Дагъыстанни гьоIкуматни университете «Философиейни ва сиясатни арайл’» Быкырроссиейни ыIлми-практик конференциейн цIеддыйн йигъ илгъечIу.
Маджлис Дагъыстан Республикайни цIеррыйни президентни, философиейни ыIлимбышди докторни, профессор Муху АIлиевни 85-сенийс къабсыр.
Конференцие ДР-ни ХаIрынкъуни ва ГьоIкуматни Администрациейни ва Россиейни ыIлимбышди академиейни философиейни институтни кумагыка тешкиляу. Манчее иштырак гьаъасдиме 100 агъаллан доюкан россиейн ааIлимар, гьоIкуматын къуллухчер, сиясатчер, философар абы.
Дагъуниверситетни ректорни МуртазаIли Рабадановни джуваббышихъа гора, конференциейни екунбышиква гыргыни чыхыш гьаийнбышди докладбышикван садибын сборник къайиккас.
Конференциейни иштыракчершис ДР-ни Халкьни Маджлисни Садрее Заур Аскендерове хошгел’ди гьавъу. Манкъуни увгьойка, Муху АIлиевниме сиясат идаара гьаъан аади технологие дешдий. Ман кIорани философиейкван ва джавабдегьийваллайкван къуллухаий водун. Манкъве хъийгъа республикайни регьберни Сергей Меликовни доюле табрикын кагъыз хъаIдхъы.
«Муху Гимбатович няаъар ишлемиш ыхьейир — ыIлимее, таIгьсилее, республикайни вукIлел’, Россиейни Совет Федерациее, Совет Авропайни ерры ва регионални гьуIкумбышди Конгрессее гыргын джун ацIаал’бы, таджруба аIзизни диярыс къуллухавъуйс багъышау. Манчиква манкъве дагъыстанныбышди арей хаIбна гьуIрмат къазанмишавъу» — мааъад одкIуний.
Дагъыстанни ХаIрынкъуни увгьойка, Муху АIлиев чалышмышхьана шавук’джар акарна хъидехьес, гьаммаше джуни къеквее ихьес.
«Философиейни ва сиясатни арайл’» китаб гьаIшдийни бадалэхьени дюнйейни таарыхни, модернизациейни таджрубайни, терроризмайка ва дин-сиясатни экстремизмайка мубаризайни вааджибни суалбышис къадсыр. Ман темабы, авторни джуваббышиква, Дагъыстанниме гьалед вааджибда ахва водунбы», — Сергей Меликове къейдау.
Мураджият Муху АIлиевни философиейхъани ыIлми заIгьматыс, гьоIкуматни сиясатейни гьаракатбышис ва республика артмишивхьайниме къаджейни гьунарбышис миннатдарийвалла агъмишааъани джуваббышиква таамхьа.
Хъийгъа джуваб Муху АIлиевус гьуво. Манкъве «Обгонять не догоняя!» докладыква чыхышау. Республикайни цIеррыйни президентни джуваббышихъа гора, докладни доюн джуваббы доюкани ааIлиме Игорь Курчатове агъмишаийнбы водунбы. ХХ асырни йыIкьнее атомна отрасль яратмишавъийнбышди гьийб оIлкайни чIакIынбыше дагъамна месала гивхьу: кIыл’ни вахтее ахтыйни технологиейна атомна отрасль къурмишавъий.
«Манке ман дюнйейл’ни сиясатни дагъамни вазиятын телябаъа ыхьа, гаф Совет гьоIкуматни геледжагъни гьаIкIее аIл’гьаа вухьа»,- Муху АIлиеве къейдау.
Конференциее республикайни доюкани менни ааIлимаршед чыхышбы гьау.
Маджлисни чечнайл’ Дагъуниверситете «Философие» саIнаъатни ачмишхьайни 20-сенийс къадсырыйн Муху АIлиевни монографиебышин выставка ыхьа.
Муху АIлиеве ёкьудле сенна республикайс хаIбвалла гьавъу. Мани сенбышее манкъве Дагъыстанниме, йишди халкьбышдиме хаIбна иш къавджу. Республикайни журналистарше мана садджу хошни джуваббышиква йикIел’ хъаляъа. Манкъве бюджетни дагъамни вазиятыхъа ил’дяккы, СМИ ишчершин доннухбы хил’дже хаIдхъау. Муху Гимбатовиче гьаммаше регионын марахбы къорамишаъа ыхьа. Самур дамайни хьинени аллан гьыIджатбы гыргынкъус йикIел’ ихьес. Манке манкъве ачухда увгьойн, йизда иш халкьыс къуллухавъий вобна. Манчини аллад зы халкьыс зиянысын гьаракатбы гьаъас деш.
