Сенни аIхыре «Нур» кIазетни ишчершина гуджнаквани иш-пешеена, диндж денана вахтобна. Редакциейни коллективын быкырехьени сенийн екунбы ыIхыйниме, цIедни сенее къаджесди ишбышди гьаIкIее хабар гьувойниме ва хъалесди сенийсын кIазетис подпискабы гьаийниме халкьыкван горушбы алгъайгьи. Гьайни йигъбышил’ ши хааIрни редакторука Байрам АIбдуллаевыка сафарыйква Бабаюртнийий Къызларни районбышее вухьа.
Къийна Бабаюртни бинабышил’ хаIбба Рутул районейнче кочмишувхьайн инсанар ешемишоохьи. Манбыше мааъаб юрд абчыйн хаIдда сенбы водунбы. ГьаIшде са вахталийни бинабышике чIакIын хивар хъыхьа. Хиваршее йыIкьнекин мактаббы, инсанаршина сагъламийвалла гьувааджесдимее амбулатория, ФАП-бы, маданиятын клуббы, СПК-бы ишлемишехьи. ХаIббананбышин доланаджагъ хусулсу тасарруфат гьуваджыйка багълыда.
Камбулатна хив хиваршини джаргее цIеббыйна вобна. Къийна хивее кIуссурбышиква саджигее муIхаIхбыб ешемишоохьи вобунбы. Аварбыйий цIаIхбы саджигей гуд’мишоохьен хаIдда сенбы водунбы. Манбышди аIрайл’ни достваллайс, муIгьубни алаакьабышис зы гьаммаше ахтына кьиймат гьооли. Манбы са аилейн уIзвубы хьинне ёлавуIххъаI.
Хивни йыIкьнекни мактабее редакциейн ишчер чакба-чакба воохьенбы ва шыгыртаршиквайий маъаIллимаршиква хъызааханбы. Манчиле гъайре хивни джаIмаъатни дагъамийвал’бышиква дёлесвалейнче танышоохьенбы. Редакциейн мактабее гьар сен джурабаджура тадбырбы, горушбы, конкурсбы алгъайгьи. Гьини элеес илгъечIуйни горушее мактабни директоре Рамазан Османове ши гьинчиле сабара вахтна гьихъа заIгьматни предметын дарсыбы ыккейсдимее тезеда алятIуйни дезгагьбышиква танышавъу. Манкъуни увгьойка, манбы геледжагъыл’ ушахаршин джурабаджура саIнаъатбышилхъан аIшкь хаIдхъаъасдиме хъадыйн дезгагьбы водунбы. Гойне хьинне манкъве шас мактабыс ва хивни джамаъаIтыс тезеда аляъани спортзална гаф гьавъу. Объект гьайни сенни аIхырелхъассе истифадейхъа хъелесынва Рамазан маIъаллиме къейдау.
Ленинна бина Бабаюрт адчыйни хиваршини аIрайл’ энки хаIбна вобна. Мааъаб Аттални, ДжинаIгъни, Калел’ни, Коршни хиваршейнче хъабыйнбы ешемишоохьи. Калел’ни йыIкьнекни мактабее редакциейн ишчер гьаммаше тентенейква къаршиламишааъа. Мактабее геед баджарухукван маIъаллимар ишлемишоохьи вобунбы. Манбыше шаквани горушее джони сабара мисалабышике шас гаф гьавъу. Манбы ишиква, мактабни ыIмырыква ва хивыква багълыданан мисалабы ыхьа. Горушни аIхырее мактабни коллективын ши «Нур» кIазетыс гьауйни подпискайква шадавъу. Манбыше гьаммаше хьинне, хъооIни сенийсыд югун подписка гьау.
Бинайл’ ишлемишехьени ФАП-ын инсанаршина сагъламийвалла гьувааджесдимее хаIбна иш вуккекка. Манчис хаIбвалла Гул’багьар Юсубовае гьааъа. МаIнкъее къийна хиваршее ушахаршис ыIхыйхани вейбаршини аллана хабаравъу. Гул’багьар дохтурни увгьойка, ушахаршини аIрайл’ чIырывалла еймиш девхьесдимее вуккеккана профилактик иш таамувхьа вобна. Полиомиелитын вакцинабы гьау таамувхьайнбы.
КIазетни ишчершин энки хаIдын горуш Тезе Быршни хивее илгъечIу. Мааъаб ши хивни джамаъаIтыква, администрациейни хаIрынкъуква ва амбулаториейни регьберыква ва ишчершиква хъызаахы. Къийнийни йигъыл’ быршбы хивыхъад статус дехьайнчин нарагьат гьааъа. Манчиква багълыбана гаф гьааъанкъаI, хивни администрациейни хаIрынкъве Садил Селимове увгьойн: «Сувале гьиняхъа халкь кочмишехьи гьоIкуматни программайква 70-ъэсди сенбышее гидгъыл. Амма манчихъа ил’дяакы, къийнад шахъад статус дешин. Мана мисала йишдимее гееб вааджибна вобна. Ман дехьайхъа гора, шаке хивее гьиччуджад гьаъас аIха деш. Манчиниме ши иш суддейхъа хъуво. Къийнаб мана мисала сасуралхъа хъувхьа дешда. Гьалекийс ши умудуква ешемишоохьи вобунбы.
Къийна магьаIбна вазият садджу Тезе Быршни хивейджаб дешобна. Манчиле савагьийда, инсанаршихъаб пропискайква багълыбана дагъамийваллаб вобна. Манбышихъа манчисын имканбы аху деш. Быршбы учотейхъа иккебчIесдимее, хивыле къырагъылхъа гьавайкIан».
Хивее ишлемишехьен амбулатория Рутул районни маркази хастаханаани ыIгьтее водун. Манчис УмаIргьаIджий Керимове хаIбвалла гьааъан хьебцIалиле агъаллан сенбы водунбы. Заквани горушее манкъве увгьойн: «Амбулаториейн 3500 инсаныс хидмат гьааъа. Манбышди аIрайл’ 875 ушахар вобунбы. АIхырейни сенбышее бинабышил’ хаIбба йикIени, оIбкабышди ва менни азарбышикван чIырынбы растына хъавайли. Манчиле гъайре ОРВ чIырынбыб кIылба воохьи деш. Манбышис маалидже ыккекка. Йишда къийнийна энки хаIбна дагъамийвалла дохтураршикена кеситийвалла вобна. Масалан, гьаIшде шас лазымра ворна джанана дохтур, едаршини чIырвал’бышда дохтур. ОIгийл’ педиаторна зыний ишлемишехьена. ГьаIшде ман штат къацIадкIунийн. Едар ши Бабаюртни хастахаанейхъа къихооли. Хъийгъалетти, сениле-сенилхъа ушахаршин ухохый кIыл’ хъехьи. Гьийд сенис 70-80 ушахний дюнйейлхъа адайлен. ГьаIшде манбышин сай хьебни къатна кIыл’ хъыхьа».
КьоIдъэсди йигъыл’ ши Къызларни районе ишлемишувхьа. Къийнийни йигъыл’ Къызларни районе хаIбба цIаIхбы ешемишоохьи. Манбыше мааъаб юрд абчына хаIдда сенбы водунбы. Районни Мирный донани хивее хьебцIалиле агъаллан цIаIхбышин хизанбы водунбы. Манбышин геллесынбы Мишлешни хивейнче абкIынийнбы вобунбы. Хиваршее редакциейн ишчер КьурбанаIли Ибрагьимове ивийкаравъу. Мана геер хааIрна ватанпарвар, динэгьлий ворна. Гьавъуна заIгьмат сувабыс оокIанна. Мирный хивее агъсаххъаларшикван тентенейкван горуш илгъечIу. Манбышди аIрее гьоIрматукана динэгьлий Юсуф Шихбиядовыр ыхьана. Манкъус гьайни сен гьаIдж къилмишааъас кьисматхьа. Аллагье манкъун гьаIдж кьабыляъан. Юсуф-гьаIджийе шас Къызларни районе мугьуIбыква ешемишехьени цIаIхбышди ва менни миллетбышди аллана хабаравъу. Горушни аIхырее манкъве редакциейни ишчерше вуккеккани ишис ахтына кьиймат гьуво, коллективыс угъурбы аIрзау.
Шинад горушбышеехъа сабыйнбышис гьийгъанче хъооIни тезе 2026-ъэсди сениква табрик гьавъу. Манбышис джанана сагъвалла, хизанбышее болвалла аIрзавъу!
