Инсанын Ватанылхъан аIшкь кIыл’валике гийгъал. Мана хаIрхъехьи летти хизанылхъан, хивылхъан, юрдылхъан мугьуIб сыкIылдад гуджлемишехьен. Къийнийни йигъыл’ йишди оIлкее гьаIкIен ватанпарварар вухьай СВО иштыракчерше субутаъа водун. Манбыше джони игитийваликва,гьаIракатыква, дирибашийваликва йишда хаIбна Ватан Россия къорамишааъа.
Йишди эскерарше Украинайл’ душманаршиква вурушбы ыккеккан ёкьудъэсын сен водун. Манбыше нишихъаджаб ил’дяакы, хаIм – йигъна джона дагъамна иш къооджи. Мани карее ши СВО воохьени офицераршис, прапорщикаршис, салдатаршис ахтына кьиймат гьооли.
Ярахни хусуси операциее иштыракаъана гьаарна инсан ахтыни доюс лайикьра ворна. Гьини элеесда йишда гаф манбышди санкъуни гьаIкIее вухьес. Мана Калел’ни хивейнчена джегьил’офицер, лейтенант АIлиев Шамсудин Фергьадна дих ворна. Гьайни дёлесвалей мана гьокуIматын хаIнни наградайс, Жуковни медалыс лайикьау.
Ш. АIлиев Калел’ни хивее маъаIллимаршини хизанее едике ыхьа. 2006-ъэсди сен хивни йыIкьнекни мактабни сифтыйни сыныфейхъа аркIын. 2015-ъэсди сен югни кьийматбышиква мактабын ючIудъэсын сыныф быкырау, Каспийскни шагьарее энергетикайни колледжейхъа иккечIу. 2018-ъэсди сен манкъве колледж чIаIвау. Гьаманиджар сен Шамсудин ДДТУ кьабыл’хьа.
Са сеныле хъийгъа манкъве Россиейни Миноборонайква цIеддыйн контракт одкIун.Мана къуллухааъас Башкириейхъа къахову. Мааъар ишлемишехьенкъаI, Шамсудине джун хъаIдхъый артмишаъасдиме саIнаъатбы Тюменни инженерар гьаIзирааъани военный училищейхъа хъуво. Мана джуни мураадылхъа гьирхьыл’на, училищейхъа кьабыл’хьана. 2023-ъэсди сен Ш. АIлиеве чIаIрани дипломука училище таамау.
Гойне мана мана къуллухааъас ЮФО йаIххъыл’ гьау.Шамсудине инженер-гьуIджумни дестейс камандирийвалла гьааъа гиргъыл. Шаца мана джуни взводыква СВО къахову.
Гвардий лейтенант Шамсудин АIлиев геер дирибаш ва иш дурустба ваацIана офицер ворна. Мана чалышмишехьена саIнаъатын сирбы джунитаIъбейни эскераршилхъа хъевлес. Гьайни дёлесийвалей Ш.АIлиев Россиейни Федерациейни Президентни Владимир Путинни кьарарыква Жуковни медалыс лайикьра къаджы.
Мана табрикаъасдиме, ши гееб чалышмишувхьа связылхъа хъигъебчIес. ГыргынкъукIле ацIани сабаббышихъа гора, шаке ман гьаъас аIхы деш. Манчихъа ил’дяакы, манкъуни деккиква, Фергьад АIлиевыква йишонейбхьа. Мана дихее алятIуйни ахтыни наградайква табрикау. Ф. АIлиеве шаквани ихтелете увгьойн: «Шамсудин гьаIшде СВО ворна. Манкъве залхъа зенг джухъаб вахт вухьайнкаI гьаъа. Манкъуни сураке дешинбы деккананбы. Авхуйни эскераршисыб зы саламатийвалла аIрзааъа. Табрикауйхъа гора, сагъба вухьенбы. Шу гьавъуна гаф, зы манкъулхъа гьивхьарааъасда».
«Нур» кIазетни редакциейн Шамсудин АIлиевыс, вуджее хаIбвалла гьааъани взводни эскераршис джанана сагъвалла аIрзааъа. Манкъве алятIуйни ахтыйни наградайква ши джуни гогьар — гьамбазаршис барака гьааъа. ДаIвъий таамувхьа, хаахъа хъавалесын дуъаIбы гьаъа.
