МаIгьачкъалэй Афганистаныле советын къошунбы хъыгъавгьуйни 36 сенийс къадсырыйн едигарын акцие илгъечIу. Мааъад афганни гьаIдисабышди иштыракчерше, къуллухчерше, джегьилерше иштыракау.
Акциее чыхышаъанкъаI Дагъыстанни вице-премьере АIбдураIгьман Магьмудове советни эскераршини игитийваллайни гьаIкIеена едигар гьуваджий ваджибба вухьай къейдавъу. Манкъуни джуваббышихъа гора, Афганистаныл’ эскерарше йаIгь-ламысыка Ватанна амыр быкыравъу ва лайикьыква интернационал бордж хъуво. Афганни гьаIдисабышди иштыракчершина игитийвалла йыIкьале хъооIни насылбышис югун дарс водун. Къийна ши ваIкIагьийваликва джон бордж хъелени эскераршини гьийб вукIул’ кIёозараъа, — Магьмудове агъмишау.
Афганистанни ветеранаршини ташкилатни садрее Нажмудин Акаеве майни 9-чил илгъечIесди «Бессмертный полк» акциее иштыракаъас гыргынбы хъобтIул. Манкъуни увгьойка, ХаIбни Ватанни даIвъийе джон ыIмырбы гьувойнбышда гьоIрмат авхъуй йишин бордж водун.
ЙикIел’хъаляъанки, Афганни даIвъийе хьебни аазырыле агъаллани дагъыстанныбыше иштыракау. Манбышике 141инсан оIлкайн гунайлин сергьатбы къорамишаъанкъаI гьалакувхьа. 600 эскерар орденбышис ва медалбышис лайикьба къавджу. АIбас Исрафиловыс ва НуIгьидин ГьаIджиевыс КьаIгьраманын до гьуво.
Афганни даIвъийе йишди миллетни эл’чершед гьаракатукан иштыракау. Эгьес эйхьи, йишди гьарни хивеенчени джегьилерше Ватаныле аIкьанаба аIл’гььани даIвъийе хаIбна игитийвалла ва джомардийвалла гьаагу. Манбышди гьаракатбышис гьоIкуматын ахтыйн наградабы гьуво. ГьаIйифки, манбышди аIрее раIгьматыххъа абкIынийнбыб вухьайнбы. Мишлешелий ГьаIзратаIлий ГьаIйдарове Афганистаныл’ 1984 сенни августыле къуллухааъа вухьа. Мана 1985 сенни июлни 31-чил афганни душманаршиквани вурушбышди санчее гьалакхьана. ХъикIуйнчиле хъийгъа ЧIаIрани ХаIнейн орден гьуво.
Закатала районеени цIаIхбышди Кьасни хивеенчена Муса Мусаев Афганистанхъа 1985 сенни майни вуза хъары. Взводни командирыс, лейтенант М. Мусаевыс манче хаахъа са элейсын кагъыз окIанас кьисматхьа. Майни 22-чил манкъуна ыIмыр душманни гуллейн явашавъу. ХъикIуйнчиле хъийгъа ЧIаIрани ХаIнейни орденыс лайикьра къаджы.
Афганистаныл’ гьабтIыйни эскераршини гьайкални гьихъа тIетI’бы гиххьыйле хъийгъа, акциейни иштыракчерше Гъамувхьайн Байдах ачмишау.
Афганни гьаIдисабышис къадсырыйн тадбирбы республикайни гыргынанкъаI илгъечIу. Хусусан, Рутул районни Гыл’мецIни йыIкьнекни мактабни маIъаллиме Аслан Давудове манчика алакьанан дарс алгъавгьу. Манчеехъа Афганни даIвъийна ветеран Исрафил Исрафилов хъортIул. Манкъве мааъад къаджейнчике, советни эскераршини игитийвал’ни гьаIкIеена хабаравъу. Хъийгъа шыгыртаршини суалбышис джаваббы хъуво.
ГьаIмагьдын джад горуш Муслагъни мактабе илгъечIу. Мани горушеехъа Афганистаныл’ эскерийвалла гьавъуна Джелил’ Наврузов ва СВО иштыракчий ХанмаIгьаммад МаIгьаррамов хъобтIул. Манбыше ушахаршис даIвъийе джо вухьайни гьаIдисабышда хабаравъу. Гойне шыгыртаршис марахлыдани суалбышис джаваббы хъуво.
