Январьни 22-чил’ Республикайни миллетбышди китабхане агъул миллетна доюквана лингвистын, язычийн, тарджумачийн, журналистын ГьаIджий Алхасовын тезеда чапыке хъигъечIуйн «Инаугурация» ва «Саруфан суван эл» китаббышин презентация илгъечIу. Манчис къадсырни йигъынджагъе аалIимарше, ыIлымни ишчерше, язычерше ва журналистарше иштыракаъы. Йигъынджах филологиейни ыIлымбышди докторе, профессоре АIлисултан АIлисултанове ыккы.
Манкъвее махъа сабыйнбышис хошгел’дий гьавъуйле хъийгъа , увгьойн: «ГьаIджий Алхасовее аIхыреени сенбыше хаIдда марахыкван китаббы къайиккы. Манчин сиягьый хаIдын ыхьейид, сабаранчин добы агъмишаъасынбы. Манбы : «Дагъыстанни йиссейни таарыхни добышин свод», «Дулдуг хивни таарихын очерк», «Дагъыстанни хиваршин этимологиейн добы» ва сабар медынбы. Китаббы гьам урусни, гьамыд агъулни мизаршил’ чапейнче хъигъечIуйнбы водунбы. Гь .Алхасове мани китаббыше хаIдда агъул ва дагъыстанни миллетбышди таарихыква багълыданан мисаалабы ашкарааъа. Манчихъа гора, китаббышди авторни одкIунийбышис инсанарше хьаIбна кьиймат гьооли. Манбы хаIнни гьавасыква хъаIдаххъа. Къийна манкъвее ши «Инаугурация» ва агъулни мизел’ одкIунийн «Саруфан суван эл» китаббшиква шадааъа».
Гойне хьинне АI.АIлисултанове джуваб китаббышди авторыс ГьаIджий Алхасовыс гьуво. Манкъве джуни ихтелете тезе китаббышди презентациейхъа сабыйнбыши хошгел’дий гьавъуйле хъийгъа, увгьойн: «Зы йизди йиссейни ва тезе китаббыше хаIдда марахукван материалбы гьуво водунбы. Манчини аIрайл’ ахтына джига агъул миллетни поэзиейн авхъааххъа. Киатаббыше одкIунни шечIбыше, зы йишда къийнийна йигъ гьагвас чалышмишхьа. Манбы зас дёлесни Агъул районын хивар, манчина табийят, республикайни чIакIни шагьарбышей ешемишоохьени инсанаршин доланаджагъ ва сабара медынбы водунбы. Мумкум вобна, китаббы хъаIдаххъанбышис йизда поэзия дагъамба вухьес,а мма гьар са китабее гьувойни шечIихъаб хаIбна маIъна вобна. Гойне хьинне Гь. Алхасовее гьайни сен назарее аххъыйни ишбышикед махъа сабыйнбышис хабар гьавъуна. Авторни увгьойка, гьайни сен тезе кьоIдлле китаб чапейнче къайиккас гьаIзирехьи. Манбы сенани аIхырейхъассе одкIун таамаъасынбы.
Мани йигъыл’ презентациейхъа сабыйнбышди аIрайл’ мебынбышед чыхышбы гьаъыйнбы. Манбы филологие ыIлимбышда кандадат Нариман Исрафилове, шааир Эл’мира АIшурбекова, филологие ыIлымбышда доктор, профессор Салминат ГьаIсанова, ДР-ни ХМ-на депутат Зул’гимар Таигьибова, композитор ШаIфий Ибрагьимов ва сабара мебынбы вухьа. Манбышди гыргынбыше ГьаIджи Алхасовни одкIунийнбышис ахтына кьиймат гьуво.
Дагъыстан девлет университетни телебабыше ГьаIджи Алхасове одкIунийн шечIбы хъаIдхъы. Халкьна артист Яхъя Исакове ва Анисат Кьурбановае йигъынджагъейхъа сабыйнбышис агъулни мизел’ маIънийбы гьекIу.
