Гыргыни дюнйейл’ хьинне, Сувал’ни маIгьалыл’ни хаIдданани цIаIхбышди мактаббышее Ед’ни мизен йигъ миллетын байрам хьинне алгъавгьу.
Къийна Сувал’ни дерайл’ хьодле йыкIкнекин мактаб , са быкырдехьайн йыIкьнекин мактаб, саммы дешхьее кьоIдлемы дагъайдни сыныфбышин мактаббы аху водунбы. Мани мактаббышейид хъаIдаххъани ушахаршин сай хьебыд- ёкьуд къатна кIыл’хъыхьа водун. Анджах вобний вахт мактаббы ушахаршиква гяцIыний. Са сыныфыхъад кьоIбле , хьейибле дестений. Гыргыни хурни хиваршее дагъайдни сыныфбышин мактаббыний. Вахтбы адкIынийнбы, замаанабы бадалхьайнбы. Манчихъа ил’дяакы , ушахаршиквана ичIубна иш гьаIшдеб гьаIракатыква вуккекка вобна. МаъаIлимарше шигыртаршис ацIаал’бы, тербие хъодкуда гьели водун. Манбыше хъаIдхъийква, ацIааликва, мизеква багълыданан байрамбы чини къайдайл’ алгъайгьенбы.
Февральни 21-чил’ ЦIаIхни дерайл’ни мактаббышее Ед’ни мизес къадсырыйн йигъ алгъавгьу. Мишлешни йыIкьнекни мактабее ман байрам директорни Арсен Мурадовни регьберийваликва цIаIхни мизен дарсбы гьелени маъаIллимае Минаханум Ибрагьимовае алгъавгьу. Минаханум маъаIллимайс мана маджлис къурмишааъас кумаг джени ишни гьамбазарше, маъаIллимарше гьувы. Тамашейс мактабни утагъеехъа мактабын маъаIллимар, ушахар ва ишчера сабы. Мани йигъыл’ ушахарше тамашейс йишди миллетын аIдатбы, йиссейда аляъан палтар , хорагбы гьагу. АIсас, сабыйнбышди гьийд мактабни ушахарше едини мизел’ цIаIхбышди шааираршин шечIбы йикIеке хъаIдхъы ва едини мизел’ китабеенче друстда художественный текстбы хъаIдхъы. Манбышди гьаIракатбышис ахтыйна кьиймат тамашеехъа сабыйнбыше гьувы.
ЦIаIхни мактабейид, ман едини мизен байрам гьаммашийн хьинне уфтанда алгъавгьу. ЦIаIхни мизен ва адабиятын дарсбы гьелени маъаIллиме — Руслан АIббасове едини мизел’ чапыке хъигъечIуйни китаббышин тамашейс стенд гиххьы. Мактабни шигыртарше шааираршин шечIбы, язычершин хабарбы, мехвар хъаIдхъы. Р. АIббасове маъаIллимар тезеда чапыке хъигъечIуйни цIаIхбышди язычершини, шааираршини, ааIлимаршини китаббышиква танышавъу. Мана маджлис илёдгъуйни чейбышиква таамувхьа.
Муслагъни мактабее Едини мизени йигъыс къабсырна маджлис мактабни регьбераршейий цIаIхни мизен дарсбы гьелени маъаIллимае — Гул’сават Наврузовае къурмишавъу. Мани маджлисее ушахарше цIаIхбышди шаираршин шечIбы йикIеке хъаIдхъы . Гул’сават маъаIллима , гьам йишди мизелин маIънийбы гьаъана доюкана артистка ворна. МаIнкъее джена иш къулайква гьааъана.
Уфтанна маджлис ДжинаIгъни мактабейиб вухьа. Мана маджлис джени маъаIллим – гьамбазаршиква Зейнаб ГьуIсейновае къурмишавъу. Мактабни ушахарше едини мизел’ шечIбы, хабарбы хъаIдхъы ва тамашебы гьагу. Йигъынджагъын шикыл’бы , видеобы цIыцIаы. Мактабни директорни Нажмуддин маъаIллимни увгьойква , маIгьдыни маджлисбышди гьаIкIее «Нур» кIазетее, «Лачын» журналее окIанас ыккан ва цIаIхбышди видеоверлишбышее гьагвас ыккан. Маныд са гьаIракат водун, нягьаIдый йишди миллетин: миз’, адабият, маданият, таарых гьуваджес.
Гыл’ мецIни мактабее маджлис цIаIхни мизелин дарсбы гьелени Навруз маъаIллимее вукку. Мактабни шигыртарше шааираршин шечIбы йикIеке хъаIдхъы Анджах нягьаIдый ман Ед’ни мизен йигъ Лекни мактабее илгъечIу, гьалекийс хабар шахъаб дешда.
ЦIаIхни дерайл’ни мактаббышее мани йигъыл’ ушахарше Дабыз Джаббарын, АIчлей Гьарунын, Дабыз Шавкатын, АIшукь Сафарын, АIбдураIгьим Дадашевын, ВаIгьид Мирзоевын, УлуцIахийн, Юсуф Юсуфовын, Валегь Гьамзатын, Кьурбан Омахановын, Наргиз Раджабовайн, Нарман ГьаIсановын, Айгул’ АIлиевайн, Гул’бениз Рамазановайн (Наоми) ва мебынбышин шечIбы йикIеке, хабарбы друстда хъаIдхъы.
