Телябаваллайн сенбы энки гыранынбы водунбы. Мани вахтал’ джаванарше геледжагъыл’ ишлемишаъасди саIнаъатылхъа хаIбна фыкыр гьооли. Къийнийни йигъыл’ йишди эл’ни джегьилершини аIрайл’ хъаIдхъыйлхъа ва сечмишауйни пешейлхъа гьавас ва аIшкь гьагванбы хаIбба вобунбы.
ГьаIджиева Хадижа Русланна йиш Дагъыстанни халкьни тасарруфатни колледжна теляба ворна. Мана туризмайни факультетна теляба ворна. Хадижайн до колледже югда хъаIдаххъани телябабышди джаргее водун. МаIнкъыс дарс гьелени маъаIллимарше, телябайн до гьаммаше югни сураке агъмишаъа. МанбышикIле маIнкъее хъаIдхъыйлхъа ва геледжагъыл’ гьаъасди пешейлхъа гьагвана дирибашийвалла къооджена.
Къийна Хадижее хъаIдхъыйква саджигее МагьаIчкъалайни шагьарее ва республикее алгъайгьени колледжни джурабаджура конкурсбышей ва тадбырбышейид иштыракаъан. Манбы геллесынбы Дагъыстанни джурабаджурайни шагьарбышее ва районбышее туризмайква багълыда алгъайгьен маджлисбы водунбы. Мааъад маIнкъее республикее туризма инкишаф гьаъасдимее тезе проектбыйий программабы гьагва. Геледжагъыл’ манбы ишилхъа адчесдимее манчис кьуват гьевлес чалышмишейхьи.
Хадижайни увгьойка, гьайни сен джо назарее аххъыйн хаIдданан тадбырбы ва ишбы Россиейл’ алгъайгьени миллетбышди садибыйвал’ни сеныка багълыда водунбы. Манчина макьсад къийна Россиейл’ мугьуIббатыква ешемишоохьени миллетбышда уфтанийвалла, манбышин аIдатбы, садибыйвалла гьагуй вобна.
Хадижа гьамыр Дагъыстанее доюквана спортсмен ворна. Мана колледжни ва МагьаIчкъалайни шагьарни ичершини волейболни камандабышда оIюнчий ворна. Къийна манбышди волейболни камандайн нейинки МаIгьачкъалее, республикайни хаIдданани шагьарбышее ва районбышее алгъайгьени турнирбыше иштырак гьаъа. Манбыше гьаммаше джаванаршини аIрайл’ ыккеккани ярышбышее ва баIсбышее югун джигабы аляатIа.
Хадижайни хъаIдхъыйлхъа гьагвани гьавасыс ва спортылхъа водни аIшкьыс гыргынбыше югна кьиймат гьооли. ГьаIшде мана хаIдданани грамотабышдайий медалбышда ийесси ворна. Манчини аIрайл’ энки гыранынбы гьайни дёлесвалей алятIуйнбы ыхьа. Манчина са Дагъыстан Республикайни Халкьни Маджлисни маданиятни, спортни, джаванаршини ва туризмайни комитетни хаIрынкъве М.М. Пайзулаеве, кьоIбъэсдаб МагьаIчкъалайни шагьарни спортни, туризмайни, джаванаршини управлениейни хаIрынкъве М.И.МирзагьаIджиеве гьувойнбы водунбы.
Йишди редакциейн югда хъаIдаххъани ва гьаIракатыквани джаваныс угъурбы аIрзаъа. МаIнкъыс геледжагъыл’ манчиле югун наградабы алятIас джанана сагъвалла аIрзааъа.
