Августни 26-чил’ Дагъыстанни муфтийе шейх АIгьмад-эфенде джуни хаа цIаIхбышди миллетни динэгьлершиква, ишкараршиква, горуш алгъавгьу ва маад сабара масалабышди гьаIкIе гаф гьавъу.
Ман горуш ихьесдимее хаIбна иш «Ассалам» кIазетни хаIрни редакторе ГьаIсан-эфенди Магьмудове, Сувал’ни магьаIлни имаме Эл’дар-гьаIджи Сулейманове ва сабара йишди миллетни активистарше къавджу.
АIхрейдын махуIдун горуш республикайни муфтийка 2000-ъэсди сен илгъечIу ыхьа. Гьайни зарбас ыхьайни горушее сабара йишди миллетыс аидын масалабы агъмишаъу.
Эл’дар-гьаIджи Сулейманове муфтийсхъа абына макьсад агъмишавъуйле хъийгъа ва йишди хиваршее манзикбы нени гьаIлее водонбыва увгьойле хъийгъа джуваб зас гьуво. Зы шейхыс салам гьувойле хъийгъа, манкъукIле увгьойн: «Къийнийни йигъыл’ цIаIхбышин миллет геед намусыква ва гъирятуква водон, сен-сеныле динылхъа аIлгъамишин сай гьеххахьи водон ва джамаъаIтыс манчини гьаIкIе ва муфтиятни суракке къеджени ишбышди гьаIкIе маIълумат йишди кIазетейид эйхьен. «Къийнийни йигъыл’ цIаIхбыше геед хъаIдаххъан кьоIдле кIазет водон «Нур» ва «Ассалам»». Ман увгьойле хъийгъа, шейх АIгьмад-эфенде аIхъана гьаъа гиргъыл’.
Горушейхъа арийни миллетни бале ахвана Мамед Мамедове АIгьмад-эфендийкIле Усман-эфенди ал’-Цахурийн «Тухфат ал’-ахбаб» донан китаб аIрабни мизел’ къайкийс сагъолва увгьо, ва манкъве муфтилхъа хаишаъу ман китаб урусни мизелыд къайиккас кумаг гьеъэва. Гойне М. Мамедове цIаIхни мадрасайн 950-ъэсын сен хъооIни сен быкырехьива ва мани манзикыс ремонт ыкканва увгьо, гойнед манкъве юбилейс къадсырийн тадбирбы муфтиятни суракке къаджейни югда ихьесва увгьо.
Мамед Мамедовни увгьойква, мадраса ремонт гьааъас МоскIавгъанче проектировщикар абы манбыше лазымын тадбирбы къаджу ва манчика асасан манзик ремонтааъас 92 млн манат пылна вуканва увгьо.
АIгьмад-эфенде джуни дойиле Дагъыстанни Правительсвайни садрыйсхъа АIбдулмуслим АIбдулмуслимовусхъа гьавакIнева увгьо ва манкъве маздик ремонтаъасын кумаг гьелесынва увгьо. Манкъуни увгьоква, 950-ъэсын ЦIаIхни манзикын юбилей саджу цIаIхбышди миллетыс аидда деш водон, ман быкырни Дагъыстанысыд аидда водон ва джоке аIхьан кумаг гьаъасынва джуваб гьуво .
ЦIаIхийни сельсоветни хаIрынкъве Вагиф АIлиеве администрациейни сураке манзик ремонтааъасди ишбышди гьаке ва мани манзикна къийнийна вазийят нахуIбий вобнава маIълумат гьуво.
Дагъыстанни парламентни оIтмишхьайни хьебни хъобтIулийни депутате Фикрет Раджабове АIгьмад-эфендикIле миллет гьыIсабейхъа адчу хъобтIулийхъа гора сагъулва увгьо ва манкъве аIхрейни вахтал’ сабара джигабышей йишди миллетын узвибы гулухее девхай агъмишаъу. Гойне Ф. Раджабове йаIхъбышин проект муфтийкIле гьагу ва манкъуни увгьойква КIусcурхьа йаIхъ хъивку манчеб мана Тляратайни районехъа цIыцIаъасын проект водва увгьо. Манкъуни увгойква мана йаIхъ вухьеени МагьачIкъаленче ЦIаIхейхъа абый абкIынийна вахт кIылхъивхьесва увгьо.
Гойне джуваб шейх АIгьмад-эфенде алятIу ва манкъуни увгьойква цIаIхбы кIылба вухьейиб манбышхъаб ацIалнан динэгьлеер, аалимар, шейхар гьаммаше вухьайнбы ва манбы къийнийни йигъыл’ быкырни Дагъыстане вацIа вобонмы.
ЦIаIхни манзикни гьаIкIе манкъве увгьойн: «950 сенна гьихъа мана мадраса ЦIаIхе вухьай Аллагьыке хъооIна хаIбна баракат вобна, няъас увгьее вушин мани вахталийн инсанар югун динэгьлер вухьайхъа гора Аллагье мана манзик маа вухьесва отIкIун».
Горушейхъа абынбышилхъа кIыры алихьийле хъийгъа, шейх АIгьмад-эфенде джусана агъмишауйни ишбышис аIхан кумаг гьелесва увгьо. Горушиле хъийгъа махъа абыйнбышис одхьуний гьуво ва мааъаб гивъурийнкъаI АIгьмад-эфендийкана гаф меб гуджлемишувхьана. Гойне сабара махъа абынбыше шейхыке вирд аляту.
Ши АIгьмад-эфенди хъооIни сен мадрасайн юбилей къаршламишаъанкъаI ЦIаIхехъа хъортIул. ИншаАаллагь гьамаIхудыд ихьесын.
Умуд вобна, хыляхъа алятIуйн ишбы шаке алгъаъас аIхасынбы ва мани ишбышее муфтиятын кумаг гьувее гейд югда ихьес.
