Февральни 21-чил’ дюнйейл’ едини мизяаршин Йигъ алгъайгьи. Аллагье гьар инсаныс едини никнека саджигее миз’ гьооли. Мани мизеква ши ющенааъанбы, сана-санкъуни фыкреедын, йикIеедын фыкырбы ацIахье. Мизеква ши ацIаал’, тербие , санаъаIт аляатIа. Мана шас гьувойн аманат водун.
Дюнйейл’ хаIдда мизяар водунбы , амма гьаарункъус джуна едина миз’ гыргынчиле аIзизба вобна. Нимеега вакIле хаIдда мизяар ацIахье, гьаманимеега йигъын билиг ахтыхъехьи.
Мани йигъыл’ дюнйейл’ едяаршини мизяаршис кьадсырыйн йигъынджагъбы илгъечIи. Гьел’бедти, йишди республикейид манбы гьаIракатыква илгъечIи, няъас увгьее йишди регионе хаIдда мизяар водунбы. Мани дагъыстанни мизяаршина сайийб цIаIхна миз’ вобна.
Рутулни ва Бабаюртни районбышеени цIаIхбышди ушахарше хъаIдаххъани мактаббышее мани байрамыква алаакьан йигъынджагъбы илгъечIу.
Февральни 21-чил’ Амрагь Кьурбановни дойил’ни Гыл’мецIни мактабее едини мизяаршини Йигъыс къабсырна маджлис илгъевчIу. Мани маджлисее мактабни маъаIллимарше, ушахарше иштырак гьаъы. Махъа сабыйнбышди гьийд цIаIхни мизес кьадсырыйн чыхыш РФ-ни шааираршини Союзни уIзвее, ёкьни адабиятни китабни авторе АIбдураIгьим Дадашеве гьаъы. Манкъвее едини мизена кьадир, ваджибыйвалла ющенавъу. Гойне едини мизехъа одкIунийн джун шечIбы хъаIдхъы . Мактабни шигыртарше цIаIхбышди шааираршин , язычершин асарбы йикIеке хъаIдхъы.
Гьамани джад йигъыл’ едини мизяаршини Йигъыс кьабсырна маджлис ЦIаIхни йыIкьнекни мактабее илгъевчIу. Мактабни директорни увгьойква , мани йигъыс мактабна са гоз’ гьаIзиравъу. Истолбышилхъа цIаIхни мизел’ одкIунийн адабиятын, мизен китаббы гьагвас гёку. Ушахара шааираршиква ва джо одкIунни китаббышиква танышавъу. Мактабни маъаIллимарше едина миз’ нягьаIбый ва нишихъа горайий гьуваджес вукканва увгьо. Манбышди увгьойква, едина миз’ ши хъооIни архайс гьувааджес вуккан. Агар мана ши гьидваадже, не йишин адабият, не таарых не аIдатбы, не адаббы гьуваджес аIхас деш. Ушахарше едини мизел’ йишди шааираршин шечIбы хъаIдхъы.
Марахыкван йигъынджагъбы Муслагъни йыIкьнекни мактабее илгъеIчу. Мактабни едини мизени дарсбышди маъаIллиме Гул’сават Наврузовае ачухын дарс гьувы. МаIнкъее ушахаршиква саджигее тамашейс едини мизен дарс гьаIзираъы. Ушахарше едини мизел’ шечIбы йикIеке хъаIдхъы.
Едини мизени Йигъыс кьабсырна маджлис Мишлешни йыIкьнекни мактабее илгъевчIу. Мана джени шыгыртаршиква саджигее Мина маъаIллимае къурмишавъу. Махъа тамашейс мактабна директор ЫIсмаыл’ маIъаллим, завуч Алескер маъаIллим, организатор Фейзуллагь маъаIллим ва мебын маъаIллимар абы. Ушахарше мани йигъыл’ сыныфна гоз’ беземишавъу. Манбыше шечIбы хъаIдхъы, маIънийбы гьекIу, тапманджебы сана-санкъулхъа гьувы, мыкIаара гьаъы. Йишди миллетын йиссейн аIдатбы гьагу. Мани йигъыл’ маъаIллимае, ушахар йиссейн йишди миллетын палтарбы аляъы мактабеехъа хъабы. МаъаIллимее дезгьагьбы гьагу, чин добы увгьо ва няайий манбы ишлемишаъа ушахаршис хаIдхъаъы.
Едини мизяаршини йигъыс къабсырна маджлис ДжинаIгъни мактабейиб илгъевчIу. МаъаIллимарше ушахаршин едини мизена вааджибыйвалла ющенавъу. Йишди миллетни ааIлимарше , шааирарше, язычерше одкIунни китаббышиква , журналбышиква танышавъу. Ушахарше йикIеке друстда шечIбы хъаIдхъы.
