МагьаIчкъалайни шагьарее Афганистан гьабтIыйни эскерар йикIел’хъаваляаъан дзюдойн турнир илгъечIу. Мааъад 23 ешейхъамейни гадебышейий ичерше иштыракау. Манбышди джаргее ГьаIджиева Амина Русланна йищыр йихьана. МаIнкъее цIеббыйна джига авхъу.

Амине МагьаIчкъалайни шагьарее «Спартак» донани дзюдойн идманчер хаIбхъааъани клубна уIзву ворна. Гьини элес маIнкьее 57 кило чекее хьебылле горуш алгъагьу. Хьебни элеесыр гъамийхьана. Амина Дагъыстанна чемпион ёкьудъэсди йаIххъе йихьа.
Аминайс дзюдойн къулай тренер Руслан МагьаIммадове хаIдхъаъа. Манкъуни увгьойка, мана геер баджарухукана идманчий ворна. Ши СКФО, Россиейл’ илгъечIуйни турнирбышее, чемпионатбышее иштыракау. ИлгъечIуйни горушбышее Амине югун джигабы аххъы. ГьаIшде ши Россиейни дзюдойни чемпионатыс гьаIзироохьи вобунбы. Маайиб ахтына джига авхъас чалышмишувхьес.
Амина треноравкIабышика саджигее хъаIдхъыйид кIелиханаъа деш. Мана магьаIчкъалайни шагьарни 34-ъэсди йыIкьнекни мактабна 11-ъэсди сыныфна шыгырт ворна. ХъаIдхъейид югун натиджабы гьагва водунбы. Дора йишди чемпионыс гьинчиле хъийгъад югун ахтыйн джигабы аххъас аIрзаъас.