Исламни диныс ыIбаадат гьаый, манчилхъан инам йикIеенче ыхьай ва динни гьаIкIеедын кIораленчен ацIаал’ алетIуй хаIдын сувааб ва бордж водун. Гьайни гунагьбынани дюнйейл’ ешемишехьенхъаI, гьар инсане гьаммашийни дюнйехъана джига гьазирааъас вукан.
Ши, цIаIхбыб, мусурманершини уммайнбы вобунбы, манчихъа гора Исламни диныс ыIбадат гьаъас ыккан. Темизна мусурманий ихьесдимее, хьобле фарз бирмишавъу вобна.:
1. Шаъадат гьауй. (Аллагьыле гъайре мерна дешда, МаIгьаммад( аIл.с.) манкъве къаховуна пейгъанбар ворна). Агар гьаман джуваббы йикIеенче , камил’ни фыкреква увгье, мана мусурманий ворна. Ыкканни миллетна, ыккани сифатыквана мана ыхьай, тафавут сыкIылин джад дешин.
2. Йигъыс чини вахтал’ хьобле куб , гиджараIххий алеетIу гьавъуй.
3. Рамандина ваз авхъуй. Рамандини вуза мусурманершилхъа бирмишау водун сивар аххъый, гыргыни писди карбышике къирагъылхъа хъувхьай, нягьаIкьни карбышике тууба гьавъуй.
4. ФитIра къайищий. Гьар мусурманийн бордж водун сенис джуни девлетике, малаке садакьа хъувой.
5. ГьаIдж къил’мишавъуй. Агар имкам вобхье, мусурманийн бордж водун ыIмырее са элеесхьейир ГьаIджилхъа гьаркIыний. Маккеени ва Мадинеени зияратбишис ыIбадат гьауй, горханабышилхъа гьаркIыний, чIакIни манзикбыше джамаъаIт кубар гьауй, бирмишауйн аIгьдбы быкырауй.
Мусурманни уммайн сене кьоIдле вааджидын, исламни диныква багълыданан байрамбы кечирмишаъа. Манчин са Ураза байрам, шенсад Кьурбан байрам водун. Ши, цIаIхбыше, манчикIле Рамандин ХаIдын йигъый Кьурбанын хаIдын йигъва эйгьи. Вазни календарыхъа гора, гьар сен манбы йицIыдле йигъна шацыйле гьихъа алгъайгьи. КьоIни ХаIдни йигъбышди аIрее йигIцал’ йигъ эйхьи. ЦIедда Рамандин ХаIдын йигъ кечирмишаъа, гойне Кьурбанын хаIдын йигъ.
ГьаIдж къил’мишавъуй мусурманийлхъа бирмишавъуна хьодъэсда вааджибна фарз вобна. ОIгийл’ Советни девырее ГьаIджилхъа вуIххъасда имкан инсанаршихъаб вухьа деш, йаIъни иджааза гьели ыхьа деш.
Совет гьоIкумат дагъылмишхьайле хъийгъа, сергьатбы ачмишхьайнбы. Манке гьаIджилхъа вуIххъа гибгъыл. Шукур Аллагьылхъа, гьаIдж къилмишавъуйнбышди аIрее йишин цIаIхбыб вобунбы. Гьел’бедти , махъа вуIххъасдимее инсанаршихъад имканбы ихьес ыккан ва гьихъа – гьихъа пылыквана, докуметбышиквана гьаIзирыйвалла къавджес вуккан.
Сабара йишди миллетын чубар, йичибы джони гьалалда къазамишауйни харджийбышиква гьабкIын. Сабаранбышис махъа вуIххъас ишкаре, Россиейни Федерацейни Советни сенаторе Сулейман Керимове гьаъы. ДагъыстанлыбышикIле манкъуна хыл’ачухийвалла ваацIа вобна. Исламын дин еймишаъас, инсанар гьаIдлжилхъа къихевлес, манзикбы аляъас ва медын динни сардан къеджени ишбышис манкъвее гьаммаше кумагаъан.
Къийнар хайир ишбы къеджени тIаркIее мана аххъы ворна.
Гьайни сен манкъуни харджийбышиква гьаIдж къилмишааъас Украинее аIлгъаани СВО иштыракаъани гябтIуйни, яраламишивхьайни дагъыстангъанчени эскераршин едяар, деккяр, хьунащер къахувы. Манбыд кIылин харджийбы дешодунбы. Манбышин йаIххъын, аахвасди джигайн, одхьунийн хардлжийбы Сулейман Керимовни джибеенченбы ыхьа.
С. Керимовни кумагыква гьаджилхъа гьабкIынийн цIаIхбышин чоджар, йичибы вухьа. Манбышин духйе, адамер СВО иштыракчера вобунбы; Ши манбышди духйебышди гьаIкIее вахтале – вахталхъа «Нур» кIазете макьалебы гьеленбы.
Шалхъаб вобни хабарыква гьайни сен гьаIдж къилмишааъас йишди миллетни гьайни чубабышис ва йичибышис кьисматувхьа: Османов Бунянымыс, ЫIсаева Хатуныс, Ибрагьимов АIгьмадыс, Ибиев Джамалиддиныс. Манбы ДжинаIгъни хивеенченбы вобунбы; Мишлешни хивеенче Кьурбанов Кьурбан ыхьа. Бел’ки шакIле дяацIанбы мебынбыб вухьа вухьес. Манбышин добы идтёвгье, шас багъышеъэджин.
«Нур» кIазетни редакциейн гьаIдж къилмишавъуйни йишдичубабышикIле ва йичибышикIле эйгьен: «Вушда гьаIдж Аллагье кьабыляаъана! ЙикIеедын мурадбы быкырхьенбы. Вушин духйе СВО-че сагъба саламатбы хизанбышеехъа савкIаланбы. РаIгьматыххъа абкIынни джегьилершис Аллагье дженнет гьелен. Джони едяршис деккяршис йикIен сабыр гьелен. Джони ушахаршис хыллийн, шадын ыIмырбы гьеленбы. Аамин!
