Гьайни йигъбышее республикайн тентенейква Дагъыстанни халкьни шааирын СтIал Силейманын 155 сенийн юбилей алгъайгьи водун.
Лезгибышда халкьна шааир СтIал Силейман аазырий молидваIще йихьцIале ючIуIдъэсди сен Кюринни округни, гьаIшде СтIал Силейманын район, Дагъайбни СтIални хивее едике ыхьа. КIыл’рананкъаI мана етимра аху ва манкъукIле дагъамни заIгьматна кьадир ушахийвале джаб ваацIоохьи гибгъыл. Ешайишисын къазындж гьаийниме, мана джурбаджурайни ишбышил’ оIлкайни хаIдданани диярбышил’ ишлемишхьа.
Джуни ыIмырни вахтни гьаIкIее шааире юшенаъанкъаI, увгьойн: залхъа хъадыйнбы, закIле къаджейнбы садджу ОорункъукIле ацIа. ЙицIыйхьад сенна дидаргунна ыхьайнчиле хъийгъа, хьебцIал’ни ешеена Силейман юрдулхъа Дагъыстанэйхъа саркIыл’. Сабара гагьыле даватбы гьау хизан къурмишавъу, кIыл’ра-кIыл’ра ешайишни къулайлхъа хъооI гиргъыл. Мед манкъве дагъамни заIгьматука, оIгийл’хьинне, гынейсын пыл къазанмишаъа ыхьа. МаIгьадни шарааитбышил’ ешемишхьайни шааирыкIле аIдалатыйвалла гьиджо кар ыхьай экIдаджад ацIахьайн.
СтIал Силеймане джегьилийвале шечIбы ойкIан гиргъыл. Манкъуна творчествайна йаIхъ «Бул’бул’» маIънийн ачмишавъу. Шааирни «Аазад» шечIын манкъуни поэзиее йыIкьнекна джига авхъу. Силеймане хивни джаIмаъатука саджигее деникинцаршиле эксинани усйане иштыракау, хъийгъа кIаналбы, йаIхъбы аляъани ишбышее хаIбна заIгьмат гьавъу.
Къадъэсди асырни хьебцIалесди сенее СтIал Силейманын шечIбы республикайни кIазетбышее, оIгийл’ лезги мизел’, хъийгъад урусни мизел’ хъыгъааI гидгъыл. 1934 сенее манкъун лезги мизел’ цIеддыйн шечIбышикван китаб хъигъечIу. Гьаманиджар сен мана СССР-ни язычершини Союзна уIзвы ыхьа. Манчиле 20 сен илгъечIуйнчиле хъийгъа, манкъус «Дагъыстанна халкьна шааир» до гьуво.
Аазырий ючIуIдваIще хьебцIале хьодъэсди сенее СтIал Силейман оIлкайни язычершини съездна эл’чий сечмишау. Манкъун маадын чыхыш СССР-ни хаIдданани кIазетбышее чапау. Манкъуни гьаIкIее доюкани язычее Максим Горькие шааир таIрыфаъан алхышысын джуваббы увгьо. Манкъве СилейманыкIле ХХ асырна Гомерва увгьо.
Лезгибышди шааирын шечIбы оIлкайни хаIдданани мизаршилхъа сакIалау.1936 сен Дагъыстанна халкьна шааир СтIал Силейман Ленинни орденыс лайикьра къаджы. Манкъе йихьцале мол’ни сенна ыIмыр гьавъу
Къийнийни йигъыл’ Дагъыстанэ манкъуни доюлин район, театр, кучебы, мактаббы водунбы. Республике СтIал Силейманын 155 сенийн юбилей гейдни тентенейква алгъайгьи. Регионни гьарни районе манчиква алакьанан маджлисбы, поэзиейн хаIмбы, кIанцертбы илгъечIи водунбы. Манчее гуджнакан иштырак цIаIхбышди язычерше, шааираршед гьаъан.
