Гьайни йигъбышее Дербентни шагьаре джегьилершини арайлин ММА аликкыйни гьичIоокаранбышин турнир илгъечIу. Мааъад Гунайни Дагъыстанни районбышейнче абыйни ваIщеле агъаллани идманчее иштыракау. Манбышди джаргэй ЦIаIхыйни дерайл’ни Мишлешни хивейнче абыйн куштакурарыб вухьайнбы.

Мишлешни хивее джегьилер гьичIоокарас хаIбхъааъан секцие ишлемишехьен сабара сенбы водунбы. Ушахаршис манчин къулайбы хивни йыIкьнекни мактабни физкультурайни маъаIллиме Рамазан Ибрагьимове хаIдхъаъа. Манкъун шыгыртар чалышмишоохьенбы гьаарни турнире джон гьунарбы гьагвас ва угъурбы къазаммишаъас. ГьаIшде манбы Дагъыстанэй ва манчиле къырагъыл’ни регионбышее илгъечIени турнирбышин ва чемпионатбышин иштыракчер вобунбы.
Дербентни шагьаре илгъечIуйни турнирейхъа тренер Р.Ибрагьимове гуджнакан куштакурар абы. Манбышди гыргынбыше югун джигабы аахъы. Хусусан, Къубалыев Радике, Керимов Рамиле ва АIгьмадов Саиде цIеддыйн джигабы аххъы. Мамедов Юнусе, АIгьмадов Тимуре ва Ибрагьимов Джамале нукIрайн медалбы къазаммишау.
Тренерни увгьойка, югун джигабы алятIуйнбышди арайл’ энки кIынна АIгьмадов Саид ыхьа. Мана 33 килойни чекей гьичIоркул’. Саид джуква баIс гьаъас хъигъебчIыйни гыргынкъуле гъамхьана. Манкъухъад йицIыдле сен водун. Мана хьодъэсди сыныфна шыгырт ворна.
Джегьилершини угъурбышиле тренерыква саджигэй мактабын коллектив, хивын джамаъаIтыд геед шадхьа. Джони мактабын, хивын до ахтывалейхъа къалхмишавъуйхъа гора, манбы гьаIкIен пегьливанар хьинне къаршиламишавъу.
Къийна джегьилер гьIракатыква тренер Р.Ибрагьимовни хаIбваликва геледжагъыл’ илгъечIесди джурабаджурайни турнирбышис гьаIзироохьи вобунбы. «Нур» кIазетни редакциейн Дербент илгъечIуйни турнире югун джигабы аххъыйн джегьилер, манбышда тренер, маъаIллимар ва делесынбы йикIейнче табрикааъанбы ва хъийгъад угъурбы къазаммишаъас аIрзаъа!