Мартни 22-чил’ МаIгьачкъалее, «Горная долина» шадлыгъбы илгъечIени утагъее цIаIхни миллетна ифтар илгъевчIу. Мани маджлисее 550 инсане иштырак гьаъу.
Ифтареехъа абыйнбышди аIрее Дагъыстанни динэгьлершини управлениейн, муфтиятын эл’чер, гьар хиваршеенче, шагьарбышеенче – МаIгьачкъалейнче, Дербентгъанче, Къызларгъанче, Каспийскеенче ва Рутулни, Бабаюртни районбышеенче адыйн цIаIхбышди джамаъаIт ыхьа. Джони аIрее хиваршин имамар, динэгьлер ва мебын инсанар вухьа.
Ифтарна маджлис АIбдулла-гьаIджий Эфендиеве вукку, ва манкъве Кьуръанейни аятыква мана гибгъыл, гойнед нашидбы гьаъу ва конкурсбы алгъавгьу.
Ифтареехъа арыйни Дагъыстанни муфтийни маIъвыне Кахибгъанчени МагьаIммаде маджлисеехъа сабыйнбы Дагъыстанна муфтий шейх АIгьмад-
эфендийни сураке цIаIхбы Рамандини вузака табрикавъу. Манкъуни увгьойква, гьайни гыранни вуза республикайни гыргыни хиваршее ва шагьарбышее ифтарбы алгъайгьи водонбыва увгьо.
«Мани Аллагьни йаIххъеехъа гьаьани ифтарбышеехъа цIаIхбышин миллетыд къошмышхьайн, ва манчихъа гора шос сагъул. Шу аххъыйн сивар, гьауъйн кубара ва гьувойн садакьабы Аллагье кьабыляъанбы. Вушди миллетыхъаб таарыхее хаIбба динэгьлер вухьа ва манбsшда исламни динее дараджа ахтыба вобнава», -манкъве увгьо.
Манкъуле савагьийба ифтареехъа абыйни сабара ДУМД-ни нумаендебышис джуваббы гьуво ва манбышед джаIмаъат Рамандини вузака табрикаъуйн.
ЦIаIхни дерайни имаме Эл’дар-гьаIджий Сулейманове джуни чыхышее маджлис няхуIбий вухьесва маIълумат гьуво, гойнед мана алгъагьас кумаг гьувойни инсанаршис миннатдарийвалла агъмишавъу.
АIсадуллагь-гьаIджий Рамазанове вуджее ЦIаIxни дерайл’ хаIбвалла гьааъани «Инсан» донани фондын гьиджо кумагый инсанаршис гьуво, манчини гьаIкIее йишонхьа, гойнед «Горный долина» шадлыгъ утагъни хаIрынкъус ШаIъбан Кьасымовыс миннатдарийвалла агъмишавъу ва манкъус пай гьуво.
ЦIаIхни миллетни «НУР» кIазетни хааIрни редакторе Байрам АIбдуллаеве ифтареехъа абыйнбышис салам гьувойле хъийгъа увгьойн: «Гьайни сен йишди ифтарни маджисеехъа оIтмишхьайни сеныле хаIбба инсанар абы ва чис кумаг гьеленбыб гьайни зарбас гееб вухьа. Манчихъа гора, шахъаб кьоIбле кIыл’ни гьаIджилхъана (Умра) путевкIа ва хаIдда медын пайбы водонбы. Мани Умрайлхъани путевкIабышда са «НУР» кIазетни Редакционный советни сураке вобна. Мани йишди совете цIаIхбышди гьар хивеенче гьуIрматукван инсанар вобонбы ва манбыше мани путевкIайс пылбы алгъавгьу». Манкъве маджлисейхъа абыйни ушахаршис «Лачын» донан ед’ни мизел’на журнал битIалавъу.
Маджлисейъад сабара йишди миллетни гьуIрматуквани инсанаршед чыхышбы гьаъуйнбы, джони аIрее ШаIъбан Кьасымов, Фикрет Раджабов, миллетын агъсаххъалар Маджид дайий, ЫIмран дайий, Мурад дайий, КьурбанаIли чоджий ва мебынбы вухьа.
Манбыше миллетни, динни гьаIкIее геед уфтанын джуваббы увгьо ва ифтар кечирмишаъас заIгьмат гьавъуйбышикIле ва чис кумагбы гьувойбышикIле сагъулва увгьо. Гойне маджлис вукейканкъвее ушахар майдамеехъа хъобтIул ва манбышилхъа динни гьаIкIеедын суалбы гьуво. Хъодкуда джаваббы хъувойнбышис исламни динни гьаIкIеедын ушахаршин уфтанын китаббы гьувы.
Маджлис аIлгьаалетти нашидбы, кьуръаненче дуаIбы ва динни гьаIкIее уфтанын джуваббы эйгьи ыхьа. РаIгьматтыгъ шейх АIгьмад-гьаIджий Бакаевни духее Низамудин-гьаIджее цIаIхни мизел’ къуръаненче сабара джузбы хъаIдхъы.
Сив ачимишаъуйле хъийгъа гыргынкъве кубар гьаъу, гойне одхьунийлхъа гыбгъыл. Манчиле хъийгъа путевкIабышин ва сабара медын пайбышин конкурс илгъечIу. Умрайлхъана са путевкIа ЦIаIхни хивни Дил’бер донани йичейс гьуваагу. МаIнкъее мана джени хыдылыс Руслан Алхасовыс пайис гьуво. Сайиб Калел’ни хивни Алекбер чоджийс гьуваагу. Ши манбы мани Аллагье гьувойни кьисматуква табрикааъа ва сагъба саламатба кIынни гьаIджилхъа гьабкIын-хъавалес къисматааъанбыва эйгьи.
Гьайни сен оIтмишхьайни сеныле йишин ифтар югда илгъечIу, няъас увгьее кумагбы, пайбы гьеленбы хаIбба вухьа, джахъа абыйн инсанарыб хаIбба вухьа. Амма манбышди аIрее сабара хиваршенче лап кIылба инсанар абы, гойнеб сабара маа миллетыква саджигее вухьесын инсанар абы деший. Ифтарыс пылыка, пайбышика кумагбы гьаъуйнбышис, джахъа абыйнбышис, одхьуний гьаIзираъуйнбышис, истолбышилхъа йидж гихьыйнбышис ва шавайе мани йигъыл’ заIгьматбы гьаъу гыргынкъус сагъулва эйгьи ва Аллагье джон заIгьматбы сувабыс оокIананбы. Аамин!
