2025 сенни мартыни йицIыйгIанчил’ доюкани ааIлимыс Ибрагьимов Гьаруныс Халилни духайс ваIш сенний быкырхьес. Мана хил’дже сенбына гьихъа раIгьматыххъа аркIын. Манкъвее цIаIхбышди таарыхе хаIбна мирас гьабсыр. Манкъвее кириллни хатIыл’ ааIлим Небий ЫIсаевыква саджигее йишди миллетыс адабиятни мизена алфавит къурмишавъу. Манчиква хъийгъа мактаббышисын китаббы, шечIбы, прозайн асарбы, методикайн пособиебы, «Нур» кIазет, журнал «Лачин» ойкIан гидгъыл. Сен-сениле манбы хъодкуйни усулбышилхъа хъады. Гьел’бедти, мани карее хаIббанана заIгьмат Гьарун маъаIллимна вобна. Ши чалышмишоохьенбы манкъун гьаIракатбы гьуваджес ва артымишаъас.
Гь. Ибрагьимове хаIдын из кавказни мизяршини ыIлиме, адабияте , таарыхе гьадсыр. Манкъуни мактабын хаIбба мизен ааIлимар гьазиравъу.
Къийнаб манкъуна гьуIрмат гьувааджы джуни телябабыше, ишни гьамбазарше апрельни 23-24-чил’ Дагъыстанни девлет педагожи университете 100 сенийни юбилейис къадсырыйн ыIлимын конференцие алгъавгьу. Мани конференциехъа къаховыйни ыIлимни макьалебышикван « Алеф» чапханее китаб « Актуальные проблемы общего и дагестанского языкознания» къайиккы. Манчеехъа 100 агъаллана дараджайквани Дагъыстанни , Россиейни, хаариджий оIлкабышди ааIлимаршин макьалебы гядкIу.
Гьарун Халилни духайс къадсырыйн китаб, джуни телябайни, ааIлимни М. И. МагьаIгьаммадовни макьалейква: «Видный учёный и педагог» гийгъал водун. Мани макьалее М. МагьаIммадове Гьарун маъаIллимни ыIмрени, гьавъуйни ыIлимни ишни гьаIкIеедын аIтрафлы маIълумат гьели водун. Шинаб, джун телябабы, мани ишее къирагъыл’ илёбзур деш. Мани китабеехъа хьейибле макьале гьуво водунбы. Манбыд цIаIхни мизени ва цIаIхни адабиятыква багълыдананбы водунбы.