Къийна Россиейни джурабаджура джигабышейнче СВО воохьени эскераршис гуманитарный кумаг йаIххъыл’ гьаъан югун аIдат водон. Мани карее чIакIни ташкилатбышиква, шагьарбышиква саджигее макатабни шыгыртаршед хаIдын иштыракаъа. Манчиле гъайре, ушахарше эскераршис «Эскерилхъан кагъыз» донани акциейид манбы кIеливханаъа деш.
Гьайни делёсвалей МагьаIчкъалайни шагьарее 54№ мактабни маъаIллимаршини коллективын ушахаршиква саджигей СВО гуманитар юк сау. Мани карее манбышис хаIдын кумаг Дагъыстанни «Лезгинка» мыкIаар гьаъани дестейн, манчина директор Джамбулат МагьаIммадове гьуво. Манбыше йаIххъыл’ гьауйн кумаг эскераршисхъа мактабни директоре Сапижат Мазаевае гьихьарау. СВО воохьени эскерарше джо аIрсей гьавъуйхъа гора, мани каре иштыракааъанбышис миннатдарийвалла агъмишавъу.
Эскерар гыргынчиле хаIбба ушахаршиле хъадыйни кагъызбышиле шадейбхьа. Кагъыз одкIунийнбышди аIрайл’ 54 № йыIкьнекни мактабни цIеррыйни сыныфна шыгырт Джелилов Абубакарыр ыхьана. Манкъве джуни кагъызее къийна СВО воохьени эскераршис йикIейнчен кал’мабы увгьо. Манкъун кагъыз командире хъаIдхъы: «Салам аIллейкум, гыранна эскер. Йизын до Абубакар водон. Зы МагьаIчкъала шагьарни Семендерни къасабее ешемишехьи. 54№ йыIкьнекни мактабни цIеддыйни сыныфее хъаIдаххъа. ЗакIле ацIа деш зы одкIунийн кагъыз шавулхъае гьихьарас. Амма манчихъа ил’дяакы, шос сагъулва эгьес ыккан. Шу йишда хаIбна Ватан душманаршике къорамишааъа. Йишин къалебкIый, хъаIдхъый, геледжагъ югун хъалесдимее шу хаIбна иш вуккекка. Шохъад водни дагъамийвал’бышихъа ил’дяакы, йишин диндж гьуваджес чалышмишоохьи. Вас , аIзизна эскер, диджина ыIмыр, кьел-хылис такьат, угъурбы аIрзаъа. Манче сагъра-саламатра хъалес кьисматхьена. Саламатра ахвана. Кагъыз хъаIдхъыйле хъийгъа, залхъа салам къахивле».
Эскерарше Абубакарылхъа салам къаховуйн видео хъигъечIыйле хъийгъа, зы манкъуни деккикайий джукван алакьа аххъы. Абубакарна кок ЦIаIхни хивейнчена вобна. Манкъуни увгьойка, эскераршилхъан кагъыз вудже мактабее одкIун. Кагъыз СВО воохьени эскераршилхъа гьидхьыр, манбыше хъадаххъаI къаджейнкъаI, зы шадхьана. Зы геледжагъылид манбышис кагъызбы окIанасынбыва манкъве заквасана гьавъуйни ихтелте увгьойн.
Къийна Абубакар цIеддыйни сыныфее хъаIдхъейид, мана менни ишбышейир дирибашра ворна. Манкъве хъаIдхъыйка саджигее, мактабее алгъайгьени гыргыни йигъынджахбышее, тадбирбышее иштыракаъан. Югда хъаIдаххъава, маъаIллимарше Абубакарын до гьаммаше югни сураке агъмишаъа. Эскераршис кагъыз оIтирауйле хъийгъа, Абубакарын гьамбазар сыкIылбаб хаIбхъувхьа. Шинад кIыл’ни Абубакарыс югун хъаIдхъый, джанана сагъвалла, угъурбы аIрзаъа!
