СВО иштыракчер гьаIкIен игитер вобонбы. Манбыше къийна йишда Ватан, манчина садибийвалла гьувааджи. Россиейн торпахбы миллетчершике азадаъас чалышмишоохьи. Хыле ярахыквани душманаршика джомардба вурушбы ыккека.
Хылийвалис цIыцIахьайн СВО ненке таамхьай шавукIледжад дурустда ацIа дешодун. НАТО-йни оIлкабыше явашдевхьа миллетчершини дестебышис ярахыкван, техникайкан кумаг гьели. Манбышис даIвъий таамувхьай вуккан деш, джо оIтираъани ярахыныд кумаг гьели деш. Манче мааъаб яранмишувхьана вазият сыкIылбаб дагъам хъааъа.
Къийнийни йигъыл’ СВО Россиейн хаIдданани джурбаджурайни кьуввабыше иштыракаъа. Манбыше миллетчершина кок юзмишавъуйниме авиацие, чIийейлин къошунбы ишилхъа адчы. Манбышди аIрайл’ мотострелкарыб вобонбы.
Гыл’мецIни хивейнчена хааIрна сержант Мирзоев Сабир Билална дих 1984-ъэсди сен Гыл’мецIни хивее едике ыхьа. Мааъадын йыIкьнекин мактаб быкырау, эскерийвалейхъа аркIын. Манкъве адамершин мактаб чIаIвау, хаахъа саркIыл’. Сабара гагьна истирагаIт гьауйле хъийгъа, мер армиейхъа сакIаласди кьарарейхъа хъары. 2004-ъэсди сен цIеддыйн котракт одкIун. Хил’дже сенбына мотострелковый частыл’ ишлемишхьа.
Сабире СВО гидгъылмее тезеданда котракт окIанасди кьарарейхъа хъары. Манкъве 2023-ъэсди сен Амур вилаетни Благовещенскни шагьарее контрак тезелемишау. ГьаIшде мана СВО штурмовой дестейна командир ворна. Манкъве джуни гьамбазаршиква саджиге миллетчершиква мубариза вуккекка.
С. Мирзоев СВО ал’гьааIни хаIдданани вурушбышда иштыракчий ворна. Маннкъве хаIбвалла гьааъани дестейн Луганск Республикайн шагьарбы, къасабабы, хивар азадаъа. Манчини аIрайл’ Северодонецк, Рубежное, Кременное шагьарбы ыхьа. Къийна манбыше миллетчершини хыле ахуйн медын торпахбы хылелхъа саъасдимее вурушбы ыккекка.
Гьинчиле сабара вахтна гьихъа С. Мирзоев дагъамда адкIынни вурушбышди санчее йыIкьра яраламишхьана. Джан тавулхъа хъаляъасдиме хаIрра госпиталей къалирхьу. Югун маалидже алятIуйле хъийгъа, мана тезеданра СВО саркIыл’.
Сабирын до частыл’ къийна дирибаш эскераршини джаргее водон. МанкъукIле джуни гьамбазарше, командирарше игит-эскер эйгьи. Мани ахтыни доюс С.Мирзоев СВО гьаагуйни джомардийвалис, дирибашийвалис лайикьра къаджы. Манчиле гъайре манкъухъад гьокуIматын гьувойн хаIдда наградабы водонбы. Манбы — «Участник СВО», «За отвагу» ва сабара медынбы.
КIазетейхъана макьала гьаIзирааъанкъаI, ши манкъуква алакьа аххъы. Манкъве заквани ихтелетей джуни доюле гыргынбышис салам къахову. Гойне хьинне увгьойн: «Дюнйейлхъа арына инсан джуни юрдна ватанпарвар ихьес ыккан. Йишда Ватанылхъана аIшкь ва мугьуIб къийна Россиейна садибийвалла гьуваадженкъаI ваацIоохьи. СВО воохьенбышис кумаг гьелесдиме зынар манбышди аIрайл’ ворна. ШакIле ацIан, ши гъамувхьесынбы. Манчихъад са-кьоIдле дешин».
С. Мирзоеве увгьойни кал’мабышихъаб хаIбна кьувва вобна. Манбыше авхъуна йаIхъ гьаIкIена йаIхъ вобна. Шинаб манчика разийба вобунбы. Йишин эскерар СВО таамхьа, сагъба-саламатба хайбышейхъа савкIаласын ши гьар йигъыс дилягбы гьеххъа.
