Майни 9-чил Каспийскни шагьаре ХаIбни Ватанни даIвъийе Гъамувхьайни 79 сенийс къадсырыйн военный парад илгъечIу. Байрамни тадбырни шарафнани мигьманаршини арайл’ ХаIбни Ватанни даIвъийн ветеранар Ибрагьим-Паша Садыкьов, Муса Багьаудинов вухьа. Манчее Дагъыстанни премьер-министре АIбдулмуслим АIбдулмуслимове иштыракау.
Гъамувхьайн Парад Каспийскни флотилиейни офицераршини дестейн ачмишау. Манбышис хаIбвалла хааIрна лейтенант Марк Холодове гьавъу, Россиейни Федерациейни гьоIкуматын байдах лейтенант Филипп Зайцеве хъыгъайшу. Парадна хааIрна Каспийскни флотилиейни 1 рангна капитан Андрей Канищев ыхьа. Парад Каспийскни флотилиейни штабни хаIрынкъве – контр-адмирал Олег Кривороге кьабляу.
Джуни чыхышее АI. АIбдулмуслимове аIзизын ветеранар, дагъыстанын джаIмаъат республикайни регьберни Сергей Меликовни доюле Хабни Ватанни давъийе Гъамувхьайни 79 сенни байрамука табрикавъу. Манкъве увгьойн, 9 май оIлкайни гьар инсанниме некки ваджибын йигъ водун. Вахтбы аIлгьаанбы, насылбы бадалехьенбы, амма Гъамувхьай гьаммашийс ахван. Милйонбышиква советын инсанар даIвъийле йыIкьалхъа сабкIыл деш, манчин уцIур гьар хизаныс хъетIу. Республикайн фронтэйхъа кьоIдваIш аазырылхъа авабкьурийн инсанар къахову. Манбышике сурабы йыIкьалхъа сабкIыл деш.
Мол’цIал сен илгъечIуйле хъийгъа, йишин халкь мед нацизмайке Ватан къорамишавъуйниме сыгъоцу. Йишди дагъыстанлыбыше, ХаIбни Ватанни даIвъийни кьаIгьраманаршини невабыше, йаIгь-ламысыка баба-дидершин аIдатбы гьуваджы, СВО игитийвалла гьаагва вобна. Манбышике йицIыдсанкъус ахтыйн Россиейни Федерациейни КьаIгьраманын до гьуво. Ши йишди Ватаныле гуянмишоохье вобунбы ва оIгийл’ни вахталийни ва гьаIшдийни кьаIгьраманаршина едигар гьуваджи вобна. Ши гьаIхълыба вобунбы ва ши гьелбетте гъамувхьесынбы, АIбдулмуслим АIбдулмуслимове агъмишау.
Регионни премьер-министрни чыхышиле хъийгъа, Каспийскни йыIкьнекни майдамыле байрамни маршиква Каспийскни флотилиейн, менни кьуввабышин эскерар илгъебчIы. Манбышди арее эскер-едарыб вухьа. Парадыс уфтанийвалла «Юнармия» джаIмаъатни гьаракатни иштыракчершеб гьуво.
Военный парад ярахни техникайни илгъечIуйн давамау. Техникайни колоннайс хаIбвалла Каспййскни флотилиейни хаIрункъуни кумагчее Михаил Мироненкое гьавъу. ХаIбни Ватанни даIвийе Гъамувхьайни 79 сенийс къадсырыйн парад «Гъамувхьайн Йигъ» маIъний гьааъа илгъечIуйни оркестрын таамау.
