Авропайл’ цIебба университетхьинне ачмишавъуйни ЦIаIхни мадрасайни 950-ъэсди сенийни юбилейис къадсырыйн тадбырбы гьайни сеныд аIлгъаа водунбы.
Мартни 24-чил’ МагьачIкъалайни шагьарее, Дагъыстанни гуманитарни институте мани юбилейис къадсырыйн «Исламын таIгьсыл Россиейни динбышди ва миллетбышди арейдын алаакьабы итIумаъан фактор»» донан форум илгъечIу. Ман форум гьайни сен йишди гьоIкуматыл’ къейдаъани Россиейни миллетбышди садибыйвал’ни сеныс къадсыр ыхьа.
Маджлис ДРО «Уздены Дагестана» донани ташкилатын тешкилявъу ва йидж алгъаагьас кумаг Дагъыстанни миллетбышди ва динни ишбышди министерствайн ва Дагъыстанни Муфтиятын гьуво.
Форуме Россиейни, Дагъыстанни динни ааIлимарше, джаIмаъатчерше, гуманитарни университетни телябабыше иштыракаъу.
ЦIеддыйни йигъыл’ сабара форумейхъа хъобтIулыйн мигьманар ЦIаIхийни хивейхъа гьабкIын ва хивни мандикейъаб маджлис алгъавгьу, кубаар гьаъу. Мигьманар хивни джаIмаъатын ва Сувал’ни магьаIлни имаме Сулейманов Эл’дар-гьаIджей гееб уфтанба къаршиламышавъу. Мигьманар гивхьуйни гьуIрматыс гееб разийба авху.
Форум ДГИ-ни ректоре НуIгькьади Бахмудкьадиеве ачмишаъу. Манкъве махъа абыйнбышис ташаккурийвалла агъмишавъу. Гойне исламни таIгьсылни ва Низамийа медресейни гьаIкIее докладбышиква сабара ааIлимар йишонебхьа. Манбышди увгьойква, Дагъыстанэй ва Россиейл’ дин еймишаъуйниме ЦIаIхийни хивеени медресейна дараджа гееб ахтыба вобна. Мани сардан мааъад чыхышбы гьау: Дагъыстанни Муфтиятна Дженуб округна нумаенде МагьаIммадрамазан Раджабов, Босния ва Герцоговина гьоIкуматна динни ташкилатна уIзву Магьмуд Думалаев, Ставрополни шагьарейна «Ас-салам» кIазетна нумаенде ДавудмагьаIммад Исрапилов ва мебынбы.
Рутул районни хаIрынкъукен Давуд Сулеймановыкен форумни иштыракчершис табрикыкван кагъыз районни маданиятни, джаванаршди сиясатни ва идманни управлениейни хаIрынкъве Саид Сулейманове хъаIдхъы. Манкъве гойне джуни чыхышее ЦIаIхни манзикыс ремонтаъас ыкканва увгьо ва манчис республикайни сураке кумаг гьувойнчини гьаIкIее хагьиш гьаъу.
Манзикна вазият югба дешобнова ва мааъад ремонт гьаъас ыкканва аIтрафлылда джуни чыхышее Дагъыстанни мирасна ахуйни маданиятын объектбы къорамышаъани Агентствайни нумаендее АIбдулмаджид Абашилове увгьо. Манкъуни джуваббышихъа гора, мана медресе садджу Дагъыстаннаджаб деш, быкырни Россиейни маданиятна ва динна гьаIйкал вобна. Манчихъа гора мана ши геледжагъбышис гьувааджес вуккан ва манчис гедж гьидяъу ремонт гьаъас ыкканва манкъве увгьо.
ОIгийлни Дагъыстанни миллетбышди сиясатни ва динни ишбышди министрее Энрик Муслимове джуни чыхышее увгьойн: «ОIтмышхьайни сен ЦIаIхийни медресейн юбилей гейд уфтанда алгъавгьу. Манчис къадсырыйн маджлисбы ЦIаIхее, МагьачIкъалее, Москваее илгъечIу. Мани маджлисбышее Дагъыстанни муфтийе АIгьмадЭфендий АIбдулаеве, Татарстанни хаIрынкъве Рустам Минниханове иштырак гьаъу. Мана манзик садджу Рутулни районнаджаб деш, быкырни Дагъыстанна, Россиейна таарыхбышда гьаIйкал вобна. Манчиле ши гыргынбы гуянмышеебхьес вуккан. Мани медресейс къадсырыйн тадбырбы аазыр сен быкырхьесмее ши гьар сен алгъагьас ыккан. Йизди увгьойка, мани медресейс ши югба фыкыр гьооли деш вобна. Мана йишди гьоIкуматни менни вилаетыл’ вухьанахьий, манчис меняхуIбний фыкыр гьевлес ва манчин юбилей ахтыйни дараджайкваний къейдаъас. Мани манзике джурбаджур маджлисбы алгъагьас ыккан. Махъа нимеега хаIбба инсанар абей, гьаманиме хаIдда манзикни гьаIкIее ацIахьес».
Сувал’ни магьаIлна имам Эл’дар-гьаIджий Cулейманове форум ташкиляъуйнбышис ва махъа абыйнбышис ташаккурийвала агъмишавъу. Гойне ЦIаIхийни медресейни гьаIкIее вуджее гьазираъуйн фильм махъа сабыйнбышис тагдимау.
Форум резолюция къабылявъуйка таамхьа.
