Октябрьни 21-чил йишди республике тентенейква Дагъыстанни маданиятын ва мизяаршин Йигъ алгъавгьу.
Мани йигъыл’ ДР-ни милли сиясатни ва динбышди ишбышди министерствайн тешкиляуйн «Дагъыстанни халкьбышди мизяаршилин диктант» гьар сенийлин акцие илгъечIу. Манчин аIсас майдан ДДПУ ыхьа. Мани аали мактабни дагъыстанни филологиейни факультетни утагъбышее республикайни 14 титульный халкьбышди эл’черше ед’ни мизел’ диктантбы одкIун.
Мана иш гивгъалассе гьихъа гыргынбы гьар утагъейхъа эбчIу ДР-ни милли сиясатни ва динбышди ишбышди тезе министре, Россиейни КьаIгьрамане Темирлан Абуталимове, Дагъыстан девлет педагожи университетни проректоре Ибрагьим Дибирове ва ФДФ-ни декане Зайнаб УIмаровае табрикавъу. Министре едина миз’гьуваджийниме ва артмишавъийниме къийнийни тадбырна ваджибыйвалла агъмишавъу. Гойне манкъве ва джукани къуллухчерше диктантни иштыракчершис угъурбы аIрзуламишау.
Манбышиле гъайре цIаIхни мизел’ диктант оокIананбышис хошгел’ди гьааъас ва байрамука табрикааъас аудиториейхъа джогърафиейна машгьур ааIлим, ДДПУ-ни биологиейни, джогърафиейни ва химиейни факультетна декан АIлиев Шарафуддин МаIгьаммадна дих ары. Манкъве халкьыка алаакьани тадбырейхъа абыйнбышис алхышнан джуваббы увгьо ва югун кьийматбы алятIас аIрзау.
Диктант йишди гьамбазе «Нур» кIазетни шоIъбайни редакторе, Тахо-Годийни доюл’ни ДНИИП-ни хааIрни ыIлми ишчийе Кьурбан Омаханове хъаIдхъы. ОйкIанни текстын до «Цывыл’» ыхьа. ЦIаIхни мизени одкIунийкен джон ацIаал’бы ёхламишаъас джурабаджурайни саIнаъатбышин ийессибы абы. Манбышди аIрее – ааIлимар, дохтурар, ед’ни мизел’ хъыIгъаани кIазетни, журнални, телеверлишбышин журналистар, телябабы, пенсийечер вухьа. Эгьес эйхьи, мани маджлисейхъа миллетни ишбышилхъа джан гёдхьанан инсанар абы.
Мани ваджибни тадбыре гьаракатукан иштырак гьаийхъа гора «НУР» кIазетни хааIрни редакторе Байрам АIбдуллаеве ва диктант тешкилявъийни Кьурбан Омаханове гыргынкъукIле сагъулва увгьо.
ГьаIкIедад, Дагъыстанни маданиятни ва мизяаршини Йигъыс къадсырыйн байрам йишдиме угъадукан ыхьа. Манчин халкьна садибыйвал’на кьувват бил’дирааъа. Гьел’бетти, маIгьадни миллетыква багълыдани ишбышее гьалеб хаIббананбыше иштырак гьаийнхьей югда эйхьийий. Умудааъана, хъооIни сен гьаIмагьыд ихьесын.
ЙикIел’хъаляъанки, МаIгьачкъалайле гъайре ед’ни мизелин диктантбы республикайни гыргыни мактаббышее, маданиятни ташкилатбышее ва менни идарабышейид одкIунийнбы.
