Йишди миллетихъад архайле- архайлхъа илгъечIен джегьил’ эскерийвалейхъа оIтираъан ва эскер къаршиламишаъан югун аIдат водун. Манчис гьаммаше ши хаIбна фагьым гьооли.

ОIгийл’ни вахтал’ эйгьенний: эскерийвалла адамийвалин мактаб водун. Манчини аллар ешбышеехъа гьирхыл’на джегьил’ гьавасука Ватанни гьийдын бордж хъелесний аттамишехьена. Манке эскерийвалике къаттивхьанас вуккананбы тека-сейракынбы вухьа.
Гойне мебна девыр хъабы, инсанаршин оIгийл’ни къайдалин гивъур-сугъооцийбы бадалхьайнбы. Джегьилерыб манчис сикIы хъейбхьа. Няъас увгьее манбышикIле «эскерийвалла» эйгьен джуваб къаджы-къайхьес ыккан деший.
ГьаIшдийни замаанайл’ эскерни саIнаъатыс ыIмыр къабсырынбышихъаб мееб хаIбна гьуIрмат-урват вобна. Ватан дагъамийвалейнанкъаI, хаIббанана заIгьмат манбышилхъа хъабайли. Къийнийни йигъыл’, Украинайл’ СВО аIлгъаанкъаI, шакIле Россиейни ярахни кьувватбышди эскераршин гьунарбы къедженбы. Манбы замаанайн кьаIгьраманар вобунбы. Манбышди гьийб ши борджлыба вобунбы.
ДаIвъий гьабтIыйбы дена воохьена деш. ГьаIйифки, манчин хаIббананбышди хаахъа къарахабар абайли. Ушахар деккяр дена, едар адамий дена аахва. Манчихъа гора, гьоIкумат чалышмишехьен маIгьдыни хизанбышис хыл’ авхъас, манбышин уцIур кьоIна хъаъас.
Гьайни йигъбышее быкырни Мишлешни хивни джаIмаъатын джун Ватанни гьийдын эскерын бордж хъуво йыIкьалхъа саркIыл’на Рамазанов Мусабег’ АIлимханна дих къаршиламишау. Манкъве гьайни сенни мартыле октябырылхъа меега Белгородни вилаятыл’ къуллухааъа вухьа. Ман Украинайква сергьатейдын регион водун. Манчихъа гора, контракт одкIунни эскераршиква саджигэй хаIбна заIгьмат са сенна эскерийвалла гьааъас хъобтIулни джегьилершилхъаб хъабы. Манчихъа ил’дяакы, манбыше Ватан, юрд бед’ням гьавъу деш ва адамерше хьинне къуллухавъу хайбышейхъа сабкIыл. Манбышди джаргэй йишда игит Мусабегир ыхьана.
Манкъве аIсасна къуллух Челябинскни вилаятни Чебаркуль шагьаре вукку. Белгороде гьоIкуматна сергьат къорамишааъанкъаI гьагуйни гьунарбышис мана частни камандирарше «Участник Специальной военной операции» медалыс тагдимау .
Сувахъанный Мусабеге идманыка машкьулхьесыр кIелиханаъа ыхьа деш. Мана эскераршини аIрайл’ илгъечIени баIсбышда иштыракчий ва чемпион ворна. Мусабег’ Рамазанов идманеени угъурбышис грамотабы, гыранын пайбы гьуво. Ши маIгьабни джегьилершиле гуянмишоохьенбы.
«Нур» кIазетни ишчерше Мусабег’ни деккис ва едис дих эскерейнче хъарына барака гьааъа ва маIгьарна джегьил’ хаIрхъаува сагъул-варул эйгьи.