’дяакы, мана хаIдын едигарысын аманат водун. Йишди увгьойква, югда ихьес, агар гьар хивее маIгьдын гьаIйкалбы гиххье.Ман ишбы ЦIаIхее, Мишлеше гидгъыл водунбы. Зы манчини гьаIкее Мишлешни администрациейни хааIрункъуква Рамазан Къубалыевыква телефонеенче юшенхьа. Манкъвее шас, йишди аIдатейдын хъидгIынбы гьауйле хъийгъа, гьаIйнягьабна хабар гьувы :- ХаIбни Ватанни даIвъийе иштрак гьауйни Мишлешни хивни ветеранаршис къабсырна гьаIйкал йиссейни хивни майдама илёбзур вобна. Гьайни сен Мишлешни хивни администрациейн хивни джамаъаIтыква, районни регьбераршиква мислягьаIт гьавъуна мана тезелемишааъас. Районни хааIрунквее Ибрагьим Ибрагьимове йишда мислягьаIт кьабылявъуна. Ман гьаIйкал Мишлешни администрациейни хазнеенче тезелемишааъа вобна. Спонсорар ваяхуд къирагъыле кумакг гьелен инсанар дешинбы.Йишди ниятее водун, мана июнни 24-чилхъассе таамаъас ва ярашугъыква ачухааъас. Анджах гёгъыйбыше шас иш вуккейс пIланыква гьавайсар деш. Къийна ишбы гуджнада аIл’гьаа водунбы. ГьаIйкал хъааъас азымын гыргын кар хъады водун. Манчее дагъамийвалла дешда. ГьаIйкал тезелемишааъана устад ДжумаIев Ризван ДжуIмайна дих, фегьлер Эмирджанов ЫIбадуллагь МаIгьаммадна дих вобунбы. Манбы эн оIгма, эн къулайква, кьуфыква иш гьааъан « къизлен хылеббынан» устадар вобунбы. Шаца манбыше , каджарыле гибгъыл чардахылхъамее, Хивын маданиятын хав (клуб) тезелемишау. Ман клуб хивын ярашугъ водун. Садджу утагъна аIкьвалла 10 м. хиллийваллаб 20м. вобна. Джил’, хъурк’, барубы, чардах гыргын тезелемишауйн. ГьаIшде мааъад архайнда даватбы, маджлисбы, тамашебы, конкурсбы, иджласбы алгъагьас ихьесынбы. Ман Хивын маданиятын хав тезелемишаъанкъаI, устадаршини дестее Софиев Шамил’ Маллайна дих ыхьа. Зы манбышди ишиле гейр разийра аху, манчихъа гора гьайни сен гьаIйкал тезелемишааъасыб манбышилхъа ыIтибаравъу. Мед зы эйгьен, ман гыргын ишбы администрациейни хазнеенче (бюджетенче) гьау. Мааъаб не фондбышда, не ишкарашина маныт пылна дешда.Ин ша Аллагь манбы ачухаъанкъаI шунаб хъоотIаласынбы.
