Апрельни санчиле Россиейл’ юххьанийн джаванаршин эскереехъа хъообтlулый гидгъыл. Мана иш июльни вузани 15-чил’ таамувхьес. Гыргыба саджигее юххьанни хъоотIулей Россиейл’ 160 000 джаван эскерейхъа аIльгьаас.
Республикайни гьарби комиссариатын гьувойни маIлуматхъа гора, Дагъыстанейнче эскерийвалейхъа ёкьуд аазырылхъа авабкьырыйн джаванар оIтирааъас. Ватан къорамишаъас аIлгьаIнбышин ешбыд гьайни сенеле агъалла хъыхьа водунбы. ГьаIшде мани сийгьейхъа 18 — ни ешиле 30-ни ешилхъа гьибхьырыйн джаванар гябакIа вобунбы.
Республикайни хааIрынкъве С. Меликове эскерейхъа хъоотIаланбышда иш гивгъалассе гихъа, шагьарбышдийий районбышди вукIлелинбышикван иджлас алгъавгьу. Мана къийна республикее мани сардан вуккекани ишбышике йишонхьа. Манчика багълыбана иш дурустба вуккейсдиме, махъа сабыйнбышилхъа тапшырыгъбы гьуво.
Гьайни сен юххьан Дагъыстанейнче эскерейхъа, Ватан кьорамишаъас вуххъаIнбышин сай, шацыйхъа иляканкъаI, хаIдын водон. Ман джаванаршини аIрайл’ эскерийвалейхъан гьавас хаIдхъыхьайка багълыда. Гьихъа джаванар эскерийвалике дюгул’ний воохьенбы. ГьаIшде маIгьаIбынбы тека-сейракба растына хъавайли. Къийнийни йигъыл’ повестка хилехъа алятIумее, гьагуйни вахтал’ военний комиссариатбышейхъа хъавайленбы.
ГьаIшде джаванарше са сенна эскерийвалла гьааъа. Гойне хьиннеб манбы СВО алябатIа деш. Манбы тезеда Россиейлхъа аликкыйн регионбышейхъа кьухооли деш. Манбыше динджини регионбышее эскерийвалла вуккейс.
ЦIаIхни халкьни джаванаршини аIрайлиб эскерейвалла гьаъас гьавас гьагванбыб гьеххалика вобонбы. Къийна Рутул районни ЦIаIхи дерайл’ни хиваршейнче хаIбба джаванар Ватанни гьийд бордж хъелес абкIын. АIл’гьаас гьаIзирувхьайнбыб кIылба дешобунбы.
Джуни хаишиква эскерейхъа абкIынийнбышда сайир ЫIмранов ЫIмран ворна. Манкъуна кок Гыл’мецIни хивейнчена вобна. Манкъве Уссурийскни шагьарее эскерийвалла вуккейс. Редакциейни ишчерше ЫIмран гьайни йигъбышее МагьаIчкъалайни аэропортейнче тентенейква эскерийвалейхъа оIтирау.
Шаквани горушее ЫIмране увгьойн: «Зы эскерийвалейхъа аляратIава, нимеехье шадра ворна. Зы йизди хааишиква аIл’гьаа. Гьаммаше Ватан йикIел’ аххъас ыккан. Ватан кьорамишавъуй, гьар адамийн бордж водун. КьоIдъэсыд, эскерийвалла адамейршин мактаб водун. Мани мактабейнче гыргына илгъечIес ыккан».
Ши йишди сураке эскерийвалеехъа абкIынийнбышис угъурбы аlрзаъа. Манбышис, Ватанни гьийдын бордж адамейрше хьинне хъуво, сагъба-саламатба хайбышеехъа савкlаласын дилягбы гьеххъа.
