Гьайни йигъбышее Мишлешни хивни йыIкьнекни мактабее СВО иштыракчийкван ГьаIсанов Рустамыкван горуш илгъечIу. Горушейхъа мактабын маъаIллимарый, шыгыртар сабы. Мааъад Рустаме махъа сабыйнбышиква ватанпарварийвалайни гьаIкIее йишонхьа.
Манкъукан горуш Фейзулла маъаIллимее алгъавъу. Горуш аахъанкъаI манкъве Рустамни игитийвалике, СВО гьаагуйни джомардийвалике гаф гьавъу. Манкъуни увгьойка, Рустам СВО гидгъылни цIеддыйни йигъыкеемааъар ыхьа. Мана Рутул районейнче моблизациейхъа гябкIынбышди джаргее ыхьа. Сабара вахтна гьаIзирийвалла илгъевчIыйле хъийгъа, мана джуни гьамбазаршиква саджигее Россиейн торпахбы укранацистаршике азадаъас аркIын. Вурушбышди санчее мана яраламишхьана. Хил’дже вахтна манкъве маалидже алятIуйле хъийгъа, мана меер джуни эскер гьамбазаршисахъа аркIын. Къийна мана Саратовни шагьарее ишлемишехьи. Манкъуна иш СВО багълыбана вобна. Манкъве джуни гьамбазаршикван алаакьа акIанаъа деш.
Фейзулла маъаIллиме Рустамни къийнийни ишике гаф гьавъуйле хъийгъа, джуваб манкъус гьуво.
Рустаме джун ушахаршикан ихтелет къийна Россиейн джони торпахбышее укранацистаршика вуккеккани джурайни операциейке гибгъыл. Манкъве увгьойн: «Йишда Ватан Россия вобна. Манчина садибийвалла къорамишауй йишди гыргынкъун бордж водон. Къийна Мишлешни хивейнче СВО хаIбба джаванар вобунбы. Манбыше авхуйнбыше хьинне Ватанни гьийдын бордж хъели. Азгъунувхьайни миллетчершиква вурушбы ыккекка. Мааъаб воохьени эскераршиква захъад алакьабы водонбы. Зы манбышиква гьар вахтал’ йишонехьена. Манбышда вазият ваацIоохьена. Манбы сагъба саламатба вобонбы».
Гойне хьинне манкъве, къийна эскерийвалейхъа вуххъаIс гьаIзирувхьайни джаванаршике гаф абчы. Манкъуни увгьойка, гьар сен Мишлешни хивейнче хаIбба джегилер эскерейхъа хъоотIал. Манбы ненкеджаб эскерийвалике дюгул’ воохьи деш. Манбыше адамейрше хьинне Ватанни гьийд бордж хъуво, хайбышейхъа сивийкIаланбы. Мани карее гыргынбыше йишди хивыс ахтына къиймат гьооли. Умуд гьааъана, геледжагъылиб мана иш йишди хивын абрыква вуккейсда.
ИлгъечIуйни горушее мактабни маъаIллимаршед чыхышбы гьауйнбы. Манбыше къийна СВО ва эскерийвалейни джаванаршике йишонейбхьа. Манбы хайбышейхъа, хизанбышейхъа савкIаласын дилягбы гьеххъы.
Горушни аIхырее Рустаме махъа сабыйнбышди суалбышис джаваббы хъуво. Манчин аIрайл’ хаIддананбы СВО-ка багълыдананбы ыхьа.
