СВО гидгъылыйле хъийгъа «Нур» кIазетин мааъаб воохьени йишди эл’ни джаванаршиква гуджнакван алаакьабы аххъаххъа. Эскераршина вазият ваацIавхьесдимее, манбышиква экIба-экIба связейхъа хъигъеебачIи. Хайбышейхъа истираIгьатыс хъабыйни джаванаршикван редакциейъад горушбы алгъайгьи.

Сабара гагьна гьихъа йишин мигьманар СВО иштыракчер Сулейманов АIлийий АIшураIлиев Азан вухьа. Манбы редакциейхъа кIазетни мухбирни Рамил’ АIбдуллаевни теклифыка абы.
Сулейманов Алий ва АIшураIлиев Азан СВО гидгъылни цIеддыйни йигъыле мааъаб вобунбы. Манбы хаIдданани вурушбышин иштыракчер вобонбы. Редакциейни мигьманарше гаф джо СВО къаджейнчикейий къайихьыйнчике гьавъу. Гойне хьинне манбыше джоква саджигее воохьени цIаIхни халкьни джаванаршике йишонебхьа. Манбышди увгьойка, Россиейни кьувватбыше гьихъа миллетчерше аххъыйн торпахбы йыIкьаIлхъа алятIанбы. Мани карее йишди эскерарше хаIбна игитийвалла гьаагва. Сабара вахтаке ши манбыше назарат гьаъан ахуйн торпахбыд темизяъасынбы.
Мигьманар телесюгба вухьайхъа гора, манбы редакциее хаIбба авху деш. Мани йигъыл’ манбы СВО сивийкIал вухьа. Саламаттамишувхьа аIл’гьаанкъа, Рамил’ АIбдуллаеве манбышис гьаIзирауйн басиркIа хъуво. Махъа манкъве эскераршис одхьанан тадарукбыйий лазымын карбы къахову.
Гьайни йигъбышее къаховуйн басиркIа джигайлхъа гьидхьырва хабар хъабы. Мааъаб воохьени эскерарше джо аIрсей гьавъуйхъа гора, редакциейс, джурайда Рамил’ АIбдуллаевыс миннатдарыйвалла агъмишавъу. Манбыше джо цIыцIау йаIххъыл’ гьауйни видеосюжете басиркIа саъас кумаг гьувойнбышис угъурбы аIрзау. Манбышис югун дилягбы гьеххъы.