СВО хаIбба цIаIхни халкьыни игит духйебыше иштыракаъа. Манбышда гьаарна ахтыйни доюс лайикьра ворна. Къийна йишди эскерарше джони гьаIракатыкайий игитийвалика миллетчерше аххъыйн республикабы, вилаетбы, шагьарбы, районбы, хивар йыIкьаIлхъа алятIа.
Къийнийна йишда гаф Гыл’мецIни хивейнчени кIыл’ни лейтенантни Исрафилов Умахан Менафни духайни гьаIкIее вухьес.
У. Исрафилов 1997 сенни майни 15-чил едике ыхьа. Манкъве2014-ъэсди сен Гыл’мецIни хивын йыIкьнекин мактаб быкырау. Манчиле хъийгъа Умахан сабара сенбына ишлемишхьес Урусиятылхъа аркIын. 2016-ъэсди сен Белгородни вилаетыле эскерийвалла гьааъас хъортул’. Са сенна эскерийвалла гавъуйле хъийгъа, Умахан едике ыхьайни хивейхъа саркIыл’. 2018-ъэсди сен мана эскерынсаIнаъат алятIасди кьарарейхъа хъары. Манкъве Амурни вилаетыл’ цIеддыйн котракт одкIун, ишлемишехьи гиргъыл. Гьаманиджад сен манкъве саIнаъатбы Благовещенскни физический культурайни техникIумейхъа хъуво. 2021-ъэсди сен техникIум югни кьийматбышиква быкырау.
У. Исрафилов СВО гидгъылыйни цIеддыйни йигъыле гьамбазаршика саджигее махъа йаIххъыляу. Мана ярахникьуввабышика Ватан миллетчершике къорамишааъас СВО энки йыIкьни вурушбынани джигэйхъа гирхьу. Умаханни увгьойка, украинайн эскерар даIвъийс гьийгъанче гьихъа гьаIзирувхьайий. Амма манчихъа ил’дяакы, ши манбышис вушубы вухьай гьагуйн. Къийнад манбышис ши диндж гьели деш. ГьаIшде ши чалышмишоохьенбы манбыше аххъыйн позициебы кIылда-кIылда йыIкьаIлхъа алятIас.
Къийна Умахан гьамбазаршика саджигэй СВО ворна. Заквани ихтилете манкъве увгьойн: «Ши аIхырейхъамее миллетчершиква вурушмишувхьес гьаIзирба вобунбы. Йишди фыкрее садджу манбышике гъамувхьай водон. ШакIле ацIан, душман, гьелбетте, йыIкъал ахвас. Зы хаIбвалла гьааъани эскераршихъад утIумун рыIгь, джомардийвалла гьеххааликва вобна. Шахъад са ният водун. Маныд гъамувхьай водун».
Гойне хьинне Умахане фронтыл’ни ешайишни гьаIкIее са-кьоIлле кал’ма увгьо. Манкъве къийнийни йигъыл’ джохъад нишикенаджаб кеситийвалла дешдава агъмишау. Одхьуний, илёдгъуй, аляъан палтар еттигъда водун. Миллетчершин оIги алятIасдимее гьеххааликва ярахыд водунва, — манкъве къейдау.
Умаханни гьамбазаршикIле мана геер дирибаш командир хьинне ацIа. Манкъве вудж гьаIкIена офицер хьинне гьагва. Умахане хаIбвалла гьааъан эскераршин взвод СВО ал’гьааIни джигее югунбышди джаргее водон. У. Исрафиловни, джуни гьамбзаршини дирибашийвалис чIакIни командирарше ахтына кьиймат гьооли. Манкъухъад гьагуйни игитийвалис сикIы гьувойн хаIдда наградабы водунбы. Гьайни делесвалей мана Суворовни медалыс лайикьра къаджы. АлятIуйни наградайква шинад мана табрикаъана.
Къийна Умаханыква саджигэй СВО хаIбба Дагъыстанейнчен эскерар вобунбы. Манбышди аIрайл’ йишди элен джаванарыб вобунбы. Манбы — Расулов Рамазан, АIлиев Аким, Мамедов МагьаIч, Расулов Саид. Игитер экIба-экIба хъызааханбы. Сана-санкъун вазиятбы ацIахьенбы.
Манбышиква янашеба СВО хаIбба йишди миллетын мебын эскерарыб вобунбы. Къийна йишин эскерар экIда СВО таамхьа, хайбышейхъа сабкIыл хъабый гозетяаъанбыб гьалеб хаIбба вобунбы. Эскераршини делесынбыше хаIм-йигъна мани сардан дилягбы гьеххъа. Иншалллагь, манбышин дилягбы быкырхьесынбы. Манбышди джаргее Умаханна дек’ Менаф дайийий ед’ Наргизим халайыб вобунбы.
ГьаIкIебаб, СВО иштыракаъани офицераршинайий эскераршина иш энки дагъамна, къорхунана ишобна. Манбы йишди заманайн кьаIгьраманар вобунбы. Шинад йишди сураке гидгъылыйн СВО экIда быкырхьа, маабын эскерар сагъба-саламатба хайбышейхъа, хизанбышисахъа сабкIылый гозетяъа водун. 
