Майни вузани аIхрее Россиейни гыргыни йыIкьнекни мактаббышее алидни сыныфбышин ушахар къооккан маджлисбы илгъечIу. Мани йигъыс къадсырыйн шадлыгъбы, мактаббышее гейдни ярашугъыква алгъавгьу.
Йишди, цIаIхбышди, мактаббышед ман йигъынджагъбы гьаIракатука алгъавгьу. Гьайни сенийна аIхреени зенгыс къадсырни маджлисбышин линейкабы ДжинаIгъни, Мишлешни , Муслагъни, ЦIаIхни, Гыл’мецIни йыIкьнекни мактаббышее ва Лекни быкырдехьайни йыIкьнекни мактабее майни 22-24-чил’ ыхьа. Мани аIхреени зенгыква багълыбанани маджлисее маъаIллимарше, хиваршини администрациейхъа гядакIвани ташкилатбышди къуллухчерше, ушахаршини деккяршейий едярше, хивни джамаъаIтын иштыракаъу.
ХХ-ъэсди асырни кьоIдъэсди сурал’ аIхредын зенг гыргыни мактаббышее 25 майил’ний ыIхыйхан. Манке мактаббышее хъаIдаххъани ушахаршин сай къат-къатна гьеххада ыхьа. КIыл’ба . гьар мактабын 20-25 ушахний сенис къекка. Гьаманчиле хаIббаб 8 сыныфын шыгыртарни къоокка. ГьаIшде ЦIаIхни дерайл’ни гыргыни мактаббышин къооккан ушахар саджигеехъа савъээ, оIгийл’ни са мактабынбы мееганбы вухьес деш. Сувал’ни маIгьалыл’ аIхреени сенбышее , эгьес эйхьи, дагъайдни сыныфбышин мактаббы – Коршедын, Хьойиккедын, Атталын, ХыIягъын ушахар дешва утIумауйнбы. КьоIдъэсын сен водун Миххьейн йыIкьнекин мактаб утIумаыйн. Манчин ши шадааъа деш. Мактаб дешди хивее ешайиш дешин.
Гьихъа йишди хиваршин мактаббы гыргыни хъаIдхъийни гьагуйбышее районе, республике югни сыранее водун. Гьар сен мани мактаббыше хаIбба билигнан, кар ацIан ушахар къоокка вухьа. Мани мактаббышее тербие, ацIаал’ алеетIуйни джегьилерше Россияйн джурабаджур чIакIын университетбы , институтбы, академиябы таамау. Къийнаб манбы югни къуллухбышил’ ишлемишоохьи. Къоокан ушахаршин сай кIылда ыхьейид, ман югун аIдатбы гьаIшдед йишди мактаббышее гьуваджы водунбы.
Майни вузани кьоIдъэсди сурал’ аIхреени зенгыс кьадсырыйн маджлисбы мактаббышди регьберарше ыккы. Манбы мактабни майдама илгъечIу. ЦIедда интаIгьамбышеехъа къавуккыйни ушахаршин сайбы хъаIдхъы. Гойне ушахар мактаб таамауйква табрикаъан аIтрафлы чыхышбы мактаббышди директорарше: Нажмуддин ГьаIджиеве, ЫIсмаыл’ Мамедове, Мустафа МагьаIррамове, АIбдулгьаIмыд’ ГьаIджиеве, ГьаIджиыIса ЫIсаеве, Казим ВаIгьидове чыхышбы гьау.
Манбыше къоокканбышис ОГЭ-ше, ЕГЭ-ше угъурбы аIрзуламишаъы. Мани маджлисбышее шыгыртар табрикаъан чыхышбы мактабни маъаIллимарше, хиваршини адмистрацебышди чIакIынбыше, къоокканбышди деккярше, едярше гьаъы. Хурни сыныфни ушахарше шечIбы хъаIдхъы. Къооккани сыныфни ушахарше маъаIллимаршини дойилхъа югун джуваббы увгьо.
Манчиле хъийгъа , хурни ушахарше къокканбышис тIетIбы гьуво, кьокканбыше хурунбышис пайбышикван пакетбы ва оIюнджагъбы гьувы. Ман таамхьайле хъийгъа, тамаше гибгъыл. Мааъад гьекIуйбы, мыкIар гьаый гидгъыл. ЧIакIни сыныфни шыгыртарше джони маъаIллимаршиква, деккяршиква едяршиква мыкIара гьаъы, едигарысын шикыл’бы цIыцIаъы, хаIйбышеехъа шарар къайиккы. АIхрее манбы гыргынбы байрамни истолылхъа сабы.
«НУР» кIзетни редакциейн Сувал’ни маIгьалыл’ни мактаббышин къавуккыйнбы аIхреени зенгыква табрикааъа. Инам гьаъан, югун йиссейн хъаIдхъийн аIдатбы манбыше гьуваджесынбы. Вушди аIреенче джамаъаIтыс, ЦIаIхни дерайс , республикайс. оIлкайс хайир гьеленбы хаIббабы вухьес. Шос угъурбы гыргыни ишбышее аIрзуламишаъа.
