Гьайни хъаIдхъийни 2023-24 сенее цIаIхбышди, рутулбышди, агъуларшини мактаббышди ушахарше тезеба едини мизяаршикени всероссийской олимпиаде иштыракаъы. Мана онлайн формате илгъевчIу. Мани мизяаршикена олимпиада тезеба алгъавгьуйхъа гора, гьайин сен манбышин пилотный проект хьинне ыхьа. Манчихъа гора, ман 8-9 сыныфни шигыртаршини аIрее илгъечIу. ХъооIни сен ман 8-11 сыныфбышди аIрее илгъечIес. Мани олимпиадайни гьаIкIеедын маIълумат ва манчике гьиджо хайирый гъамувхьайни шигыртарше алеетIас, ши «Нур» кIазете ва медни соцсетьбышее хьулехьее чапауйн.
Мана гьайни сенийна олимпиада М.К. Аммосовни дойил’ни Северо-Восточный федерал университетын (СВФУ) къурмишавъы. Дагъыстанее манчин Дагъыстанни девлет педагъожи университетыквайий (ДДПУ) Дагъыстанни девлет университетыква (ДДУ) алакьабы аххъы.
ЦIеддыйн гьагван (демонстрационный), кьоIдъэсын онлайн режиме илгъечIу. АIхреедын этап едини мизяаршикени олимпиадайн Дагъыстанее илгъечIу.
ЦIаIхни, агъулни, рутулни мизяаршикени олимпиадайн екунбы ДДПУ, авхуйни мизяаршикен ДДУ ыхьа.
Гьайни сен цIаIхбышике мани олимпиаде 32 ушахее иштыракаъы. Манбышике финалеехъа 14 ушах хъигъечIу.
ЦIаIхни мизекени олимпиадайна хааIрна ДДУ-на маъаIллима, «Нур» кIазетна корректор Зарема Исаева йихьа, ушахаршин едини мизекен ацIаал’бы ёхламишаъан тапширыгъбы Кьурбан Омаханове гьазирау, аппеляциейни комиссиейна уIзву «Нур» кIазетна хааIрна редактор Байрам АIбдуллаев ыхьа.
Джигайл’, Калел’ни мактабын ушахар олимпиадайс ТIагьир маъаIллимейий Гуляра маъаIллимае, Теземуслагъни мактабын Сафар маъаIллимейий Фаизат маъаIллимае, ЦIаIхни мактабын Руслан маъаIллиме, Мишлешни мактабын Мина маъаIллимаейий Эл’зара маъаIллимае, Гыл’мецIни мактабын Навруз маъаIллиме гьазиравъу. Муслагънийий, ДжинаIгъни, Лекни мактаббышди ушахарше гьайни сен иштыракаъы деш.
Манчихъа ил’дяакы, цIаIхбышди мактаббышди ушахарше олимпиаде югун натийджабы гьагу.
Гъамувхьайнбышис цIаIхни, агъулни, рутулни мизяаршикен дипломбы, медальбы мартыни 1-чил’ ДДПУ гьувы. Манбы гьелес мани маджлисеехъа СВФУ-на проректор, ааIлим Пётр Иванов, СВФУ-на аали мактабеехъа гьазирааъани управлениейна аIсас санаъаIтчий Олимпиада Иванова абы. Манбыше ушахар ва джос дарсбы гьувойн маIъаллимар табрикавъу ва олимпиадайни гьаIкIеедын маIълумат гьувы. Мани маджлисее ДДПУ-ни ааIлимаршед гьаыйн. Гойне ушахаршис дипломбыйий медальбы гьувы. 14 диплом цIаIхбышди, 1 агъуларшини, 1 рутулбышди ушахарше алеетIу. Дипломбы, медальбы ушахаршис П. Иванове гьувы ва манбышикван шикыл’бы едигарыс цIыцIаъы.
Чини аIрее цIеддыйн джигабы ГьаIсилова Севинджейий Магьумудова Шагьперийе аххъы (Калелин йыIкьнекин мактаб).
ЦIеддыйни дараджайн призёрар ГьуIрий Асланова, Бести АIлиева, Мавлида Мусаева вухьа (Калелин йыIкьнекин мактаб).
КьоIдъесди дараджайн призёрар Альбина Наврузова ( ЦIаIхын йыIкьнекин мактаб), Севил’ Баширова, Джамиля ГьаIдаева, Хадийджат Эмирджанова, Заур Къубалыев (Теземуслагъын йыIкьнекин мактаб), Рашид Давудов, Ибрагьим Джанаев, Наиля Къаратова, Сабина Керимова (Калелин йыIкьнекин мактаб).
Манчиле хъийгъа абыйни мигьманарше олимпиадайни иштыракчершиква саджигее шикыл’бы цIыцIаъы. Гойне ушахаршис университете ва манчини майдама экскурсие алгъавгьу.
Гьел’бедти, агар университетын мана маджлис гьалеб марахыква алгъавгьунахьий лапджад югданий ихьес, няъас увгьее мани олимпиадайхъаб хаIбна дараджа вобна. Ректорейид, проректораршед, мебыни университетын къуллухчершед иштыракаъасний лазымда. Двухийвалла гьааъас вуккан деш. АIкьананче абыйн ушахар чини къайдайл’ къаршламишааъас вуккан.
ГьаIмагьабна джаб олимпиадайс къабсырна маджлис 2 мартыл’ ДДУ илгъевIу. Анджах шааъаб ушахар джон аIзизынбы хьинне къаршламишавъу. Анджах манн аIсас кар дешодун, анджах эсер манчин гьелен.
Манчихъа ил’дяакы, йишди ушахарше лап югун натийджабы гьагу. Манчин эйгьен йишди цIаIхни мизехъад геледжагъ водун.
«Нур» кIазетни редакциейн, районни хъаIдхъийни управлениейн, мактаббышди дирекциебыше олимпиаде иштыракаъыйн ва гъамувхьайн ушахар табрикааъанбы! Манбы гьазиравъуйни ушахаршикIлед сагъул- варул эйгьи.
