Гьар сен, июнни вузани аIхреени базарни йигъыл’ Росиияйл’ джегьилершин йигъ алгъайгьи. Гьайни сен ман 27-ъэсди июнылхъа хъооI водун.
Йишди гьоIкуматыл’ Дагъыстан джегьилер хаIббанана республика вобна. Джегьилер гьоIкумат гьаIракатеехъа адачена гудж вобна. Къийна ши манбы хъобкуни йаlххъылхъа гявгье, ишебашеехъа авъэ , инам гьаъан гьlокумат къийхъа гьаlракатеехъа хъалесын. Зас ыкканан йишди цlаlхбышди джегьилершед джон зор , джон гьаlракатбы, джон гьунарбы чlакни къуллухбышил’ гьагуй. Джегьилершин ешайишид гьааъани пешейке, санаъаIтыке хаIдданани вахтал’ аIслыда эхьи
Иш, ыIмыр гьаIракатеехъа абаччен лышан водун. СанаъаIт сечмишаъассе гьихъа, гьаарункъукIле джун гьаIракатбы ацIахьес ыккан. Ишихъаб югнайий писда воохьена дешки. Иш югна мана вобна, агар вакIле мана ваацIахье, манчин йигъна хизан гудмишааъахье, манчике гъу лезет’ аляатIахье. Къийна ишилхъа эчIесдиме, къулухылхъа илгъечIесдимега, не югун «калле», не югна дайий, нейир кокун джиб ыккан. ЦIеббыйна йаIхъ текасейракни джегьилис кьисматоохьи. Анджах мана хъобкуна йаIхъ вобна. Йишди миллетни джегьилершин гьихъа абкIыний, джони гьаIракатбышике, ацIаалике ва гьунарбышике саджу аIслыда. Мани каре ши юзиагъба вобунбы. Йишин джегьилер дагъамийвал’бышиле хъаIвайкьан деш.
Къийна сабара цIаIахбышин джегьилер Ватан ва манчин ихтиярбы хаариджи оIлкабышди нацистаршини режимыке къорамишаъа Украине аIлгъаани СВО вобунбы. Ватанын , йишин, йишди ушахаршин къийхъийн йигъ югун, саакитын, болын ихьесдимее манбыше джон эн аIзизын джан махъа гийхьи. ХаIббанан мааъаб эскерна къуллух гьааъан йишин джегьилер гьоIкуматни, республикайни орденбышис, медальбышис лайикьавъу. Гьел’бедти, нимеега шас ман кар дийкынейид, манбышди аIрее гябтIуйнбыб, оз-тооз дена батмишивхьайнбыб вобун. Ман деккини, едини, гогьар-гьаммазнимеега хаIдын хаджалат ва ыIмыррысын уцIур водун.
Ши чалышмишоохьенбы, манбы кIеливхан гьидяаъас, манбышди гьаIкIее окIанас ва чечняйс гивхьес.
Манбышиле гъайре, шахъаб джурабаджур къуллухбышил’ санаъатбы гьаъан джегьилер — маъаIллимар, дохтурар, индженарар, ишкарар вобунбы. Манбышда сайир джегьил’ маъаIллим Эл’мира ГьаIджимагьаIммадовна ворна. Мана Къызларни шагьаре едике йихьа. Дек’ Муслагъни хивеенчена ворна, ед’ – Гыл’мецIни хивеенчена. МаъаIллимни санаъаIтылхъан гьавас манбышди нассылни эбее водун. Гьайни сен маIнкъыни йичи Индира маъаIллима республикайни конкурсе «Учитеь 2026 года» цIеббыйна джига авхъу. ГьаIшде мана федерал конкурсе Дагъыстаныке иштыракаъас гьазиреехьи ворна. Мана йишди халкьнимеега хаIбна хошна хабар вобна. Аазырбышиква маъаIллимаршини аIрее маIнкъын ацIаал’, методиква, дарс ыккий ва ушахаршис хаIдхъаий, джони джанееъа ацIаал’ ишираъас аIхий маIнкъын гьаIракат ыхьа. Комисейни журийн манчихъа гора Индира ГьаIджимагьаIмадовайс 1 джига гьувы ва мана дойис «Учитель 2026 года» лайикра къайджу.
Месала вобна: «Эч, эчени ювыке аIкьанахъа къоъоохьа деш». Эл’мирар джени йичейни говал’ аIл’гьаа ворна. Ул’ хъидвийхьарна. Э. ГьаIджимаIгьаммадовае Къызларни шагьаре 2013-ъсди сен йыIкьнекин мактаб таамаъы. Гьамани джар сен мана Къызларни педагожи колледжехъа иккейчIу. Ман колледж 2016-ъэсди сен чIаIрани дипломыква таамаъы. Шагьарни са мактабее дагъайдни сыныфбышда маъаIллимна ишлемишеехьи гиргъыл’. Мааъад джени санаъаIтын къулай гьалед артымишаъы. Мактабни шыгыртаршини, маъаIллимаршини аIрее гьуIрмат къазанмишавъу.
МаIнкъын маъаIллимын гьаIракатбы ва ацIаал’бы къадже , Эл’мира маъаIллимна ишлемишийхьес хусусы мактабеехъа «Планета детства» хъортIул. ГьаIшде мана мааъар дагъайдни сыныфбышда маъаIллим ворна. МаIнкъыхъад джен дарсбы гьелен методика водун. Дарс гидгъылыйле аIхреехъаме ушахаршина фагьам дарсал’ воохьи. Ушахаршика маIнкъее «иттуна миз’» зарабаджаб тIабалавъуна. Эл’мира джелер ооъар ишлемишеехьи. Тезе-тезе хъаIдхъий хъаIдхъаъан усулбы ва методбы хаIдхъехьи. Сабара вахт аIрайле абкIынмеега, маIнкъее дарс оIюнни къайдайл’ ыккекка. МаIгьдын дарсбы ушахаршис хошда хъадайли. Къызларни шагьаре, республике мана ишлемишехьен мактаб югни джаргеедынчис гьыIсабехьи.
Э. ГаIджимагьаIммадовайни фыкрее ааIли мактабна диплом алебт1уй вобна. Мани карее ши маIнкъыс угъурбы а1рзуламишаъа.
Эл’мира маъаIлимыква саджигее джегъилершини йигъыква ши гыргын цIаIхбышин джегьилера табрикааъа ва манбышис джанана сагъвалла ва угъурбы аIрзуламишаъа.
