Гьайни йигъбышее тентенейква Республикайни эскерийвалехъа оIтирааъани пунктейнче ваIщилхъа аваркъыл’на джегьил’ къуллухааъас аттамишхьа. Манбыше къурул’ни къошинбышее, ВДВ ва ВМФ эскерийвалла гьааъас.

Эскерейхъа аIл’гьаанбы Дагъыстанни милли сиясатни ва динбышди ишбышди министре, Россиейни КьаIгьрамане Темирлан Абуталимове табрикавъу.
« Къийна шу ваджибын аддым гьау. Эскерейхъа гьаркIыний гьаммаше адамийни дараджайлхъа гьирхьылий гьагван лышан ыхьа. ЧIакIынбышис гьуIрмат гьееъэ, адалатыйвалла гозетееъэ ва шавусый лазымда кумагеъэ. Йишда гудж гьуIрмате, инаме ва садибыйвале вобна. Къийнийни йигъылхъассе СВО гьаагуйни игитийвалис «Россиейна КьаIгьраман» званиейс 15 дагъыстанны лайикьаъу. Манбышди джомардийваллайн Ватанниме джан гиххьес гьазирба вухьай агъмишаъа. Манбышди гьаарынкъве оIлка къорамишаийниме дагъамни шарааитбышил’ энки югун хассятбы гьагу. Гьасре манбышди игитийвал’ни гьаракатбыше шос югба къуллухавъуйниме йикIбы гьеледжен», — Темирлан Абуталимове увгьо.
Цывылийни эскерийвалейхъа хъоотIални кампаниее Россиейни армиее къуллухааъас 3200 агъаллана дагъыстанны къахилес. Манбышин къуллухавъий, оIгийл’ хьинне, 12 вазна вухьес. Республикайни военкоматни увгьойка, джегьилер къуллухааъас СВО зонэйхъа ва Россиейни тезе регионбышейхъа оIтирааъас деш.