Февральни 15-чил’, МагьачIкъалайни Красноармейскни гасабайни «Спарта» донани стадионе цIаIхбышди футболни лигайн (ЦФЛ) Кубок гьувагу.
Мани кубоке 10 камандабыше иштыракаъу — Хьойик, МиххьегI, ЦIаIхий, Гыл’мецI-1, Гыл’мецI-2, Мишлеш-1, Мишлеш-2, Калел’, Лек-1, Лек-2. Ман камандабы кьоIни дестейхъа битIалаъу ыхьа ва гьар дестейнче финалеехъа кьоIбле каманда илгъевчIу. Финалее МиххьегI, Калел’ Гыл’мецI-1, Гыл’мецI-2 камандабы растына хъады. Манбы санасанкъуква гьувагуйле хъийгъа, аIсасни финалее Калел’найий Гыл’мецIна камандабы горушмышхьа. Гейд марахукани оIйине Калел’ни хивна каманда гъамувхьа ва ЦФЛ-ын Кубок къазанмишаъу.
Турнирее кьоIбъэсда джигабы Гыл’мецIни ва хьебыдъэсда джига МиххьегIни камандабыше аххъы.
Зас гьаман эгьес ыккан, мани йигъыл’ уфтанна къуIмана гьаваа вухьа ва кубоке иштыракаъуйни гыргыни камандабыше югун футбол гьагу. Гьини турнире гьайни зарбас Хьойикни хивни камандайн цIедда иштыракаъа ыхьа. Манбышис са топ къидибхьыр финалеехъа илгъебчIес. Умуд вобна, манбыше геледжагъыл’ ихьесди турнирбышее ахтыйна джига авхъасда.
ЦIаIхбышди хиваршини аIрайлин Кубок илгъеIчес хаIдын кумаг йишди миллетни ишкарарше Имам Рамазанове, Мустафа Байрамове ва Рамазан Шихамирове гьуво. Манбышди кисайс барака гьевлена. Манчиле савагьийда, «НУР» кIазетын информациейни суракке кумаг гьуво. Спонсорийвалла гьавъуйнбышди аIрее Дагъыстанни ДаIмаъат палатайна уIзву Сабир Сайдумовыр ыхьана.
Турнирын екунбы гьаъанкъаI ва гъамейбхьанбышис грамотабы, медалбы ва пылыкван мукафатбы гьеленкъаI зы увгьойн: «ЦФЛ-ын чемпионат ёкьудле сен водун алгъайгьен. Амма кубок къоIдъэс алгъавъу. Гьайни зарбас ман турнир хиваршди аIрайлин ыхьа. МаIгьдын идманын ярышбы йишин джаванар саджигеехъа савъуйниме ва манбы сана-санкъука танышебхьайнимее алгъайгьи. Къийна гьайни стадионеехъа 200-300 джаван сары ва футболыхъа иляккы. Йишди цIаIхбышди футболни лигайн хьиннен чемпионат республикайл’ тека-сейракда водон.
Манчиле гъайре, футбол гьувагуйле савагьийба йишди джаванарше ацIаалис фыкыр гьевлес вуккан. Няъас увгьее ши нимее ацIааликва, камалука вухьее йишди миллетнимее югда водон».
Гойне Дагъыстанни ДжаIмаъат палатайни уIзвуе Сабир Сайдумове ЦФЛ чемпионат, кубок ва медын футболын турнирбы тешкиляуйхъа гора Имам Рамазановыс, Мустафа Байрамовыс, Рамазан Шихамировыс, Байрам АIбдуллаевыс гойнед мани йигъыл’ кубоке иштыракаъуйни камандабышди маIшкьчершис ва футболчершис Дагъыстанни ДжаIмаъат палатайни ва джуни сураке ташаккурийвалла агъмышавъу.
Манкъуни увгьойква, маIхуIдни турнирбыше йишди джаванаршди аIрее садибыйвалла ва доствалла гьеххааъа, гойнеб манбыше вахт бейкараба авакIанааъа деш.
Дагъыстанни кьаIсынбышди Советни уIзвуйни Айдын Бабаевни увгьойква, идманыква маIшкьулувхьай геед югун кар водон. Футболыле савагьийда медын идманын турнирбы алгъагьас ыккан (теннис, волейбол) ва медынбы.
Манкъве кубоке ахтыйн джигабы аххъыйн камандабы табрикаъу ва авхуйнбышис сайид ихьесди турнирбышее угъурбы арзуламишаъу.
АIхреени вахтал’ йишди джаванарше идманылхъа хаIбба фыкыр гьооли вобна. Гьасре маIгьдын спортун, маданиятын маджлисбы шахьад геед ихьеджен ва мааъад хаIббанани йишди миллетни эл’чершис иштыракаъас кьисматаъан!
Сабара вахтыле, Рамандина ваз таамувхьайле хъийгъа, ЦФЛ-ни 2025-2026-ъэсди сенбышди чемпионатна къоIбъэсда круг гивгъалас. Майни вуза ХаIбни Ватанни даIвъийе ва СВО-е иштыракаъуйнбышис къадсырыйн турнир илгъечIес. Хъийгъа летти 40-л’ сеныле оохъани футболни ветеранаршин ярышбы ихьес. Мани ихьесди ярышбышее иштыракаъанбышис угъурбы арзуламишаъа!
