Гьар сен ЦIаIхни дерайл’ни мактаббышее ва Бабаюртни цIаIхбышди бинабышил’ни мактаббышее доюквани Кавказни ааIлимни Ибрагьимов Гьарун Халилни духайни едигарыс къадсырыйн едини мизекен ва адабиятыкен конкурс алгъайгьи.

Гь. Ибрагьимове цIаIхбышди таарыхе кIорана гов гьабсыр. Манъуни заIгьматыква мед цIаIхын миллет гьаIракатехъа хъады. ХХ асырни аIхрее манкъвее цIаIхни мизес кирилни хатIыл’ алифба обкIун. Мактаббышисын киттаббы одкIун, программабы къурмишаъы ва цIаIхни мизен лугъат (словарь) мебни ааIлимаршиква саджигее одкIун. Манчиле гъайре, мана хаIдданани цIаIхни мизеква, адабиятыква, фольклорыква, таарыхыква багълыданани ишбышил’ вукIлел’на илёрзул’. Профессор Гьарун Ибрагьимове Дагъыстанни девлет педагожи университете цIаIхни мизекен ва адабиятыкен ацIааликван, билигыкван санаъаIткарар гьазиравъу. Къийна манкъуни телябабыше вуджее гибгъылна иш вобна артымишааъа.
Гьарун маъаIллиме «Нур» кIазет, радио-теле верлишбы ачмишаъанкъаI хаIдын заIгьматбы гьаъы. Манчихъа гора, мана лайикьра ворна миллетни таарыхе югни джувабыква йикIел’хъаляъас ва манкъуни едигарыс къадсырыйн конференциебы, маджлисбы, олимпиадабы, джурабаджур конкурсбы алгъавгьуй йишин бордж водун.
Эле майни йигIынчил’ Мишлешни хивни йыIкьнекни мактабее алгъавгьуйн конкурс мани хыллийни зинджирна са гьаIлкьа вобна. Конкурсна метлеб вухьана едини мизелхъа ва адабиятылхъа фыкыр гьувой ва мана гьувааджес, гьаIракатеехъа абчес чалышмишивхьай.
Конкурс «Нур» кIазетни редакциейн къурмишаъы ва мааъад конкурсын тапширыгъбы гьазираъы. Ман алгъагьасын харджийбы ааIлимни духее Александр Ибрагьимове джулхъа алетIу.
Гьихъани сенбышее ши конкурсе аIсас ушахаршин юшенаъани ва оокIанни мизекен ацIаал’бы ёхламишаъы. Дагъайдни сыныфбышди шыгыртарше едини мизел’ цIаIхбышди шааираршин шечIбы йикIеке хъаIдхъы, китабеенче дурустда текстбы хъаIдхъы.
Алидни сыныфбышди шыгыртарше цIаIхни мизени грамматикайкен тапширыгъбы гьаIллаъы, изложение ва сочинение одкIун. Мишлешни мактабни ва конкурсеехъа абыйни маъаIллимаршед едини мизелин диктантний ойкIан.
Гьайни сенийни конкурсын формат ши бадалаыйн, няъас увгьее са вазна оIгее гьиняа едини мизекен ва адабиятыкен федерал олимпиада илгъечIу.
Манчихъа гора, ши конкурсын номинациебы бадалаъыйнбы. Дагъайдни сыныфбыше шечIбы хъаIдхъы, алидни сыныфбышди шыгыртарше йишди миллетын йиссейн аIдатбы, палтар, маIънийбы, хорагбы тамашейс гьагу ва Мишлешни хивни маданиятни марказни регьбере Мустафа чодже музейни дезгагьбышин (экспонатбышин) добы ва манбы няайий ишлемишаъа шыгыртаршике хъидгIыныъы.
Конкурсе иштыракаъас Гыл’мецIни, ЦIаIхни, Муслагъни, Мишлешни, ДжинаIгъни мактаббышин ушахар джони директораршиквайий завучаршиква абы. Тадбыре иштыракаъас абыйн мигьманар, мактаббышин ушахар накьра-зурнайни авазыква Мишлешни маданиятни марказни ишчерше клубни дарвазабышисане къаршламишавъу.
Гьайни сенийн ааIлимни едигарыс къадсырыйн конкурс Мишлешни хивни клубе илгъечIу. Маджлис гивгъалассе гньихъа жюрий сечмишаъы ва манче гьаар мактабыкена са маъаIллим ыхьа.
Конкурсеехъа сабыйнбышди гьийд чыхыш «Нур» кIазетни хааIрни редакторе Байрам АIбдуллаеве гьаъы. Манкъвее конкурсни гьаIкIеедын маIълумат гьуво, шаваайий конкурсыс хыл’авхъу ва гьиджо пайбыйий гьелес гъамебхьайнбышис увгьо.
«Нур» казетни шоIъбайни редакторе Кьурбан Омаханове конкурсеехъа сабыйнбы къайдабышиква ва тапширыгъбышиква танышавъу.
Саламыква къаршламишаъан чыхышбы Мишлешни мактабни директоре Элескер Лачинове ва цIаIхни мизелин дарсыбы гьелени маIъаллиме Мина Ибрагьимовае гьаъы.
Манчиле хъийгъа конкурсна иш гибгъыл. ЦIедда жюрийн дагъайдни сыныфбышди шыгыртаршихъа кIыры гяххъы. Манбышди гьаарункъве джурайба кьиймат ушахаршис гьуво. Жюрийни уIзвыбышихъад джони мактабни шыгыртаршис кьиймат гьевлес иджааза ыхьа деш.
Ушахаршин джаваббы ёхламишаыйле хъийгъа, манбышди аIреенче 1, 2, 3 джигабы аххъыйн ушахар къаIвуххы.
Гьайни сен алидни сыныфбышди шыгыртаршин баIстбы мактаббышди аIрее илгъечIу, йаIъни гъамувхьайн джигабы мактаббышис гьуво. Гьайни сен ман конкурс эксперимент хьинне илгъечIу.
Анджах ши гозетяъан гьаIракатбы, натийджабы, ацIаал’бы шакIле къадже деш. Манчини меега югбаний гьазиребхьес вуккан. Инам гьаъан, геледжагъыл’ маIгьдын саIгьфбы къайиккас деш. Манчихъа ил’дяакы, конкурс илгъечIуйн. Едини мизени, адабиятни, маданиятни, фольклорни маджлисыле тамаше гьааъас ДР-ни джамаъаIтни палатайна уIзвы Сабир Сайдумов, Дагъыстанни агъсаххъаларшини Советна йишди миллетыкена эл’чий Айдын Бабаев, ЦIаIхни дерайни ветеранаршини ташкилатна садры НезирмагьаIммад АIгьмадов абы.
Жюрийн гыргыни абыйни ушахаршин тапширыгъбы ёхламишаыйле хъийгъа, мислягьаIтеехъа хъабыйнбы конкурсе гъамувхьайни шыгыртаршис, мактаббышис ва цIаIхна миз ва адабият вуккеккани маIъаллимаршис дипломбы, грамотабы, миннатдарийвалла агъмишааъан кагъызбы, китаббы ва пылыкван конвертбы гьелес.
Дагъайдни сыныфбыше 1-2 джига Мишлешни йыIкьнекни мактабни шыгыртарше авхъу, 3 джига ДжинаIгъни мактабни шыгырте авхъу. Манбышис грамотабы гьуво ва «Нур» дойикван долчебы (кружки). Иштыракаъыйни гыргыни ушахаршис ва джони маъаIллимаршис миннатдарийвалла агъмишааъан кагъызбы гьуво.
Алидни сыныфбышее илгъечIуйни конкурсе 1 джига Мишлешни йыIкьнекни мактабын авхъу. Манбышис 1 дараджайна диплом в 5 аазыр пылна гьуво. 2 джига ЦIаIхни ва Муслагъни йыIкьнекни мактаббыше авхъу. Манбышис 2 дараджайна диплом ва гьаарынчис 4 аазыр пылна гьуво. 3 джигаб Гыл’мецIни ва ДжинаIгъни мактаббыше авхъу. Манбышис 3 дараджайна диплом ва гьаарынчис 3 аазыр пылна гьуво.
Грамотабы, миннатдарийвалла агъмишааъан кагъызбы, дипломбы, пылыкван конвертбы ушахаршис ва маъаIллимаршис А. Бабаеве, Н. АIгьмадове, С. Сайдумове, Б. АIбдуллаеве гьуво.
Манчиле хъийгъа, къирагъыле абыйни мактаббышди ушахаршис хораг гьуво, едигарыс саджигеедын шикыл’бы цIыцIаъы ва манбы ёласалмишавъу. Манчиква конкурсна иш таамувхьана.