Гьайни сенни октябрьни вуза Дагъыстанни девлет китаббышди чапханее цIаIхбышди поэзиейни агъсаххъалын сувагылий Фаррух Мусайн ( Гьамзаев Муса Османна дих) кьоIдъэсн китаб « ЙикIен аIраз» чапыке хъигъечIу.
ЦIеддыйн манкъун китаб «МуIгьуббатна гудж» сабара сенбына гьихъа чапыке къайиккы. Ман къоIйидсана раIгьматтыгъ Фаррух Мусайни асарбышикван китаббы чапыс джуни духе Гьамзате ( Гьамзаев Валегь Мусайна дих) гьазираъы. Тезе китабеехъа цIаIхбышди адабиятни классикын ед’ни ва азербайджанни мизяршил’ одкIунийн шеирбы ва чин урусни мизелхъа сакIалаыйн вариантбы гядкIу. Адабиятни урусни мизелхъа манбы шааире, адабиятни танкьитче, публицисте Мурад Саиде сакIалаы. Манкъус кумаг Валегь Гьамзатее гьаъы.
Шааирин хаIдданан китабеехъа гядкIуйн асарбы муIгьуббатни лирикайкенбы водунбы. Манчиле гъайре, мани китабе инсанни ешайишни, дагъамни ыIмрени, гьихъиаллани табиятни, заIгьматни, ватанни гьаIкIеедын шечIбыд водунбы.
Китабысын предисловие (сифтаана гаф) дойикани адабиятни танкьитче Мурад Саиде урусни мизел’ одкIун. Садджу манчин китабее 86 варакь авхъаахъа. Мани хаIбни макьаале быкырын Фаррух Мусайни ыIмрен ва джуни поэзиейн аIтрафлы анализ гьели водун. Манчиле гъайре манкъвее цIаIхбышди таарыхыкен маIълумат гьели водун. АIрее — аIрее доюкани шааирарше увгьойн фыкырбы ва одкIунийн шечIбы гьели.
Предисловие Мурад Саиде Фаррух Мусайни едигарыс кьабсырни урусни мизел’ обкIунни шечIиква : «Удел поэта – верить в свой народ» гидгъыл. Предисловиейле хъийгъа шааирын машрыкьни къайдайл’ одкIунийн шечIбы: герайлыбы, къошмабы, гаIсидабы, мухаммасбы, рубаибы, поэмабы гьели водунбы. Манчини гыргынчихъад чин тематика водун.
Шааире джуни шечIбышее джурабаджур адабиятын художественный приембы: эпитетбы, метафорабы, тутушмишаийбы ва медынбы ишлемишаъа.
Китабыс кьиймат шоке, адабиятни гьаваскараршике гьевлес вааIха.
Ман хыляхъа алеетIу хъаIдхъас ыккан. Инам гьеъэ, шу пашманувхьес деш. ЦIаIхбышди адабиятни таарыхни муджреехъа сайид китаб эIчы. Ненкъвейий китабыс заIгьамт гьавъу, гьасре Аллагье манбышди хылепбышис кьудрат гьелен! Гьасре мани китабни гьицIайгъарни хаIнейни шавухын ачухееъэджин йаIхъ тезеба гивийгъални джегьил’ шааираршис!