Гьар Аллагье ирхьыйни инсаныхъаб ыIмыробна, гьар ыIмырыхъабыб чина йаIхъобна. ЦIаIхбышихъаб ыIмырна йаIхъ гьалалба, темизни йикIеква гьобгьурийн доюкан инсанар гьаммаше хаIбба вухьа, манбыше йишин халкь ахты хъау, гьуIрматылхъа алхъавъу. Гыл’мецIалий Эмирджан Саламна дих манбышда са ыхьа.
Мана 1936 сенни январьни 9-чил едике ыхьа. Манбы дагъамын вахтбыний: Дагъыстанэй кIалхозбы къурмиш гьаъана вахт вухьа. ЙигIни ешей Э. Мирзоев Гыл’мецIни дагъайдни мактабни сыныфейхъа хъаркIын. ЙыIкьнекин мактаб Рутул быкырау. Манчиле хъийгъа манкъве хьебыдле сенна Ватаныс къуллух гьавъу, гьамыд политкурсубы таамау. Эскерейнче хъары, Дагъыстанни мединститутейхъа ичIу.
Эмирджан Мирзоев эн югда хъаIдаххъани телебабышди сыранэй ыхьа. Ман аали мактаб манкъве 1963 сен таамау, Рутул райбольницей хирург-травматологна ишлемишхьа. Джуни ишни гьамбазаршини ва вуджее маалидже гьаъани чIырынбышди арайл’ Эмирджан дохтуре хаIбна гьуIрмат къазаммишавъу. Манкъве хаIббанани инсанаршин джанбы, къел’бы, хулеббы маIъыфыйвалике гьуваджу.
1968-1972 сенбышее Саламна дих Эмирджане Ленинградни шагьаре дохтураршина дарадже ахты хъааъана институтни аспирантурей хъаIдхъы. КьоIни сеней диссертация обкIун. Диссертацие мудафиа гьааъанкъаI манкъуни ишис советын ахтына кьиймат гьуво, Ленинградни мединститутэй ишлемишхьес теклифау.
ЫIлимни дараджейква , медицинайни ыIлимбишда намизад Эмирджан Мирзоев МаIгьачкъалэйхъа саркIыл, Дагъыстанни мединститутни ортопедиейни ва травматологиейни кафедрей ишлемишехьи гиргъыл.
Эмирджан дохтур йишди республикайл’, Кавказыл’ камалукана, ацIаал’нана травматолог ыхьа. Манкъун гьунарбы къаджы, доюкана саIнаъаткар Алжирни Республикейхъа ишилхъа хъотIул. Ёкьудле сенна манкъве мааъаб заIгьмат гьавъу, саIнаъаткарар гьаIзиравъу. Эмирджан Саламовиче къавджейни ишис Алжирни гьоIкуматын хаIбна кьиймат гьуво ва манкъуни гьаIкIей фильм цIыцIау.
Хил’дже сенбына Мирзоев Э.С. Тунис Республикайил’ ишлемишхьа. Мааъар ишлемишехьени вахтал’ манкъве ёкьудваIщеле агъаллан операциебы гьау, инсанар къелилхъа хъавъу.
Дагъыстанни медакадемиее манкъве хьуледса телебайс дарсыбы гьуво, манбы дагъамни, амма раIгьымыкани дохтурни пешейни йаIххылхъа гявгьу. Эмирджан дохтуре дарс гьувойни телебабыше мана садджу хошни джуваббышиква йикIел’хъаляъа.
Эйгьи вод: «Талантукана инсан гыргыни карее талантукана эйхьена». Саламна дих Эмирджан Мирзоев халкьни арайл’ садджу ахтыйни дараджейквана дохтурхьинне джар деш, мана югна шааирхьиннер ацIа ыхьа. Манкъве цIаIхни, урусни ва азербайджанни мизаршил’ шечIбы одкIун. Манкъуни одкIунни гьаарни шечIихъаб кIорана маIънаа вухьа. ГьаIйифки, вудж сагъранани вахтал’ манкъус китаб къайиккас кьисмат дехьайн.
Э. Мирзоевни ушахаршеб деккини йаIххъыл’ гьобгьур, дохтурын саIнаъат сечмишау. ХаIарна дих, медицинайни ыIлимбышда намизад Низам Мирзоев, гьаIшде хаIдда сенбына деккее заIгьматавъуйни кафедрей ишлемишехьи ворна.
Э.С.Мирзоев 2018 сен раIгьматыххъа аркIын. Манкъве ачухни йикIеквани доланмишхьайка, Аллагье гьувойни гьунарбышиква халкьни арайл’ кIоран из гьадсыр. МаIгьабни инсанаршиква са вахтал’ ешемишивхьес кьисмат вухьайс ши гуянмишоохье вобунбы.
