Октябрни 13-чил’, МагьачIкъалайни Красноармейскни гасабайни«Спарта» донани стадионе цIаIхбышди футболни лигайн (ЦФЛ) цIеддыйн Суперкубок гьувагу.

ОIюн «Микик/Цахуры» ва «Хатайспор» командабышди аIрее илгъечIу, ва мааъаб «Микик/Цахуры» донана команда 4-1 гьыIсабыква гъамувхьа.
Суперкубок илгъеIчес хаIдын кумаг йишди миллетни ишкарарше Имам Рамазанове, Мустафа Байрамове ва Рамазан Шихамирове гьуво. Манбышди кисайс барака гьевлена.
ЦФЛ-ын чемпионат хьебыдле сен водун алгъайгьен. КьоIни чемпионате ФК «Цахуры» донани командайн цIеббыйна джига авхъу, са зарбас ФК «Микик» чемпион вухьа. ФК «Хатайспор» гьар йишди миллетни футболни чемпионате ахтына джига авхъаахъа ва оIтмишхьайни чемпионате мана кьоIдъэсди джигее вухьа.
МаIгьдын идманын ярышбы йишин джаванар саджигеехъа савъуйниме ва манбы сана-санкъука танышебхьайнимее алгъайгьи. Чемпионатын гьар тур алгъайгьенкъаI, стадионеехъа 200-300 джаван сарайли ва футболыхъа илякка. КьоIд гьаманимебынбы футболыхъа соцсетьбышенче (Вконтакты) джанлы эфирехъа илякка. Йишди цIаIхбышди футболни лигайн хьиннен чемпионат республикайл’ тека-сейракда водон.
Мани чемпионатыс маIълуматын кумаг «Нур» кIаIзетын гьаъа.
Ненджад идманын турнир спонсораршини кумаг дена алгъагьас эхьи деш.
МаIгьдын спортун маджлисбы алгъавгьуй геед югда водон йишди джаванаршдимее, няъас увгьее сана-санкъукIле ваацIоохьи, гойнед манбыше вахт бейкараба авакIанааъа деш.
АIхреени вахтал’ йишди джаванарше идманылхъа хаIбба фыкыр гьооли вобна. Гьасре маIгьдын спортун, маданиятын маджлисбы шахьад геед ихьеджен ва мааъад хаIббанани йишди миллетни эл’чершис иштыракаъас кьисматаъан!
PS. ЦФЛ ёкьудъэсын сезон октябрьни 18 -чил’ гигъалас ва гьайни зарбас чемпионате 10 командайн иштырак гьаъас.