Сентябрьни 8-чил МаIгьачкъалэй «Кьувватнани рыIгьыканбы» фильмын презентацие илгъечIу. Манчихъа иляакас Дагъыстанна хааIрна Сергей Меликов, гьуIкумни ташкилатбышин къуллухчер, депутатар, джаIмаъатчер ва СВО иштыракчер абы.
Кино хусуси ярахни операциейни иштыракчершини кьаIгьраманийваллайс къадсыр. Проектна автор кьаIгьраманийваликва гьалакхьайни АIзим Муслимовна ед’ Мегьрибан Муслимова ворна.
Тамаше гьааъанбышис Ватанниме джан гьувойни йицIни эскерна ыIмырна йаIхъ тагдимавъу. Фильмее хаIбна фагьым тербиейни ва хизанбышди аIдатбышди суалбышис гьуво.
Фильм Дагъыстанни 12 районбышейий шагьарбышее цIыцIау. Манчис йихьыбле ваз вахтна абкIын. Кино ваIш саIъатни видеоматериалбышике, хаани архивбышди материалбышике ва СВО кадрбышике ибаратда.
Проект Сергей Меликовни кумагыка ишекечирмишау. Республикайни регьберни тапширмишаийка фильм машгьурни майданчебышее гьагвас.
Дагъыстанни хаIрынкъве «Кьувватнани рыIгьыканбы» фильмни камандайс миннатдарийвалла агъмишавъу.
« НягьаIде кьаIгьраманаршис кумагаъас ыккан, нягьаIбе Ватанниме джан гьувойнбышда едигар гьуваджес вуккан гьин быкырни оIлкайниме вааджибда водун. Ши гьувагыйни рольбы денани фильмыхъа иляакы. Гьиняаъаб гьаIкIена ыIмыробна. Гьасре Аллагьни кумагука вушда ыIмыр давамувхьеджен, манчее шинад кумагаъасын», — регионни башчийе эскераршини гогьарбышилхъа мураджият гьау.
Сергей Меликове къейдаийнки, даIвъийхъад хьулехьейд сурабы водунбы. Манчин са сура фронтыни хатIыке аIкьанада, тылыль еррашмишехьи.
«Манбы едяр, эскераршин хьунащер вобунбы. Фазу АIлиевае увгьойнхьинне: няаъаб гулле авгьеейиб, мана едини йикIес хъоотIас. Ман йикI’бы йишди геледжагъни ыIмырбышин даягъбы водунбы. ГьаIкIебаб ыIмыр « гьихъана» ва «хъийгъийна» битIалоохьи. Амма мана «хъийгъийна» гьаммашийни дюнйейлхъа абкIынийнбышди едигарыс ши югна ачухна гьааъас боржлыба вобунбы», — республикайни хаIрынкъве увгьо.
Фильмни авторе, «Едяршина гудж» ташкилатни регьбере Мегьрибан Муслимовае республикайниме вааджибын ман проект нягьаIде къурмишаъа ыхьай юшенау.
МаIнкъе къейд гьаийнки, фильм садджу кьаIгьраманаршини аллан джад дешодун. Манчее вааджибна джига гуджнакани рыIгьыкани едярше, хьунащерше авхъаахъа. Джолхъа адыйни йыIкьни баляабышихъа ил’дяакы, манбыше хылеббы даахъа хъау деш.
«ГьаIкIен кьагьраманар чIакIы хъавъуйни, манбышис тербие гьувойни дагъыстанни халкьыни лайикьыквани йишбышиле зы гуянмишейхьена», — маIнкъе агъмишау.
Мегьрибан Муслимовае къайгъуйс ва гьар карее кумаг гьувойс республикайни хаIрынкъус миннатдарийвалла бил’диравъу. Ташаккурыйвалла агъмишааъан джуваббы ГьоIкуматни Думайни СултIан ГьамзаевыкIлед увгьо. Манкъвед проект ишекечирмишаъас хыл’ авхъу.
«Умудааъана, гьини фильмын хаIдданани йикI’бышее гов гьавсарас. Манбы гьаммашийс йишди халкьыни фыкрее ахвасын таарыхбы водунбы», — « Кьувватнани рыIгьыканбы» фильмни авторе къейдау.
С. Гьамзаевни джуваббышихъа гора, «Кьувватнани рыIгьыканбы» фильмын Дагъыстанэй заIъыфа хав-уджагъ, аIдатбы гьуваджена йихьай тасдикьаъан. Гьини фильмее гьаIзираийн джуваббы ва табиятын шикыл’бы дешинбы. Гьиняаъад йицIни гьаIкIени инсанаршини ва манбышди едяршини аллан гьаIдисабы водунбы. Манбышике сабаранбы шагьарейнче, сабаранбы хиваршейнче вобунбы.
Депутатни увгьойка, мани кинойка хаIббаннанбы танышивхьес вуккан, няъас увгьее манчин дагъыстанныбышин СВО гьаIдисабышилхъан гьаIкIен алаакьабы гьагва. Манкъве къейд гьаийнки, федерални савиейл’ фильм гьагуйниме вуджее кумагаъасын.
Кинойхъа иляакыйнчиле хъийгъа, фильм къурмишаъанбышис Дагъыстанни хаIрынкъве гьоIкуматын наградабы гьуво.
