Россиейл’ 23 февралын байрам алгъайгьен 100 агаллан сенбы водунбы. Мани вахтал’ манчин до хьулехьейд бадалхьайн. Амма байрамна патриотизмайна аIсасна маIънаа авхуна. Ватан къорамишааъанбышди йигъыл’ инсанарше гыргынбышиле гьихъа Ватан къорамишавъуйниме игитийвалла, кьаIгьраманийвалла гьаагуйнбышис гьуIрмат гивийхьи. Къийна къайи хьебадъэсди февралыл’ гыргын адамер табрикааъан аIдат водун. Махъаб армиейка алаакьа дешин вугIул’ни касын эл’черыб гябакIа вобунбы. Мани сардан армиее къуллухааъан едарыб кIеливханааъас вуккан деш.
Гьайни сен Дагъыстанылхъа хаариджийле адыйн террористаршин къошинбы дагъылмышаийн 25 сен быкырехьи. Йишди Ватанни таарыхе хаIдда даIвъийбы ыхьа. Мана джони мыкIык’ авуб къавджес вуккананбы кIыл’ба деш вухьа. Амма Дагъыстанеехъа ярахыква абыйнбышис гьаммаше оIлум авайку. Мысаджад ва шавукеджад сувахъанбы кьарацIабышилхъа гювъарааъас вааIхы деш.
1999 сен йишди республике ыхьайн гьааIдисабы халкьни йикIеенче адкIын дешодунбы. АIрайле къайи хьвад сен адкIынейид, манчин гьувойн дагъбы меейид водунбы. Манке Чечняйни сурале дюнйейл’ни террористарше Дагъыстанылхъа басхын гьау. Басаевыний Хатабын къошинбы гьорбынани йишобышиква ярахыква республикайни БотIлихни районеехъа иккечIу.
Манбышди къошинбыше умудавъуна джон тераф ерры халкьын аххъаххъава. Анджах мани дагъамни вахтал’ дагъыстанын гыргын миллетбы са мыIслягьатеехъа хъады, ярахыквани къошинбышин оIги ыIхы. Ватан къорамишааъас кьаIсинбы, джегьилер, ушахар сугъооцы. Гьар хив манке къалайлхъа сабкIыл. ХаIдни гьыIсабука алетIвее, дагъыстанныбыше Россиейн тика-тикайлхъа битIалхьай явашау. Манбыше джони торпахбышиле илгъебчIес душманар гьабсыр деш.
Гьел’бетди, манке аIсас юк джолхъа россиейни армиейни эскерарше аляатIу. Манбышиква барабарба игитийвалла дагъыстанныбыше вурушбышее гьаагу. Манбышис террористаршиквани вурушбышее хаIдын йикI’ Россиейни премьер-министрын Владимир Путинни арыйн гьуво. Мана БотIлихе армиейни эскераршиква ва террористаршин оIги ыIхас сугъооцуйни ерры игитершиква горушмышхьа. Мааъад душманаршин къошинбы дагъылмышаийнбы, авхуйнбыб йыIкьалхъа Чечнеехъа гьеебхы.
Анджах меб сентябрьни 5-чил душманар ини элеес Новолакни районехъа гьуIджумыка эбчIу. Иняабыб хъидёбтIулни мигьманаршикван вурушбы гидгъыл. Дагъыстанныбыше мед джон сувахъанныбышин гьунар гьагуйн. Манбыше душманаршис аман гьуво деш. Сентябрьни йицIухьванчис йишин торпахбы террористаршике темизяуйнбы.
Мани вурушбышее дагъыстанни миллетбышиква саджигее цIаIхни халкьыни эл’чершед хаIдын иштырак гьау. Буйнакскни районни Карамахи хивни аллани боевикIаршиквани вурушбышди санчее гьаIкIена кьаIгьраманхьинне ОМОН-на ишчий мишлешелий МаIгьаммад ШаIъбанов хъикIу. Манкъус (хъикIуйле хъийгъа) орден Мужества гьуво.
1999 сенни августнийий сентябрьни вузаршее, Дагъыстан душманаршике къаттивхьанааъани даIвъийе 279 эскерий офицер гьабтIу, 800 яраламышхьа. Мани гьааIдисабышее 2500 душманыс оIлум авайкы.
Гьайни сен афганни гьааIдисабышин 35 сен быкырхьа. Афганистаныл’ вухьайни даIвъийе манкийни СССР-ни гыргыни миллетбышиква мыга-мыгас гьуво дагъыстанныбыше, манбышди аIрайл’ йишди халкьыни игитершеб джона джомардвалла гьаагу. Манбыше джон гьунар , джон Ватанылхъан аIшкь, джона игитийвалла быкырни гьоIкуматылхъа ашкаравъу. Мани даIвъийе хьебыд аазыр дагъыстанные иштыракау. Манбышике ваIще ёкьцIал’ игит йыIкьалхъа саркIыл’ деш, мааъад нафасбы гьуво. ГьабтIыйнбышди аIрее йишди халкьын игитерыб вухьайнбы – мишлешелий ГьаIзратаIлий ГьаIйдаров ва Кьасни хивеенчена Муса Мусаев.
Са-кьоIни йигъыле Россиейн Украинайл’ СВО алгъайгьен кьоIдле сен быкырхьес. Йишди оIлкайни мааъаб даIвъий вуккуй ненкеджаб фыкрее вухьа деш. Амма украинайни чIакIынбыше америкайни маIъаллимаршини кумагука вазият мани кIацIалхъа хъавалявъуки, шахъаб мебна чараа авху деш. ОIлум денана даIвъий воохьена деш. ГьаIйифки, Ватанниме гьабатIан игит духйебы кIыл’ба дешобунбы. Гьар даIвъийехьинне, украмиллетчершиквани вурушбушее хаIбна игитийвалла дагъыстанныбышеб гьаагва вобна . Манбышда ючIуIйре Россиейни КьаIгьраманни доюс лайикьба къавджу. Манчее цIаIхни халкьыни эл’чершинаб хаIбна пай вобна. Йишди кIынни миллетын СВО хил’дже эскерар къахову. Манбышике сабаранбы контрактыка къуллух гьааъанбы вобунбы, сабаранбы мобилизациейква хъобтIулуйнбы ва сабаранбыб джони хайишиква абкIынийнбы. Манчихъа ил’дяакы, манбышди гьаарынкъве душманукани вурушбышее джо нени юрдын адамер вухьай гьагва водун. Йишди кьаIгьраманаршина игитийвалла камандирарше гыргынанкъаI агъмышааъа вобна. Манбышин джомард гьаракатбы медалбышиква, орденбышиква бил’дираъа. Амма камандираршини хыленче манбы алятIас гыргынкъус деш кьисматехьи. СВО гьабтIыйнбышин наградабы делесинбышисхъа районни чIакIынбыше хъели.
Украинайл’ ааIни даIвъийн йишди миллетын хил’дже игитер вукку. Гьайни вуза сайиб къарахабар хъабы. Ши йишин таарых кIелиханаъас ыккан деш. Гьар вахтал’ Дагъыстан кьаIгьраманаршина Ватан вухьа. Манчини аллаб, архайле хъооIни насылбышди ачухни геледжагъыл’ниме джан гиххьыйни игитершина едигар гьаммашийс гьуваджес вуккан.
«НУР» кIазетни редакциейн цIаIхни миллетын гыргын адамер джони байрамука табрикааъа, джос джанана сагъвалла, ишбышее угъурбы аIрзуламишаъа.
