Къийна цIаIхни халкьни джаванарше СВО ал’гьааIни джигабышее Россиейна санабийвалла азгъунувхьайни миллетчершике гьувааджи. Манбыше джони гьаIракатыква кIылда-кIылда миллетчерше аххъыйн торпахбы йыIкьаIлхъа алятIа водунбы. Йишди эскераршини джомардийвалика, манбышди гьунарыке ши хаIдда макьалабы одкIун. Къийнийна йишда гаф ГьуIсейнов Ибрагьим МагьаIммадни духайни гьаIкIеена вухьес.
И. ГьуIсейнов едике МагьаIчкъалайни шагьарее ыхьа. Манкъве шагьарын 40-ъэсди нумранан мактаб быкырау. Гьаманиджад сен санаъаIтбы Дагъыстан девлет технический университетни таможниейни факультетейхъа хъуво. АаIли мактабнадиплом алябтIумее, са сенна эскере къуллухааъас аркIын. Эскерийвалла быкыраувъуйле хъийгъа, контракт окIанасди къарарейхъа хъары.
Мана АIкьанани Востокни Белогорскни шагьарее контрактыка ишлемишехьи гиргъыл. Хьолле сенна артиллериейни къошунбышда эскер ыхьа. 2023-ъэсди сен гидгъылыйка Ибрагьим гьамбазаршиква саджигее СВО аляртIу. Манкийле хъийгъа мана Запарожиейни вилаетыл’ ворна. Гьайни йигъбышее мана сабара йигъбышис истираIгьатыс хаахъа хъары. Манкъус хошгелдий гьааъас абыйнбышди аIрайл’ зынар ыхьана.
Заквани горушее манкъве хаIдда СВО къаджейнчикейий къайиххьыйнчике гаф гьавъу. Манкъуни увгьойка, университете хъаIдаххъанкъаI джуни фыкрее таможнее ишлемишхьай ыхьа. Эскерейхъа аркIынмее, джуна фыкыр бадалувхьана. Геледжагъыл’ военный саIнаъат гьаъасди къарерйхъа хъары. Са сенна Ватаныс бордж хъуво, хаахъа саркIыл. Сабара гагьыле мер йыIкьаIлхъа частылхъа саркIыл’. Контрак одкIун эскерийвалла гьааъа гиргъыл.
СВО хъарыйнийигъыле мана артиллерист ворна. ЧIакIын 152 мм гуллебы айгьени Гиацинт пушкайс хидматааъа. Манкъве джуни гьамбазаршика саджигее миллетчершин оIги явашаъасдимее фугасын, кассетын гуллебы манбышди суралхъа айгьи. Манбыше пехотайн къошунбы гьихъа ал’гьааIсдимее эскераршис, техникайс йаIхъ аахъа.
Ибрагьимее гаф гьааъанкъаI увгьойн: «Россиейн авхъуна йаIхъ гьаIкIена вобна. Ненкеджад миллетчерше еймишаъани нагьаIкьни ихтилетбышис, видеороликбышис инамаъас ыккан деш. Манбыше йишди эксина вуккеккана пропаганда гьоран водун. Гьар инсанее джуна хизан, куче, шагьар, республика, хаIбна Ватан Россия къорамишаъас ыккан. Джуни гьийд илёдзырни макъсадылхъа гьихьарасдимее юрд душманаршике къорамишааъас лазымба. ГьаIшде йишди эскерарше мана иш вуккекка вобна. Гъамувхьай йишди сурал’ водун. Сабара вахтаке йишди къошунбыше миллетчерше аххъыйн гыргын торпахбы йыIкьаIлхъа алятIасынбы. Къийхъа СВО ал’гьааIни шагьарбышей, вилаетбышил’, республикабышее саакитийвалла вухьес».
Ибрагьимыхъад гьагуйни игитийвалис сакIы, хаIдда джурабаджурайн таIрыфбышин кагъызбыйий медалбы водунбы. Гьайни йигъбышее мана «За боевые отличия» медалыс лайикьра къаджы.
Ибрагьимын сабара йигъбышис хаахъа хъарыйле гыргын гогьар-гьамбаз, достар шадувхьайнбы. Манкъуни деккее МагьаIммад чоджее ва ед’ Солмаз баджей заквани ихтилетее увгьойн: «Гаде СВО гирхьуйни йигъыле, шахъад раIгьат дешин. Ши хаIм йигъна манкъуна фыкыр цIыцIааъа. Аллагьылхъа шукур, манкъве экIда-экIда зенгбы гьаъанбы. Джуни вазиятыке хабар гьоолена. Йишин хъидгIынбы гьаъанбы. Къийна ши наIгьбый дих СВО хъарыйле шадба, авхуйн СВО воохьени эскераршин дёлесынбыб манбы хъабы шадувхьенбы».
Духайни эскерейнче хъарыйс деккейий едей уфтанна дават гьуво. Манбыше хошгел’дийс абыйни джамаъаIтыс уфтанын садакьа бытIалау. Аллагье манбыше гьувойн садакьа кьабыляъан.
Давлатейхъа сабыйнбыше , къийна СВО воохьени эскераршина сагъвалла гьувааджесдимее дуъаI хъаIбхъы. Манбыше экIда СВО явашхьа, мааъаб воохьен эскерар хайбышейхъа савкIаласын дилягбы гьеххъы. Шинад къийна СВО воохьени эскераршис джанана сагъваллайий угъурбы аIрзаъа, саламатыйвалла вухьенава эйгьи.
