Ватаныс бордж хъувой гьар йицIымолед еш быкырхьайни джегьилин бордж водун. АIхреени сенбышее эскереехъа хъобтIулыйка алаакьан кьаанунбы сыкIылда бадалхьайнбы. ГьаIшдее эскереехъа 18 ешеенче 31 ешехъамееган джегьилер

ОIгийл’ 27 ешеехъамений хъоотIал. КьоIдъэсыд, дохтураршин комиссие сенее кьоIни элейсний илгъечIен – юххьан ва цывлихъа. ГьаIшде ГьоIкуматни Думайн кьаанун кьабылявъы , эскереехъа хъоотIални джегьилершин комиссие быкырни сенна илгъечIес, амма манбы садджу не юххьан , не цывлихъа эскереехъа оIтирааъас. Комиссиейке илгъечIуна джегьил’ эскереехъа 31 сенеехъаме алертIасда.
Октябрьни 6-чил’ РИА «Дагъыстанни» иджласбы, горушбы илгъечIени утагъее Дагъыстанни военный комиссарыкван полковник АIбдураIгьман Мурадхановыкван горуш илгъечIу. Ман брифингни къайдайл’ ыхьа. Манчина метлеб вухьана цывлийни эскереехъа хъобтIулыйква багълыданан маIълумат журналистаршис гьувой.
Джуни чыхышее цIедда военкомее нягьаIдый юххьанийн эскереехъан хъотIулый йишди республике илгъечIу увгьу. Манкъуни джуваббышихъа гора, юхьанийн пIлан ши вахтал’ еттыгъда быкыраыйн. Дагъамийвал’бышиква растна хъабы деш. ХъобтIулыйн джегьилер военный частбышилхъа оIтиравъуйнбы . ГьаIшде манбыше мааъаб къуллух гьааъа вобна. Сура сеныле манбы Ватаныс бордж хъуво, хайбышеехъа савкIаласынбы.
Гыргына эскереехъа аркIынна джегьил’ йишди учёте ворна. Лазымхьее , телефоныква командираршиква ва эскерыква алаакьабы аххъахаъанбы, нарагьаIт вухьесын кар дешин.
Гьайни сенийн цывылийн хъотIулый октябрьни 1-чил’ гидгъыл водун. Ман декабрьни 31-чилхъамее цIыцIахьес. ХъобтIулыйн эскерар военный частбышилхъа октябрьни15-чиле оIтирааъа гивгъалас. Эскереехъа хъобтIулни джегьилерше Украине аIлгъаани СВО иштыракаъас деш. Манбыше Россиейл’ частьбышил’ эскерыйвалла алгъаагьас. Сен быкырхьаме, манбы хаахъа къавуккас. Цывлихъа республикеенче 3200 аваркьыл’на джегьил’ эскереехъа оIтираъас. Манбышди хаIббананбыше джони санаъаIтыква багълыбанана эскерна къуллух гьааъас, — А. Мурадханове увгьо.
Гойне Дагъыстанни военкоме нени районбышейий , шагьарбышейий мани сардан иш къулайква къурмишавъу агъмишау.
АIбдураIгьман Мурадхановни увгьойква, эскереехъа хъобтIулыйква багълыбанана иш МаIгьачкъалайни, Дербентни шагьарбышее , Хасаюртни, Къизилюртни, Ахтыни, Рутулни , МагьаIрамкентни ва медни районбышее югба къурмишавъу вобна. Маныд районни военкомыке , хаIрынкъуке ва ватанпарварни къайдал’ тербие гьелени ташкилатбышди регьбераршике аIслыда водун.
«Нур» кIазетни редакциейн , эскереехъа ааIни джегьилершис югна сафарий ва вахтал’ сагъба- саламатба хайбышеехъа хъабый аIрзуламишаъа.