МагьаIчкъалайни шагьарее «Гъамувхьайн маляикар» тезе чапейнче хъигъечIуйни китабын презентация илгъечIу. Ман хусуси даIвъийни операциее вухьайни Дагъыстанейнчени Россиейни кьаIгьраманаршис къадсырыйн водон. Китабни презентациейхъа гьабтIыйни СВО иштыракчершин едяар ва хьунащер хъобтIул.

Тезе хъигъечIуйни китабее хаIбна джига джони игитийвалис «Россиейни Федерациейна КьаIгьраман» доюс лайикьба къавджейни йицIехьебани СВО иштыракчершини аллани одкIунийбыше авхъаахъа.
«Гъамувхьайн маляикар» китабын хъаIдаххъанбышис ватанпарварийвалике, кьаIгьраманарше гьаагуйни игитийвалике, манбышди Ватанылхъани ашкьыке хабар гьооли. Ман гьамыд джаванаршис тербие гьелен китаб водон.
Китабын презентация алгъааIнкъа «Дагестанская правда» кIазетни хааIрни редакторе Бурлият Токболатовае увгьойн: «Китабын Ватанниме вурушмишивхьайни Дагъыстанни къайсарни духйебышда, манбышди гьаIракатбышда едигар гьувааджи».
«Дагъыстан» чапханайни регьберни Умаросман ГьаIджиевни джуваббышихъа гора, тезе китаб ва манчиле гьихъа хъигъейчIуйн СВО иштыракчершини ва ХаIбни Ватанни даIвъийни ветеранаршини гьаIкIеедын китаббы,плакатбы республикайке къирагъыл’ гьаракатука еймишаъас ва китаббышди ярмаркабышее гьагвас.
Россиейни КьаIгьраманни МаIгьаммад Исбакиевни едее китаб къайиккас заIгьмат гьавъуйни гыргынбышис миннатдарийвалла агъмишавъу увгьойн: «Захъар геер раIгьымнана дихний ворна. Манкъус гьаммаше инсанаршис кумаг гьаъасний ыккан. Манкъуке хаIдда карний гьаъас аIхас. Анджах аIджалын манкъус имкан гьуво деш».
Презентациее китаб одкIунни Надежда Тузовае, ДР-ни маIълуматни ва чапни Агентствайни регьберни маIъвыне Алсудин МаIгьаммадове, «Дагъыстан» этномедиахолдингни башчийе АIбдуразакь Джамалутдинове ва мебынбыше чыхышбы гьау.