Са сен аIрайле адкIын цIаIхбышда гьуIрматуквана дих, маIърафатыквани хизанна есси, доюквана ааIлим АIриф Ы1маров раIгьматыххъа аркIынийн ва манкъун майни 2-чил йигIцIал’ сенний быкырхьес.
Гьайни дюнйейл’ хыллийна ыIмыр гьидявъэйиб, манкъвее джуни миллетни сардан хаIдын хайирыкван ишбы гьадсыр. Манчис эйгьи: « Аллаге югун инсанар джусхъа зараба алябатIа». Манкъвее къаджейн ишбы гьаIшдед миллетни хайирыс ишлемишехьи водунбы. Манкъуни гьаIкIее писин джуваб эйгьена инсан къаджена деш, садджу къийнад манкъун до югвалис агъмишаъа.
ЫIмаров АIриф ЫIмарна дих 1955-ъэсди сенни майни 2-чил’ малдотурни хизане едике ыхьа. Манкъуна дек’ ЫIмар дайий аIцааликвана малдохтур ыхьа. Мани санаъаIтыле гъайре гьар суракен манкъухъад гьаIракатбыний, гыргыни ишбышее «вукIул’ хъыIгъаана инсан ыхьа. Манкъун гьунарбы джуни ушахаршилхъа илгъечIу. ЫIмар даийие Зугьра абайква 3 дих ва 3 йиш чIакIы хъавъу., манбышис хъаIдхъий гьувы, манбы эвлемишавъу.
АIриф чоджий хизане эн хааIрна ыхьа. Мана гьам деккин сагъын хыл’, кумагчий ыхьа. Хаани аIрайлин хивни тасарруфатын ишбы манкъуни гардана эхьи ыхьа. Анджах манчихъа ил’дяакы, АI. ЫIмарове ЦIаIхни йыIкьнекни мактабе аIълаада хъаIдхъы. Молидъэсын сыныф таамаъы, мана хъаIдхъаIс техникумеехъа аркIын. Ман таамауйле хъийгъа , 2 сенна манкъвее Ватаныс эскерийвалин бордж хъувы. Манче хъарыйле хъийгъа, мана очныра хъаIдхъас Дагъыстанни девлет политехник институтеехъа иккечIу. Институт таамауйле хъийгъа, мана оIтирауна Дагъыстанни хивни тасарруфатни министерствайни ташкилатеехъа «Дагагропромстроехъа». Манбышда иш хивни тасарруфатбышис аляъани бинаабышиква, тиклибышиква багълыбанана вухьа. Мааъар ишлемишехьенкъаI джегьил’ саIнаъаткарын гьаIракатбы, гьунарбы ашкарехьи гидгъыл.
Гьел’бедти , манкъуна ишиб республикайни чIакIни къуллухчершикIле, регьбераршикIле къооджи вухьа. Сабара вахтыле мана ташкилатни шоIъбайс хаIбвалла гьааъас гиххьы. Манкъуни шоIъбайн югун натийджабы гьагва гидгъыл. Мааъар ишлемишехьенкъаI, барабарда ДДУ-ын экономикайн факультет заочныда таамаъы. Садджу индженарджар деш мана ыхьа. Мана гьамыр югна экономист ыхьа. Сабара сенбышиле мана «Дагъагропромстрой» ташкилатни хаIрынкуна маIъвынна гиххьы. Мани ишиква барабарба , 1993 сен манкъус теклиф гьаъыйн «Агропромстрой» банкыни Дагъыстанеени филиалыс хаIбвалла гьааъас теклифау. Манбы йишди джегьил’ гьоIкуматни таарыхедын дагъамын сенбы ыхьа. Иш джигабы кIылхъыхьа, дуканбы кьаIрахъыхьа, хуликIанар хаIбхъебхьа. Йигъыс са кьарахабар къивийххьи вухьа. Мани дагъамийвалихъа ил’дяакы , АIриф ЫIмарове джуна иш хъобкуба вуккекка вухьа. Манкъун далы джун гьамбазар, джука саджигее хъаIдхъийнбы ва ишин гьамбазар вухьа.
Гьел’бедти, манке АIриф ЫIмарове , джухъад имканбы ыхьайхъа гора, джуни миллетис кумаг гьаъа гиргъыл’. Мааъар ишлемишехьенкъаI йишди районни кIалхозбышис, совхозбышис, мактаббышис манкъве хаIдын кумагбы гьувы. Мани девыре цIаIхбышди хиваршее гармабы, йыIгъар, кIлуббы, манзикбы тезелемишаъа гидгъыл. ЦIаIхни хивее кIылин швейный фабрика, «АIттагъай» донан ташкилат, магазинбы, кафебы ачмишаъы. ХаIббанани инсанаршис иш джигабы гьувы. Тезеба гивийгъални ишкараршис пылыкван кумагбы гьувы. Шас йикIел’ водун, мана ишлемишехьени ташкилатни гьихъа са кьатар йишди миллетни инсанаршин илёйзар ыхьа. Манкъусахъа гьаарна са дердиква арайли ыхьа. Гагьана хав аляъасын кумаг ыкканна, гагьана ушахыс хIадхъий гьаъас ыкканна, гагьана даватбышисын пыл ыкканна, гагьана маалидже гьаъас ыкканна.
АIриф ЫIмарове ненкеджад, ненкъукIледжад деъэш увгьойн деш. Мана джус зиянеехъа аIлгьааIс гьазирра эхьи ыхьа, амма кумаг гьеххъас арыйни инсаныс джуке аIхан кумаг, мислягьаIт гьооли вухьа. Манкъусахъа дагъамийвал’бышиква арына инсан , разийра айкIан ыхьа. Анджах, манкъуна кьиймат хаIббананкъукIле дяацIавхьана. Къийнад манбыше эйгьи деш, гьайни инсане, зас гьайна югвалла гьавъу ва манкъулхъа раIгьмат къухооли деш. Мана мебна хабар…
ГьаIкIедад джаIмаъатни аIрее манкъухъаб хаIбна гьуIрмат вухьа. Манчихъа гора, мана депутатна Дагъыстанни 1 хъотIулыйни Халкьни Маджлисеехъа сечмишаъы. Мааъар ишлемишехьенкъаI, цIаIхни миллетиква багълыданан хаIдда хайирыкван ишбы къадже. Зы ооъад аIлядхъийнчиле гъайре, манкъуни гьаIракатбышиква «НУР» кIазет ачмишаъы, фольклорный ансамбль «Алшан» къурмишаъы, китаббы къайиккас кумагбы гьувы ва медынбы.
АIхреедын джун сенбы АIриф ЫIмарове ыIлимыс къадсыр. Мана ишлемишхьес Дагъыстанни девлет техник университетехъа ишлемишхьес хъортIул’. Гьале махъа хъалессе гьихъа манкъвее экономикайни ыIлимна кандидатна диссертация мудафия гьавъу. Университете ишлемишехенкъаI, хаIдда экономикайква, тиклийква быгълыданан ыIлимын монографиябы, макьалебы одкIун. Сабара сенбына мана кафедрайна хааIрна ишлемишхьа. Гойне сечмишауна университетни архитектурайни факультетна деканна. Мааъар ишлемишехьенкъаIр джуна дераджа ахтыба гьувааджы. Мана чалышмишхьана джуни миллетни джегьилершис лазымни джигее хыл’авхъас.
АI. Ымаровыхъад хаIдда ниятее аххъыйн ишбы ыхьа, анджах аIджалын маджал гьидёвуйн . 2024 сенни июнни вуза мана раIгьматыххъа аркIын.
