Гьайни уIл’джумее МагьачIкъалайни «Лотос» донани чапханее цIаIхбышди таарыхыс, маданиятыс, диныс аидын кьоIдле китаб урусни мизел’ чапыке хъигъечIу.

Мани китаббышин са «ЦIаIхбышин шейхар ва зияратбы» джинягъаIлий АIлим СултIанове одкIун. Мана Дагъыстанни правительствайни Брянскни вилаетыл’на нумаенде ворна.
Мани китабе цIаIхбышди шейхаршди, ааIлимаршди динэгьлершди, зияратбышди гьаIкIее одкIун водун. Махъан маIълумат АIлим чоджее Интернетенче, «Нур» кIазетенче ва сабара динни китаббышенче алятIу.
Китаб къайиккас хаIдын кумаг йишди миллетни ишкарарше (меценаты) гьуво. Манбышди кисайс барака гьевленава эйгьи. Умудааъана, далыйле ихьесди сабара проектбышисыд манбыше кумагбы гьаъасынбы.
КьоIдъэсын китаб «К истории цахуров» (ЦIаIхбышди таарыхни гьаIкIее). Ман китаб Фикрет ГьыIсейнове (КIантуч Фикрет) одкIун ыхьа. Ман китаб къоIдъэсди чапыке хъигъечIу. Китабе йишди миллетни таарыхни гьаIкIее джитIан маIълумат гьели вудон.
Китаб Москвайни шагьарее ешемишоохьени Высоцкийбышди хизанни фондыни гьыIсабейнче къайиккы. Манчихъа гора манбышисыб ташаккурийвалла агъмишааъа. АIхрейни сенбышее мани аилейни фонденче Сувал’ни магьаIлыл’ хаIдда ишбы къадже. Манбышди увгьойква, геледжагъылид лазымын кумаг гьелесын.
Китаббы къайиккас мислягьаIт «НУР» кIазетни Редакциейни совете къавдже. Гойне манчис кьувва йишди миллетни джамаIъатчее Мамед Мамедове гьуво. Эгьес эйхьи, китаббы чапыке хъигъечIийнчина сабабкар мана ыхьа.
Зас гьаман эгьес ыккан, къийна шахъад миллетни, хиваршди, таарыхни, адабиятни, маданиятни, инсанаршди гьаIкIее одкIунийн хаIдда материалбы водунбы. Амма ман маIълуматбы топламышаъу китаб къайиккас пыл дехьайхъа гора, ши дагъамийвалабы цIыцIаъа.
Ин Ша Аллагь, йишди ишкараршди кумагуква шаке ман китаббы къайикас аIхасынбы!