Гьайни сен гёгъыйбыше, чин ал’яуйни фалякатбыше республикIайс геед хаIдын зияанбы гьуво. Манчини гьаIкIе ши аIтрафлыда оIтмишхьайни нумрабыше маIълумат гьувойн.

Гёгъыйбыше ва чин гьаъуйни селерше гьар элейс йишди Сувал’ни дерайини хиваршисыд зиянбы гьеленбы.
ОIтмишхьайни уIл’джуме йишда йаIхъ сувалхъа Джинягъни хивеqхъа вухьа. Мааъар хизаныс, хивыс, миллетыс заIгьматавъуна югна инсан Балаев Сураддин Ширинна дих раIгьматейхъа аркIын ыхьа. Аллагье джулхъа раIгьматааъана, джуна джига дженнете вухьена, делесынбышди йикIбышис сабырбы гьеленбы.
Махъа гьабкIынни йигъбышее сувал’ маIгькамын гёгъыйбы ыхьа. Сабара джигабыше селер ыхьа, йаIхъбы одкIул ва къаебы хъады. Манчиле савагьийда ишыгъбы ва телефонын связьбыд адкIын ыхьа. МахуIбна вазият гьар гёгъыйбы ыхьайнкъаI cувал’ воохьена. Манчихъа гора мааъад ешемишоохьени, югни-писди йигъыл’ махъа гьабкIынни инсанаршис мани фаляакатбышике ыхьайни зиянбыше хаIбна дагъамийвалла гьооли.
Гьел'бедти мана цIебба табиятни фаляакатни гьийб илёзарасын гудж ва имканбы дешинбы. Фаляакат, баляа бирданхьес абайли. ОIгийлни сенбышее ман одкIулыйн йаIхъбы хъаъас, йаIххъыIлин къаебы акIанаъас трахтор сутIкIабына гозетяъа ыхьа. Амма аIхрейни сенбыше районни йаIхъбышихъа иляккани ташкилатын мана иш вахтал’ къооджи ва махъа йаIхъбы темизzъан техника къихелен. Гьайни зарбасыд телефонын связь дехьейид, манбышилхъа исмарыш къахву, манбы аблявъуйнбы. МиххьегIни хивни кIанени дерайл’ сел’ хъабы, йахъ итIумувхьа вухьа. Доротделни ишчерше кьоIни саIъате машинбы илгъечIесда мумкум гьавъу/ Мманбы ийкар гидгъылийнбы.
Ши сабкIыл хъооIнкъаI, Къенни хивее «Дорстрой-К» донани йаIхъбышихъа иляккани ташкилатни ишчершиква горушмышебхьа. Ши манбыше къооджени ишыс ахтына кьиймат гьуво. Гойнед йишди ва сувал’ни джамаIъатни мизеле манбышикIле сагъулва увгьо.
Мани ташкилатна хааIрна, Дагъыстанни Халкьни Маджлисна депутат Шафи АIбдуллаев мани йигъыл’ ишбышхъа гора МагьаIчкъале ыхьа. Амма джун ишчер уходнойн йигъ ыхьейид ишлемишебахьи вухьа.
Манбыше йаIхъбы темизяъас хьебыдле техника къахво ыхьа.
Сабаранкъве эгьесын мана манбышда иш вобна ва бордж водун. Гьел’бедти манбыб дюзиба вобунбы, амма уходнойбышди йигъыл’ манбыше мана иш мичIейбыйке гьавъу.
Къийнийни йигъыл’ дагъамна вазият Гыл’мецIни ва Лекни хиварше вобна. Няъас увгьое мани хиваршехъа аIлгьаана йахъ хьинен гьобгъул абкIын вобна. Гьар элейс манбыше джоджад къаебы гиххьы инсанар ва машинбы илгъечIесда йаIхъ гьаъана. Анджах Самур дамайн хьян хаIдхъыхьаме, мана гьобгъул авайкIанна. Манчихъа гора мани джамаIъатын районни ва республикайни сураке кумагбы гьеххъа водунбы.

Ши доIъа гьааъас вуккан, мани фаляакатыке Аллагье йишин миллет, хивар, гьувадженбыва ва йиджбы дехьенбыва.