Ватан вуккыйкыний, вудж душманыке къорамишавъий, ватанни йаIххъыл’ шагьид вухьайнбы йикIеливхан гьидявъий ва вахт-вахтал’ йикIел’ хъавалявъуй, йишди джаванаршис ацIаляъуй чIакIынбышин бордж водун.

Ноябрьни 19-чил МагьаIчкъалее Чапханайни Хаа «Орлёнок-Дагестан» кIазетни юнкораршин «Твой подвиг не подлежит забвению» (Йигъна кьаIгьраманийвалла йикIеливханас деш) донан слёт илгъечIу. Мааъад Россиейн КьаIгьраманар ва хусуси ярахни операциее вурушмышоохьен йишин эскерар йикIел’ хъавалявъу.
Ман Дагъыстанни маIълуматни ва чапни Агентствайн, Дагъыстанни журналистаршини Союзын, «Орленок-Дагестан» ушахаршди кIазетын гьазираъуйн слёт ыхьа. Слёт гьайни сен Россиейни Президентни кьараруква къейдаъани Ватан къорамишааъанбышди Сенийс ва ХаIбни Ватанни даIвъийе Гъамувхьайни 80-ни сенийс къадсыр ыхьа.
Слётын иштыракчер ва мигьманар Дагинформни хаIрынкъуни цIеррыйни маIъвыне Рустам Джалакове табрикавъу ва увгьойн: «Ши чалышмышеебхьес вуккан гьаммаше иняхуIдын горушбы кечирмишаъас, няъас увгьее манчин йишди джаванаршис ватанпарварийвалла ва ватанылхъан мугьуIб гьехха гьаъа. Къийна иняа СВО-н иштыракчерыб ва сабара махъа гьабкIын манбышди игитийвал’ни гьаIкIее ойкIанан журналистарыб вухьайке зы шадра ворна.
Гойне мани горушее МагьачIкъалайни, Каспийскни мактаббышди шыгыртарше СВО-йс къадсырыйн шечIбы ва маIънийбы гьаъу. Манчиле савагьийда республикайни журналистарше СВО-ни иштыракчершди гьаIкIее цIыцIаъуйни кинобышихъаб иляакийнбы.
Хъийгъа республикайни журналистаршини ташкилатни садрыйни маIъвыне Байрам АIбдуллаеве сабара абыйни журналистаршис грамотабы ва гыранын китаббы пайис гьуво.
Горушейхъа абыйни СВО-ни иштыракчерше джо махъа хъобтIулыйнбышис сагъулва увгьо ва гьамеебхьа хъабы меб горушмышебхьесынбыва джуваб гьуво.
Слётыква барабарда бинаани фойее «Донбасс в объективе ТАСС» донана журналист Гянжеви ГьаIджибалаевна шикыл’бышда выставка илгъевчIу.